Read Car_Nicobarese HEPRĀI 4 Bible Online

HEPRĀI 4 - Car_Nicobarese bible

HEPRĀI 4

¹Ta-a lökten töi pa-ekūö, hòn öt amahaiṙen nö hĕng hang tak in yīö töhāṅten tö e, ngam kinlēḵngô, nö ṙā-ai nö kuhēthötre im haneūheuṅ Ò.

²Pò hī ngaich kô ahanga misī tö tölöök inhānga, sā cha cha-a inrē: ngaich pöri ngam ṙô töhānga, nö öt kanôlòvö tī tö cha, pò u nö öt mūlta nö lökten im mikah nö in yip hamang.

³Pò hī ayī-ö kuhēthötre im haneūheuṅ öi tö ngaich ṙātö ellōnre, sā ṙô e nö ngö, Sā chu im lanīnöre chūökuṙô, Öt kuhēthötre cha-a min nö im haneūheuṅ Chu: Pòrô minë la-en nö keuheūten hētentö ranehlö ngih panam.

⁴Pòn ngö ṙô Anga-aṅ nö yô-òv chūök ṙô tö ngam sinat sumkam nö sā ngih tö ngö, Ngaich heūheure ngam Tēv, nö i nup la-enre, im sinat sumkam;

⁵Ngaich hēk nö i ngih, Öt kuhēthötre cha-a min nö im haneūheuṅ Chu.

⁶Lökten meuk yēḵ tö e nö ōtngöre tö yip yô-òv min nö kuhēthötre nö umuh, ngaich cha-a yip tö ahangka tö ngam tölöök inhānga misī öt kôhöt nö kuhēthötre, kūö minôṙô.

⁷Hēk inrē Anga-aṅ nö halöök hē tö hĕng sakāmö, nö ngö ṙô nö in Tāvit, nö unôichrit tö ngirô-angen, Tötaheui, nö sā ṙinô-òiny e nö lā urĕh nö ngaich, Yē yīö min hang ṙô chu tö taheūi, uh yin hangëḵeng ellōnre.

⁸Yē Yôsuā nö ngaich nö kē tö haneūheuṅ cha, ngaich öthōḵ öre Anga-aṅ nö ṙô tö tahëng sakāmö.

⁹Lökten nö ōtre haneūheuṅ yip tarik ngam Tēv.

¹⁰Pòn ngam tö ngaich nö kēhötvö nö im haneūheuṅre, nö ngaich nö heūheure nö ṙā-ang i nup la-enre, sā ngam Tēv misī nö ṙā-ang i nup la-enre.

¹¹Lökten ta-a töi hakūötenre kuhēthötre, hòn öt tarīku tö fukta nö sā yip aṅ minôṙô.

¹²Pò ngam ṙô, ngam tö-aṅ, nö panyôta inrē, mööḵlö kaneūtö inrē tö tö-āṅngöre keūtö fël, tafūni tī inrē tö ranangkūö ngam nômö töm ma-alaha, tö nup tanap u nyöre aṅ el tangëḵ, veut inrē nö akah nup lōn, tanutö ellōn inrē.

¹³Öt hĕng tö në tövīlöngö; töt hameuktu nö i maneūkö Ò: ṙòkhöre pöri nö chumlal, lingāṅhaka nö i mat Ò, ngam chūök hī vahī-envö.

¹⁴Inu in ngaich tö tökiröng mākūö kūönṙô, tö kôḵlö ngaich nö el minë halīöngö, Yēsū ngam Tēv.

¹⁵Pò hī öt īnu tö mākūö kūönṙô, tö ngam töt hōḵ nö öt akahaiṙen nö lūölka tö öt kumlēḵen hī: tö ngaich pöri Anga-aṅ nö kalaha nö keuheūttöre lā-a löktö, nö sā hī, öt īnu pöri tö tökööl.

¹⁶Ta-a lökten töi ṙūöhtöre holtö öt pinhë-eṅkūö im kantēra inkôlò, hòṅ hī teūngen tö neūkölōn, ngaich kôtökūö tö inkôlò nö holṙen hē el hanāṅten.