Read Car_Nicobarese HEPRĀI 7 Bible Online

HEPRĀI 7 - Car_Nicobarese bible

HEPRĀI 7

¹Pò ngòh Melkisētĕk, rācha aṅ Sēlem, kūönṙô aṅ im Tēv Lāmātulöng, ngam hamöngkūö Aprahām tö invanö ò nö ṙā-ang i kinyūngö yik rācha, ngaich hakôlò ò,

²Ngam tömichöḵö inrē, nö hĕngvat nö i tö söm nö in u nö ṙòkhöre. Töngö manah nö urĕh, rācha kūö lanöökö, ngaich hēk inrē nö rācha aṅ Sēlem, töngö, rācha kūö lanāmö;

³Öt mahakūöntu tö kikōnyö, öt kamyôḵnyu, öt lökngurit, öt rēhĕn nö ranehlu nuk sakāmö, öt rēhĕn nômö nö manānguṙen, vītu pöri sā Kūön ngam Tēv köp nö kūönṙô nö iṙūöhen.

⁴Ngëichkö ṙôkö ngòh tarik misī, ngòh tö kē-ĕvkūö tö tö hĕng i tö söm, i nuk yöng kahil Aprahām ök patri-āk (Muvöhngö nö mā).

⁵Ngaich kô-en cha-a, yip kūön Lēvī, yip tö teūngen tö la-en kūönṙô nö chöngu nö kēḵ tö hĕng nö i tösöm nö i yip tarik, sā ngam chöngö, i yip hol cha, pòrô cha-a nö lamöknyö ṙat Aprahām:

⁶Ngaich pöri ngam töt kaheuktu lökngörit nö ṙeū-eung in cha, nö ngaich nö kēḵ tö hĕng i tösöm nö in Aprahām, ngaich hakôlò ò, ök tö īnu tö nuk kinlēḵngô.

⁷Öt kinilku ngam tö kūöṅnö, nö hakôlòngṙô tö ngam töpōyö.

⁸Ngaich vē tarik tökapah ihih nö kēḵ tö hĕng i tö söm, hĕng tak pöri ap ameū-aṅ, ap tö eūka nö aṅ.

⁹Sā tö ngö angū-ö, lökten Aprahām ang Lēvī ngam tö teungen tö tö hĕng i tö söm, nö ngaich nö kētö tö hĕng i tö söm;

¹⁰Pòn ṙòngmö i ṙat ök yöngre anga-aṅ kikōnyö, hē Melkisētĕk nö meukkūö ò.

¹¹Yĕn teungten öre nö lökten in Lēvī ngam la-en kūönṙô (pòn el katòh yik tarik nö teūngen tö ngam chöngö), asuhtöre lōn öi ayī-ö tö tahëng kūönṙô öi hōklöre öi lökngörit Melkisētĕk, öi öt lökngörit in Melkisētĕk, öi öt kaheuktu öi lökngörit in Āròn?

¹²Pò ngam la-en kūönṙô nö haṙī-ingre, ngaich hòṅ haṙī-iyö ngam chöngö inrē.

¹³Pòn aṅ tahëng miyöngö anga-aṅ ngam töngatī vinënyö, öt hĕng tak tarik mahakūöken ò nö i ngam tahāklö.

¹⁴Pò e nö meūkö, tö ngam Mā hī nö lökngörit in Yūtā, ngaich in e angū-ö miyöngö ang Môsös nö öt ṙô-òv tö kūönṙô.

¹⁵Pōilö mineūkö an, yĕn hōklöre öp tahëng kūönṙô nö tö sā Melkisētĕk.

¹⁶Ap tövīlöngö, öt sā ngam chöngö aṅ i chöngö tarik, sā ngam minhôiṅyö pöri, aṅ im töt manāngenvö nômö:

¹⁷Me-eṅ man kūönṙô tö-ör- heūheu, Lökngörit Melkisē- tēk, ineūkö Ò.

¹⁸Pò ngam ṙô taheui chöngö, nö rööḵngöre, kūö öt kumlēḵ e, öt kanôlò tī e inrē.

¹⁹(Pò ngam chöngö nö öt vahītuṙen tö töteungten) ane inrē kumtö öp tö ēhten mineūka nö in e, ngam löktö hī ṙūöhtöre im Tēv.

²⁰Ngaich pò e nö öt kē-ĕ ngam kinlēḵngô,

²¹Pò cha nö ngaich nö kô-en nö vīlöngö nö kūönṙô nö öt kinlēḵnguṙô: kilēḵngôre pöri nö lökten in Ò ngam tö ngö ṙô tö ò, Kilēḵngôre an ngam Mā, ngaich öthōḵ nö havanritre, Kūönṙô man me-eṅ tö-ör- heūheu;

²²Lökten in e an nö ngaich Yēsū nö vītöre nö ṙënngen aṅ im tö ngö-aṅlö kinlēḵngô.

²³Pòn kô-en cha-a nö vīlöngö nö kūönṙô, nö ṙōltak, pòn kūö kinpaha cha-a nö asökiyö nö im inṙuhöröönre:

²⁴Anga-aṅ pöri, pò ò nö tö örheūheu, öt haṙīköre ngam inlahen Ò nö kūönṙô.

²⁵Lökten inrē Anga-aṅ nö kô nö öt chöḵöv tī nö hayööken cha yip ṙamūötöre nö im Tēv nö lökten in Ò, pòn örheūheu Anga-aṅ nö aṅ, nö vë-elkui cha.

²⁶Ngam töngati mākūö kūön ṙô tö löngta nö in hī, töhet, öt tököölu, öt töchōchu, hakösiṙen tö tököölö fālen, tumlönglöngö tö minë halīöngö;

²⁷Öt sā yik mākūö kūönṙô nö kētö nup tökētu, nö hòṅ öt hĕng hang sumkam, urĕh nö chööḵnyö tö nuk tökööl cha, ngaich möl nö chööḵnyö tö nuk tökööl yik tarik; höng hĕng heuh tī pöri Anga-aṅ tö chööḵnyö tö taṙòkhöre, hē Ò nö kēḵngöre.

²⁸Pò ngam chöngö nö vī-il mākūö kūönṙô tö öt kumlēḵen; vīlö kūön pöri ngam ṙô aṅ im chūök ṙô, ngam tinömken ngam chöngö, nö örheūheu nö töteungten.