Read Car_Nicobarese YĀKÖP 2 Bible Online

YĀKÖP 2 - Car_Nicobarese bible

YĀKÖP 2

¹Kahōlö, un ṙapka ngam rinātö ellōn i ngam Mā hī Yēsū Kristū, ngam Mā kanôlò, nö holtö intöllen tarik.

²Yĕn hĕng tak öp tarik kumhēthötre nö el chūök yīö vë-ekūötēv, tö kinlōngu tö humlum, vāyö hinlāṙö inrē ngaich hĕng tak öp yāich tarik kumhëthötre, töng yô-òv hilā;

³Ngaich yī-ö chumkūöṙen tö ò ngam tö vāyö hinlāṙö; ngaich ngö ṙô, Ihih man ūichngöre, im tölöök chūökö, ngaich ngö ṙô yī-ö tö ngam yāich tarik, Umū-aṅ me-eṅ sökhaka, hēk ūichngöre elkatòh ngam ranöönö röön chu;

⁴Röh öyih harēvhanga ellōnre, ngaich vītöre ma-akah öi holtö nup tötlöök lōn?

⁵Kahōlö, hangihtöre yin; Röh Ang ngam Tēv nö katöllen cha, yip yāich nö ing panam, nö tökôlò nö im ṙinātö ellōn, tö amīnu inrē tö ngam pūlngö ngam tö ngaich nö kilēḵĕyö nö in cha. Yip töhāngenlōn tö Ò?

⁶Ngaich pöri yī-ö miṙēngö ngam yāich tarik. Röh yip tökôlò ṙung nö miyëḵ tö yīö, ngaich cha-a inrē nö tūökten yīö i kūö chūök kinṙôka?

⁷Röh yip nö ötlēkôre tö ngam tö eū-eu mine-eny, ngam invëkö yīö?

⁸Yē yīö pöri hateungngö ngam mā chöngö, sā ṙô ngam töhet līpöre, Hāngenlōn man tö holre sāre töre, huveū-en yī-ö:

⁹Yē yīö pöri atöltuṙen tö tarik, köölö fālen yī-ö, kôti ngaich tö tī ngam chöngö öi tököölö fālen.

¹⁰Ngòh tökeuheūt nö haköp ngam chöngö, ngaich hĕng kang chūök nö kavē-ĕre, tö fāluṙen anga-aṅ in u nö ṙòkhöre.

¹¹Pò Ò ngam tö ngö ṙô, Un asĕha, ngö ṙô inrē, Un fël tarik.” Yē meh öt asĕha, fël tarik pöri, tö fāluṙen me-eṅ ngaich im chöngö.

¹²Ngatī ṙô yī-ö, ngaich ngati tī, sā öp tarik tö kahòkkaṙen tö ngam chöngö töt inkövö.

¹³Pò ngam kinṙôka nö öt miṙē-ĕvlōn nö in ò ngam töt mahameuktö miṙēlōn: eū-eure an ngam miṙēlōn nö lā-al ngam kinṙôka.

¹⁴Kahōlö, asuh ap kanôlò, e, yē ngòh tarik nö aṅhaṅv-in tö ṙinātö ellōnre, öt aṅhaṅv-in pöri tö nup la-en? Kô öng ngam ṙinātö ellōn nö hayööken ò?

¹⁵Yĕn hĕng tak öp mak alaha meh kikōnyö, hēk kanānö meh öre nö chumlal, hāṅten inrē tö tötheūheu nya-aṅkūö,

¹⁶Ngaich hĕng tak tö yīö tö ngö ṙô tö cha, Kuṙòh ngaich yin, im kumchikṙen, ṙāich yin yēḵ ngaich, tööḵngen yēḵ inrē, ngaich rö-ö yī-ö kē-ĕkūö cha tö nup lōn ngam alaha; asuh ap kanôlò tī e?

¹⁷Ngatī ngam ṙinātö ellōn, nö kapah nöng kahngenre, yē e nö öt aṅhaṅv-in tö nup la-en.

¹⁸Hôṅ, yĕn hĕng tak öp tarik tö ngö ṙô, Aṅhaṅv-in man me-eṅ tö ṙinātö ellōn, aṅhaṅv-in chu-ö inrē tö nup la-en; hameuktö ngam ṙinātö ellōnre man in chu nö köhngen tö nup la-en meh, ngatī chu-ö inrē i nup la-enre hameuktö ngam ṙinātö ellōnre in meh.

¹⁹Ṙātö ellōnre man yih tö ngam Tēv nöng hĕng; huveūen me-eṅ: ṙātö ellōnre inrē vē sī-ö nö kichëiyöre.

²⁰Akahalōn öm min, Ō me-eṅ tarik mahanyatkö ellōn, tö ngam ṙinātö ellōn, yĕn köhngen tö nup la-en, nö öt ṙôngu?

²¹Röh ök muvöhngö hī Aprahām, nö kūö nuk la-en nö halööklöngö, i ò nö kētö ök kūönre Īsak nö el ök tahāklö?

²²Meuk man yĕh tö ngam ṙinātö ellōn nö holṙenre tö nuk la-en ò, lökten i nup la-en inrē ök ṙinātö ellōn nö vītu nö teungten;

²³Hateūngi ṙô ngaich ngam töhet līpöre, tö ngö ṙô, Ngaich ṙātö ellōnre Aprahām nö im Tēv, ngaich kaheuktu angū-ö nö in ò nö lanöökö; ngaich kaheūkö anga-aṅ nö hol ngam Tēv.

²⁴Meuk yin, tön lökten i nup la-en ngòh tarik nö halööklöngö, öt höng lökten i ṙinātö ellōnre.

²⁵Ngatī inlahen inrē misī Rāhap, ök mi-inyihköre kikānö, halööklöngö lökten i nup la-en, i ò nö kēḵ yik ma-ahānga, ngaich tīnngen cha nö talöökö tö tahëng.

²⁶Pòn sā ngam alaha nö kapah yĕn köhngen tö ngam ma-alaha, ngatī ngam ṙinātö ellōn nö kapah yĕn köhngen tö nup la-en.