Read Car_Nicobarese YĀKÖP 3 Bible Online

YĀKÖP 3 - Car_Nicobarese bible

YĀKÖP 3

¹Yī-ö hol chu, un ṙōl tak mahaköphöti, akah töhëichlōn tö hī min kiröngen taneūngen tö kinṙôka.

²Pò hī ṙòkhöre kavē-ĕre i tökeuheūttöre. Yĕn töt kavē-ĕrevö tarik nö im ṙô, anga-aṅ an töteung nö tarik, kô inrē nö hachōkūö ngam alaha.

³Yē hī ṙung hakāllö elvāng në kōra, pòn hōtu anū-ö nö hang chöngö hī, ngaich ayī-ö chuvē kūö u inrē.

⁴Yĕh ngëichkö në chōng inrē, pòrô anū-ö nö kiröng, ngaich aheūyiyö tö tökalēḵ kuföt, ngaich chuvēkakūö töp kun kanëḵritlö, ip töng kū-ö lōn ngam mi-iritlö.

⁵Ngatī ngam litāk nö tökūönö, nö tūmö alaha, ngaich kiröngö aheūka. Yĕh ngëicha, iṙôkhangen ön në ngòh tö ṙāpngö tö kūö öp kun tameūyö!

⁶Tameūyö an ngam litāk: ngam litāk an chūök öt lanöökö i në tūmö alaha hī, nö tökeuheūtngöre tī nö hachōich ngih alaha, ngaich tōttökūö tameūyö ngam chūök tökapah.

⁷Pòn keuheūttöre mihëṅṙö në töṙeūla, chehechōn inrē, nö pumlāmö, nup lamāna, aṅ el mai inrē, nö ngaich ṙung nö pumlāmö tö tarik:

⁸Ötkô pöri tarik nö pumlam ngam litāk, tötṙēmta an nö tötlöök, tööḵlö an tö kinpahangvah.

⁹Löknyö in e ṙô ayī-ö eū ngam Mā, Yöng inrē; löknyö in e ṙô öi ötlēkôre tö tarik ngam tövilöngö nö insā ngam Tēv:

¹⁰Höng hĕng ngam elvāng nö löknyö ineū-eu, öt linëkô inrē, Yī-ö hol chu, rö-ö nun anū-ö nö kô nö ngatī.

¹¹Löklö ël öp tö hĕng mak ön ṙung nö hëmlö, nö hĕnghöre tö kuchik, tö-angū-uvö inrē mak?

¹²Yī-ö hol chu, kô ön në anychīr chōn, nö ṙòngtö ṙòng òliv, hēk vāin nö ṙòngtö ṙòng anychīr? Ötrēhĕn nö kô ngih mai nö hĕnghöre kuchik.

¹³Achīö öp in yīö tö-akaha, tö akaha ellōn inrē? Hökngen ò yēḵ nö hameuktö lanöökö inlahenre nö i vahīṙenre, holtö inyāichngö, öp aṅ im mikah.

¹⁴Yē yīö pöri aṅhaṅv ellōn tö töchōich kumnyahṙen, linā-al inrē, ui eū-eure, ui minyôinyaṅ inrē im kanô-en,

¹⁵Rö-ö an angū-ö mikah nö ṙameū-eung lātulöng,aṅ ing panam pöri, aṅ i töṙeūla, aṅ i sī-ö.

¹⁶I chūök ngam kumnyahṙen, linā-al inrē, in e ap kintöngen, tömūmu la-en inrē.

¹⁷Ngam mikah pöri ṙamā-ang lātulöng nö hanëtö raneh, lanāmen, hēk ṙanēmen, tövanë-enkūö, tööḵlö tö miṙēlōn, tölöök la-en inrē, öt īnu tö intölten, innyatkö elmat inrē.

¹⁸Ngaich ngam kulöl lanöökö nö teūichtu nö im lanāmö tö cha yip vamī lanāmö.