Read Car_Nicobarese YĀKÖP 5 Bible Online

YĀKÖP 5 - Car_Nicobarese bible

YĀKÖP 5

¹Kuṙòh töngamuh, yī-ö tökôlò, peuny yin, ayôken minë ötkanôlòre yin, minë tö teungtöre nö i kui yīö.

²Chahū-uyö nun minë kanôlò yīö, kāti nun minë hilā yīö tö kamlökö.

³Yëichngö nun minë humlum yīö, minë rupīö yīö inrē; ngaich nup yëich u min nö minkahngö fālen yīö, ngaich kāngö minë alaha yīö nö sā kūö tameūyö. Hamūllö nup kanôlòre yin ngaich söl i manā-aṅ sakāmö.

⁴Yĕh meuk nup ṙô yip mahamūl nö el panô-òṅ yīö nö hūkö raneuhösre tö nup tö hachīliṙen tö yīö: ngaich öp ṙô yip mahamūl nö hū-a nö meūt höt nö elnang ngam Mā Tēv yip tö maṙôngö.

⁵Iyöng i tanë-eṅ yin ing panam, kumchikngenre inrē; ha-òknyö ellōnre yin nö höng öp hē linòkhanga.

⁶Asaichhanga yin ngaich, ngaich tī yin fëlngö ngam tölöök; öt laklöre anga-aṅ tö yīö.

⁷Kahōlö, hamöitöre yin tölngö ip yanihih ngam Mā. Yĕh meuk ngam töpanô-òṅvö nö hökkö tölöök ṙòng aṅ ngih panam, pò Ò nö möi nö in e, hanöng saha öp manā-aṅ kumṙah.

⁸Hamöitöre yin yī-ö inrē; haköptö ellōnre: tön röhta yanihih an ngam Mā.

⁹Kahōlö, un uyëku in höö, hòṅ yīö min öt kahòkkaṙen: yĕh meuk ngam kamhôṅka, nö sökhaka nö i kūö minë inkūp.

¹⁰Kahōlö, kēḵ yik pròfĕt yin, yik töṙô-òv nö i mine-eny ngam Mā, nö insā kanihngen manöiyö inrē.

¹¹Yĕh meuk, tökôlò yin vē kameun, tö ṙô hī: ngaich yin hang manöinyö Yōp, ngaich meuk manā-aṅ tī ngam Mā, tö ngam Mā nö tötööḵlö tö miṙēlōn, tööḵlö inrē tö neūkölōn.

¹²Kahōlö, möthë tö taṙòkhöre, un chūökkūṙô, un rēhĕn nö im halīöngö, un rēhĕn nö im panam, un rēhĕn nö i töng chūökṙô: hökngen ap tö hôṅ pöri in yīö nöng tö hôṅ, öp tö hö-ö inrē in yīö nöng tö hö-ö; hòṅ yīö öt fuk elkatòh ngam kinṙôka.

¹³Tökihngenvö hòng in yīö? Hökngen ò nö vë-ekūötēv. Töṙāmūlōnvö hòng in yīö, hökngen ò nö ha-öiny.

¹⁴Tövahav hòng in yīö? Hökngen ò nö havëkö yip mahaköhöti aṅ ngam Māṅ; hökngen cha nö ve-elkui ò, hacham alaha ò tö tavī-i nö i mine-eny ngam Mā:

¹⁵Ngaich ngam vine-eṅkūötēv aṅ im ṙinātö ellōn min nö yöölentī tö ò ngam tövahavö, ngaich hachohlen ò min ngam Mā: aṙēlöngö min anga-aṅ tö nup tököölre, yē ò nö kēken tökööl.

¹⁶Lökten yin ve-eny tököölre in höö, kö ve-elkui höö inrē, hòṅ yīö min lööken. Pōyen taneūngen an ngam vine-elkui ṙô ngòh tölöök tarik.

¹⁷Tö sā hī ök misī Ĕlaicha nö tarik, ngaich kalē-ĕṙô nö vë-ekūötēv, nö sōḵngen e nö kumṙah; ngaich chumngëṅtö angū-ö nö öt kumṙah nö ing panam.

¹⁸Hēk anga-aṅ nö vë-ekūötēv; ngaich kumṙah ngam halīöngö, ngaich ṙôngu aṅkūö ngam panam.

¹⁹Hol chu, yĕn hĕng tak tölō-ongkūö aṅ in yīö, nö ṙā-ang im kanô-en, ngaich hĕng tak öp mahavanten ò:

²⁰Hökngen ò yēḵ nö akahalōn; tö ò ngam mahavanten ò nö ngam tökööl fālen, nö ṙā-ang im tövaich talöökö ò, nö yöölentī tö töhĕng tak nö ṙā-ang im kinpaha, ngaich pōyen hanyatngö tö tökööl.