Read Car_Nicobarese 1 PĪTÖR 1 Bible Online

1 PĪTÖR 1 - Car_Nicobarese bible

1 PĪTÖR 1

¹Pītör, tanīnöṙô Yēsū Kristū, löö i yip töparāti mi-iyöng Pòntös, Kalatī, Kapatosiā, Āsi; Pitāniā inrē,

²Sā ngam mu-urĕh inkaha aṅ im Tēv ngam Yöng, i inhethölö tö ngam Töhet Fanöinylö, nö im ötminôṙô ngam kinchenytö mahām Yēsū Kristū inrē: inlōnti yēḵ in yīö, lanāmö inrē nö ṙūöhlöre ṙôken.

³Tökôlò an yēḵ ngam Tēv, ane inrē Yöng, ngam Mā hī Yēsū Kristū ngam tö sā ṙôkö öp neūkölōnre nö kayôḵnyen hī im tö aṅ mineūka, lökten i invanlö Yēsū Kristū nö ṙā-ang i tökapah,

⁴Nö im amin töt chahū-uyö, töt hamūmiyö inrē, töt chōichngöre inrē, hinöngken yīö el halīöngö.

⁵Ngam lökten i minhôiṅyö ngam Tēv lökten im ṙinātö ellōn im inyööken tölēn, nö hameuktu min ip manā-aṅ ṙētak.

⁶Ngam chūök yīö pōyen ṙanāmölōn, pòrô öi töngamuh rahëichhangkūö, yĕi hōtuvö, öi miṙīvilōn i tö ṙōlkangen kinlaha,

⁷Hòṅ ngam inmeuktö ngam ṙinātö ellōn yīö nö mötlö lanöökö tö humlum nup tö ṙöichngö, pòrô nö kalaha tö tameūyö, nö kôti min nö ineū-euṅ, nöinyö; kanôlò inrē, ip inmeuktö Yēsū Kristū:

⁸Ngam hanāngenlōn yīö, öi höng öt meūkan, ngam chūök yīö pōyen ṙanāmölōn tö ngam töt vanënyen tötööḵlö kanôlò, pòrô yī-ö töngamuh öt meūkan, sön höng ṙātö ellōnre:

⁹Teūngen ngaich tö tölngö ngam ṙinātö ellōn yīö, ngam inyööken nômö yīö.

¹⁰Ngam inyööken tö chöhö tö yik pròfĕt nö haṙēmngenre, yik mu-urĕhnyô tö ngam inlōnti yamih nö in yīö:

¹¹Chöh ṙētak, hēḵ inlahen öp ṙētak ngam Töhet Fanöinylö Kristū nö in u nö asōkhöti, hē e nö urĕh nö hameuktö kanihngen Kristū, nup tamömrit e inrē kanôlò.

¹²In cha nö hameuktu angū-ö, öt höng meukṙen cha-a tö u, tön meukṙen yīö, tö u nup tövënyu töngamuh nö in yīö, nö löktö i ṙô yip ma-ahangkö ngam tölöök inhānga nö in yīö, lökten im Töhet Fanöinylö tö tīntu nö ṙā-ang el halīöngö: nup lōn yip ma-ahānga nö hòṅ meuk.

¹³Lökten yin nyëklö ṙat nup ellōnre, ui saṙākiṙen ṙātö ngam maheūṅkkö yīö nö teung nö im inlōnti, ngam tökētu min nö in yīö, hē öp inmeuktö Yēsū Kristū:

¹⁴Sā nyīö tötminôṙô, öt haṙongtöre öi sā nuk raneh tötlöök lōn, hē öt mikah yīö misī:

¹⁵Sā Ò pöri Anga-aṅ ngam mahavëten yīö nö töhet, ngatī yin yēḵ yī-ö het inrē i nup taṙòkhöre inlaha yīö,

¹⁶Sā kinūichngö e nö ngö, Töhet yin min yi-ö; pô Chu Chu-ö Töhet.

¹⁷Ngaich yē yīö sā ṙôre tö yöng havëken Ò, ngam kamhòkken tarik nö öt atölluṙen, nö kö asā inlahen la-en tarik, keuheūtngö ngam ṙētakre öi iyöng i pinhe-eṅkūö:

¹⁸Akah töheichlōn tö yīö öi töhavaha, öt ṙāitö töchahū-uyö rupīö hēk humlum, öi ṙā-ang i nuk chanök alaha inlahen yīö tökētu nö ṙeū-eungrit yik muvöhngö yīö:

¹⁹Ṙāitö mahām pöri töpōi ṙāi tö sā öp pököre öre töt chanôchu töt mirūnuvö inrē, ngam mahām Kristū.

²⁰Ngam tö ha-ëhelen inkaha misī nö kô, urēhĕkūö ranehlö ngih panam, ngaich pöri nö hameuktu i manāngen nuk ṙētak tö pòkūö yīö,

²¹Yī-ö lamökten in Ò ṙātö ellōnre im Tēv, ngam mahachohlen Ò nö ṙā-ang i tökapah, ngaich kētö kanôlò Ò; hòṅ ngam ṙinātö ellōn yīö tö ngam mineūka inrē, nö im Ṭev.

²²Yĕh meuk tö yīö ngaich ahetlö yip ma-alahare im öt inhôngen ngam kanô-en i ngam töt höng tötöl hanāngen yīö tö holre, hāngenlōn tö höö löklö ellōnre nö kalēḵ:

²³Pò yīö hēk ngaich fötnyu, öt aṅ im töchahū-uyö kulöl, aṅ im töt chahū-uyö pöri lökten im ṙô ngam Tēv, ngam tö aṅ, tö köp inrē.

²⁴Pòn, Ṙòkhöre në alaha nöng kiyôp, Ṙòkhöre nup vanā- yö u nöng sā panöpnyòng kiyôp. Nyangngö ngam ki- yôp, sukngöre ngaich ngam panöpnyòng e:

²⁵Köp pöri ngam ṙô ngam Mā nöng örheūheu. Angū-ö ön ngih ṙô tölöök inhānga, ngam tö ahangtu nö in yīö nö ngaich.