Read Car_Nicobarese 1 PĪTÖR 2 Bible Online

1 PĪTÖR 2 - Car_Nicobarese bible

1 PĪTÖR 2

¹Lökten ṙāngö nup taṙòkhöre öt lanöökö, nup taṙòkhöre inchīlö, nup taṙòkhöre innyatkö elmat, nup kumnyah elmat, ṙòkhöre inrē nup tötlöök ṙô,

²Sā tufömnyöre fötö tëṅnö nyīö, ngam töt īnu tö inchīlö, hòṅ yīö löklen in e sīöplö im inyööken;

³Yē yīö ngaich kalah kumchik neūkölōn ngam Mā:

⁴Yī-ö töyihiv, tö-aṅ ihong, kô-òngrit nö tösōḵov tö tarik, i yip katöllö ngam Tēv pöri, nö töpōi ṙāi,

⁵Yī-ö inrē, sā tö-aṅ ihong, öi mānlöngö i ngam aṅ i töhet patī, öi töhet, mameukṙen, öi kētö aṅ i töhet tökētu, töhōḵov tö ngam Tēv lökten Yēsū Kristū.

⁶Pò e nö i mat ngam töhet līpöre Yĕh meuk, ṙātö ihong chin yöngkūö sinkeukngö i Siyôn, tökatöllöng, töpōi ṙāi; ngòh ṙamātö ellōnre nö in Ò öt sumrōngikūö min.

⁷In yīö an yī-ö ṙamātö ellōnre, ngam panôi ṙāi: i yip töt ṙamātö ellōnre pöri, ngam ihong tösōḵovö, tö yip manānö, anga-aṅ tövītu nö yöngkūö sinkeukngö,

⁸Ane inrē, Kinvē-ĕre nö ihong, lökngövah töfukngö inrē nö ihong. Pò cha nö kavē-ĕre kūö cha nö ahôngen ngam ṙô, im chūök cha-a inrē nö vītuṙen.

⁹Mumātö pöri yi-ö öi tökatöllöngö, mineukṙen aṅ im Mā, töhet tarik, tarik öi amin ngam Tēv, pò yīö hōtu hameuktö lanöökö Ò ngam mahavënyen yīö ṙā-ang el sinngūlö, öi im pinngangkūö hanātö:

¹⁰Yī-ö tö rö-ö sin misī tarik, ngaich pöri öi tarik ngam Tēv töngamuh: töt teūngen sin tö inṙē-ĕl, ngaich pöri teūngen töngamuh tö inṙē-ĕl.

¹¹Kahōlö; hōten yīö chin yī-ö kumröönngöre ane inrē töt aṅhih, ṙāngö nup lōn alaha, nup kumyung nö lā-al ngam ma-alaha.

¹²Hökngen ngam inlahen yīö nö löök nö i yip aṅ elkahôyö, hòṅ cha yip tötlööku ṙô tö yīö, nö hatīönken yīö, ngaich haköp i nup tölöök la-en yīö, ngaich ha-öiny ngam Tēv im sakāmö chinöhkö.

¹³Hang chöngö vahī-il tarik, im Mā Tēv, yē e nö ip rācha nö lamātulöng;

¹⁴Hēk i yip kamhôṅka tötīntu tö Ò, nö öthakôlò yip tötlöökö la-en, ane inrē kūö ineū-euṅ cha yip tölöökö la-en.

¹⁵Pòn ngatī ngam lōn ngam Tēv, hòṅ yīö i nup tölöök la-en öi tahngö ngam ötmikah yip tötakaha tarik.

¹⁶Sā töṙānyuvö, ngaich öt hakeū ngam ṙinānyö nö innyatngö ötlanöökö; sā tö havaha pöri kūön ngam Tēv.

¹⁷Milēḵṙen tö taṙòkhöre tarik. Hāngenlōn tö māṅre. Pahe-e ngam Tēv. Milēḵṙen töm rācha.

¹⁸Yī-ö mahalanṙen, tumṙeūtöre yin tö yip yöngṙenre, holtö pinhe-eṅkūö: rö-ö nöng i yip tö-akaha töṙēm inrē tön i yip tömilô inrē.

¹⁹Töhōḵovö an angū-ö yĕn kūö kuilōn im Tēv, ngòh tarik nö kihngen, nöng ötrēhĕn nö fāluṙen.

²⁰Asuh ap öre ineū-euṅ e, yē yīö kūö fālenre öi hachökö, ngaich hökngenre yī-ö holtö manöiyöre? Yē yīö pöri la-evṙen tö tölöök, ngaich kihngen töpòkūö e, hökngenre yī-ö tö e holtö manöiyö, töhōḵovö an angū-ö nö im Tēv.

²¹Pòn angū-ö nö invëtö yīö, pò Kristū inrē nö kihngen töpòkūö yīö, ṙā-akūö yīö tö inchōten, hòṅ yīö tömköröön Ò.

²²Ngam tötköölö fālen: öt rēhĕn nö löknyuvö elvāng tö minyôinyaṅ.

²³Ngam tö ötlēka elnang, ngaich öt havahlô nö hēk; hē Ò nö kihngen, öt pinheṅ-elkūö Anga-aṅ; hökngenre pöri, nö im töhuveū-en Kamhôṅka.

²⁴Ngam tö aṅhaṅv alaha tö në tökööl hī, nö irōi ngam chōn; hòṅ hī ngaich tökapah, ṙā-ang ngam tökööl, aṅ pöri im lanöökö. Lööken yin ngaich, tökūö nuk finôhòh Ò.

²⁵Pò yīö, sā pököre, tö lō-ongkūö: havantöre pöri töngamuh im Yōm, ngam mameukkö nômö yīö.