Read Car_Nicobarese 1 PĪTÖR 4 Bible Online

1 PĪTÖR 4 - Car_Nicobarese bible

1 PĪTÖR 4

¹Pò Kristū nö ngaich nö kihngen nö im alaha, ngatī yin yēḵ yī-ö inrē kēḵ aṅtīre öi ngatī lōn; pò ngam tökihngen nö im alaha, nö ṙāngenre nö i tökööl;

²Hòṅ yīö öt ngöhören irô-òten nup ṙētak yīö im alaha, öi im tötlöök lōn tarik, i lōn ngam Tēv pöri.

³Pòn ngāichö rô-òten ngam linöökö lōn yip Tahëng mihëṅṙö nö ngaich, öi lök i yanālö tö tötlööklōn, yinikhanga, hinyōyö, inpōho tö nya-aṅ, inpōho tö ka-eūt, vine-eṅkūö nup sin-òkkūö insātēv inrē:

⁴Ngaich yī-ö töhëtölōn tö cha, pò yīö öt tömken cha i töngatī yanahlö tinṙōlen; chōchö ṙô cha-a tö yiö:

⁵Kētö kinṙötö yip min nö in Ò, ngam töng hamöktöre nö kahòkken tö-aṅ tökapah inrē.

⁶Ngaich angū-ö lökten ngam tölöök inhānga misī nö ahangka nö i yip tökapah, pòn hōtu cha-a nö kahòkkaṙen, nö sā vē tarik tö īnu tö alahare, sā ngam Tēv pöri nö aṅ im ma-alaha.

⁷Röhta an ngam manāngen në taṙòkhöre. Lökten yin yēḵ akaha, ṙēm inrē im vine-eṅkūötēv.

⁸Möthë tö u, öi kô-en hanāngenlōn inrē; tön hanyatngö nup töpōyen tökööl an ngam hanāngenlōn.

⁹Kö haṙūötken höö, un uyëku.

¹⁰Sā ap taneūngen ngòh tö hĕng tak tö inlōnti, hökngen ò nö kēkö e nö kanôlò yīö ṙòkhöre, sā yip tö-akaha yōm nup töṙōlkangen inlōnti aṅ im Tēv.

¹¹Yĕn tarīku tö ṙô-òv, hökngen ò nö ṙô-òv tö e nö ṙô ngam Tēv. Yĕn tarīku mameukṙen, sā ap kanô-òṅ kahëtö ngam Tēv. Hòṅ ngam Tēv nö hakūyiṙen i nup taṙòkhöre, lökten in Yēsū Kristū ngam tö kanôlòvö, ane inrē töchönguvö ör heūheu. Āmen.

¹²Kahōlö, uh an nö tötohhë tö lōn yīö ngam inlahen ngam tö tameūyuröön kinlaha yīö, ngam tameunghökui yīö nö kalaha yīö, nö sā tötohtöre lāinyngen nö in yīö:

¹³Ṙāmölōn yin sā yīö ngaich hamòl im kanihngen Kristū, hòn hē öp inmeuktö öp kanôlò Ò inrē yī-ö min pōyen ṙanāmölōn.

¹⁴Tökôlò yin, yē yīö sumrōngikūö tö kūö mine-eny Kristū; pò ngam Fanöinylö ngam kanôlò, ngam Fanöinylö ngam Tēv nö i kui yīö nö ngöh.

¹⁵Un hĕng tak tö yīö tö sā kanihngen famël tarik, hēk, mū-ulāiya, hēk, tötlöökö la-en, hēk sā yip töng kamëtöre nö i la-en tahëng taka:

¹⁶Un sirōngkūö an yēḵ ngòh tarik tö sā kanihngen Kristīön: hökngen ò pöri nö hapōilö ngam Tēv nö in e angū-ö mine-eny.

¹⁷Tön yih an ngam ṙētak kinṙôka nö rĕhlöngö nö el patī ngam Tēv: yē e pöri nö rĕhlöngö nö in hī, ngaich sitih manāngen min yip ma-ahôngô ngam tölöök inhangkö ngam Tēv?

¹⁸Yē ngam tölöök inrē nö öhngövah nö öt hayöökaṙen, ngaich isuh min yip tötlöök, tö yip tököölö fālen inrē nö meūkö?

¹⁹Lökten hökngen cha inrē yip tökihngen nö sā lōn ngam Tēv nö kētö nup nômöre i tölöök la-en, nö im tökô-en vamī-il.