Read Car_Nicobarese 1 PĪTÖR 5 Bible Online

1 PĪTÖR 5 - Car_Nicobarese bible

1 PĪTÖR 5

¹Lökten chin halēn yip mahaköphöti in yīö, chu-ö hamòl cha mahaköphöti, ane inrē mameuk kanihngen Kristū, chu-ö inrē hamòl im kanôlò tö hameuktu min:

²Haṙūötken minë pököre ngam Tēv, minë in yīö: harūnöre meukkö u, öt hanlīpö, kanahang lōn pöri, sā ngam Tēv pöri, un rēhĕn nö kūö taneūngen tö yô-òv, töhōḵ pöri nö lōn:

³Unrēhĕn hakeū chöngöre i minë minchöḵö meh hayōm meh, vītöre pöri me-eṅ inchōten minë pököre.

⁴Ngaich yē ngam yöngkūö më yōmpököre min nö hameuktu, teūngen yī-ö min tö sapīöv kanôlò töt pinheūmu.

⁵Ṙòkhöre yin öi nyëkṙatre tö ngam inyāichngö, öi kö meukṙen höö, tön lakngö mahakeūlenre an ngam Tēv; kēTö inlōnti pöri nö i yip yāich.

⁶Hayāichngöre yin lökten, elkatòh ngam tömihôiṅ kël ngam Tēv; hòn hapōilen yīö min Anga-aṅ, ip hē.

⁷Pehtö nup taṙòkhöre pinṙūtölōn yīö, in Ò; tön Anga-aṅ an töchumkūöṙen tö yīö.

⁸Hayöngöre yin: höngöre. Tön havötköre an ngam sī-ö, ngam tökunyahaṅ elmat tö yīö, nö sā ṙôktô lāyön, nö chöh ap kahā-angre.

⁹Anga-aṅ lahakngö yīö, haköpöre im mikah; akah töheichlōn yin tö u anū-ö kanihngen, nö kanihngen yīö, tö yip māṅ yīö inrē ing panam.

¹⁰Ngam Tēv, lökten taṙòkhöre inlōnti, ngam mahavëten yīö im tö-örheūheu kanôlò, in Kristū, Anga-aṅ min mahateungten yīö haköpö yīö, hangëken yīö inrē; unôichrit yīö rahëchtaṙen kihngen.

¹¹Minhôiṅyö Ò yēḵ örheūheu. Āmen.

¹²Rahëichyen tī chin ngaich kūichtö kum Silvënös in yīö, ngam tökô-en hol hī, sā ṙô chu eūken ò, halēn, hameukhöti inrē, tö ngih nö tökô-en inlōnti aṅ im Tēv: haköpöre yin sökhak in e.

¹³Salāmö yin tö ò, öp i Pēpilön, hol yīö tökatöllöng, ngatī inrē Mākös ngòh kūön chu.

¹⁴Salāmö höö yin holtö hināmökūö, aṅ im hanāngenlōn. Lanāmö yēḵ in yīö ṙòkhöre, yī-ö mi-in Kristū.