Read Car_Nicobarese 2 PĪTÖR 1 Bible Online

2 PĪTÖR 1 - Car_Nicobarese bible

2 PĪTÖR 1

¹Simōn Pītör, kūönkūö ane inrē tanīnöṙô Yēsū Kristū, löö in cha yip tö ngaichnö teūngen tö ngam töngatī töpōiṙāi ṙinātö ellōn nö hol hī, i lanöökö ngam Tēv hī ngam Mahayööken inrē Yēsū Kristū:

²Inlōnti yēḵ in yī-ö lanāmö inrē, nö ṙūöhlöng im in Yēsū inrē ngam Mā hī;

³Yĕh meuk ngam töhet minhôiṅyö Ò nö kē-ĕkūö hī tö taṙòkhöre tö aṅ i nômö, lanöökö inrē, lökten im inkaha Ò, ngam mahavëten hī, lökten im kanahngen Ò kanôlò, lanöökö inrē;

⁴Lökten Anga-aṅ nö kē-ĕkūö hī tö ngam töpōiṙāi, tökiröng kinlēḵngô; pò yīö hōtu lökten i në vītöre hamòl im töhet inlaha, öi ngaich ötkô-òngvah tö kūö nup tötkôlò ing panam, kūö tötlöök yinikhanga.

⁵Hôṅ, kūö e takô angū-ö, ṙūöhtuṙen tö yīö ṙòkhöre nup ṙanëmen, im ṙinātö ellōn yīö, kētö lanöökö; ane inrē im lanöökö yīö, mikah;

⁶Im mikah yīö, ṙināpöre; im ṙināpöre manöiyö; ane inrē im manöiyö yīö, lanöökenṙen;

⁷Ane inrē im lanöökenṙen, hanāngenlōn tö holre; hanāngenlōn, im hanāngenlōn tö holre:

⁸Pò në yē u nö amin yīö, nö pōyen, ngaich öt vīten yīö anū-ö öi ṙahata, öt rēhĕn öt ṙônguvö im mikah aṅ im Mā hī Yēsū Kristu.

⁹Pò ngòh töhāṅten tö u nö tötmeuk, höng meuk töng röhta, vaichngenre tö inhetlöre nö ṙā-ang i nup höteh tököölre.

¹⁰Lökten, kahōlö, haṙūöttökūöre öi vīten ngam invëkö yīö, kintöllö yīö inrē, nö köp.

¹¹Pōyen mineukten yin min tö lökhötre im tö örheūheu pūlngö ngam Mā hī ane inrē mahayööken, Yēsū Kristu.

¹²Lökten chin min örheūheu höngöre kētö fineḵlö yīö tö u, pòrô öi tö-akahalōn ngaich tö u, ngaich inrē öi köpngö im kanô-en ngam mi-in yīö.

¹³Töhuveū an tö lōn chu, isaha rô-òten chu el ngih inrūkui, öich haruhu yīö, öich kētö finëḵlö yīö;

¹⁴Pòich akahalōn tö ṙinòngngö ngih inrūkui, nö veūten yanihih, sā ṙô ngam Mā hī Yēsū Kristu nö hameuktö e nö in chu.

¹⁵Hôṅ, hòṅ haṙūöttökūöre chin hòṅ yīö min örheūheu kô-òren, unôichrit kinpaha chu, öi fē-ĕlre tö u.

¹⁶Pò hī öt höng tömken tö milichngen inlēnö inchōḵoṙô, hē ih mikahtölōn yīö, tö ngam minhôiṅyö ane inrē yanihih ngam Mā hī Yēsū Kristu, tön tökôta mat pöri mameuk aṅ i minā-aṅ in Ò.

¹⁷Pò Ò nö kēḵ aṅ im Tēv ngam Yöng, ineū-euṅ kanôlò inrē, hē ök ṙô nö löö in Ò ṙamā-ang im tölngö kanôlò, Hanāngenlōn Chu ön ngòh nö Kūön Chu, in Ò Chin ṙamölōn takô:

¹⁸Hāngö e in īhö nö ṙô nö ṙeū-eung el halīöngö, hē ih hol Ò i kui ap töhet rôngö.

¹⁹Ngaich aṅhaṅv-in tö ngam ṙô aṅ im minkahten, nö haköpi, ngaich yin yī-ö huveū-en öi haṙēmngenre, sā öp töhūkūö ëāṅvö nö el sinngūlö, hanöng saha minlīlö öp sakāmö, ngam misaha inrē nö meutlö nö ellōn yīö:

²⁰Akahalōn tö ngih urĕh, tö törö-öv ṙô aṅ im töhet līpöre, nö tö-ulāikaṙen manah.

²¹Pòn öt ṙô-òvö tö hĕng nö yih nö lökten i lōn tarik: lökten im Tēv pöri tarik nö ṙô-òv, pòn halöinyka tö ngam Töhet Fanöinylö.