Read Car_Nicobarese 2 PĪTÖR 2 Bible Online

2 PĪTÖR 2 - Car_Nicobarese bible

2 PĪTÖR 2

¹Chahōklöng pöri yik töminyôinyaṅ, pròfĕt inrē nö i yik tarik, sā yip in yīö min inrē töminyôinyaṅ mahaköphöti, yip mu-ulāitötīre min nö kēhöt inrēvngö nö pumyāihanga, mahngö mahaköphöti ngam mahavaha cha, kētö kuire cha-a tö ngam töveut pinyāingö.

²Maṙôngö min yip tamömken cha i nup vahīṙen cha tötlöök yinikhanga; lökngen cha min ngam talöökö kanô-en nö öt löökö elnang.

³Im yinikhanga min cha-a nö holtö inchīl ṙô ngaich vīten yīö tö-inyihka: yip tö inchöku ha-eheten misī nö öt sökngöre, öt haṙòhlö öp pinyāingö cha.

⁴Yē ngam Tēv nö öt aṙētö yip ma-ahānga yē cha nö köölö fālen, sukten cha pöri nö el chūök öt inkôlò, ngaich kēten cha nö el sinngūlö nup tö ūlö mak, nö hanööngen öp kinṙôka;

⁵Öt aṙētö ngam panam misī, ha-aṅha Nō-a pöri nö holtö yik tahëng tö sat tak, ma-ahangkö lanöökö, hē Ò nö kētö ṙanööingö yik tötlöök nö i kūö ngam panam;

⁶Ngaich vīten nuk elpanam Sôtöm, Kômòra inrē nö tisum, hukavalhang tö cha nö öthakôlò cha, vīten cha nö inmeukhömat cha yip tö hòṅ iyöng ötlanöökö;

⁷Ngaich ṙānyö ök tölöök Lòt, töpōyen kanihngen tökūö yinikhanga, inlahen yik tötlöök.

⁸(Pò ngam tölöök tarik nö iyöng in cha i mineūkö, hināngö inrē, kihngen ellōn nö öt hĕng hang sumkam nö i nuk tölöök la-en cha):

⁹Huveū-en an ngam Mā nö ṙānyö tölöök nö ṙā-ang i kinlaha ngaich ṙātö tötlöök nö elkatòh ötinkôlò, söl ip sakāmö kinṙôka;

¹⁰Möthë tö cha yip lamök im alaha yinik hanga inchōichngö, ngaich öt kūöngen tö minā-aṅ. Töt pinheṅevkūö, tamömrit kuilōnre, öt kacheihë cha-a nö ötlēkôre tö kanôlò:

¹¹Ngaich pöri yip ma-ahānga, pòrô nö aṅhaṅv-in tö kumlēḵ minhôiṅyö inrē, nö öt kētö ötlinëkö inkaha nö lā-al cha nö i kūö ngam Mā.

¹²Cha-a pöri vē, tö sā töṙeūla töt chanöhöv ellōn, fötnyu nö nehngenre, töng kē-ĕ ngaich fëliyö, ötlēkôre tö u nup tötmikahkūö cha, i nup töchōich in cha min, cha-a nö kô-òngvah nö fëli,

¹³Vāichö kanihngen pòn kūönkūö tövaich la-en; vē tarik kamheuṅktö e nö kumchikṙen nö hapōhore tö sakāmö, pitōt, tö paṙòk inrē, hapōhore i nup nyinā-aṅ i hanāngenlōn, isaha cha nö holkūö yīö nö im nyina-aṅ;

¹⁴Höng matnyöre tö tötööḵlö tö insĕha, öp tötkô nö ṙā-angre nö i tökööl; hachōḵngen yip töng öt köp tarik, ellōnu tö töharūnö nö im yinikhanga; kūön ramūtngövah;

¹⁵Ṙā-ang tö ngam töhuveū tölöök, ngaich lō-ongkūö, cha-a, tömken Pēlam ök kūön Pī-ōr, ök tö hāngenlōn tö raneushö tövaich la-en;

¹⁶Ve-ev pöri anga-aṅ tö kūö ök tötlöök fālenre: sā ṙô tarik ök töt huveū-euṙô köttö nö ṙô-òv nö asökngö kumlō-ov ök pròfĕt.

¹⁷Löklö mak nun anū-ö nö töt aṅhaṅv tö mak, pinṙeūmö tökūö chanôichö; pòkūö cha ngam tösah sinngūlö nö höngkaṙen.

¹⁸Pòn ṙônyö nup tökiröng ṙô, töföh chanöh alaha, ngaich haṙöinyö nup tötlööklōn alaha, lökten im tötlöök yinikhanga, ngaich cha-a yip tölöök nö öt kô-òngvah nö in cha yip mi-iyöng tövaich;

¹⁹Kilēḵngôre tö öt inkövö cha, yē cha cha-a nö kūön alaha inkövö töchōich; öp töt kô-òtī tö tarik, kūö e anga-aṅ inrē nö kēhötvö nö elkatòh inkövö.

²⁰Pò cha yĕn hēk nö vönngö nö in e ngaich kô-òngvah, unôichrit ötkanô-òngvah cha tö kūö nup inchōichngö aṅ i panam, nö löklen im mikah cha nö im Mā Mahayööken Yēsū Kristu, ngaich ngam manā-aṅ lainyngen cha nö höichngen tö ngam mu-urĕh.

²¹Pòn ĕhten öre cha-a yĕn öt akahakūö tö ngam talöökö lanöökö, tö cha nö ngaich nö akahakūö tö e, ngaich hapungtö ukre nö ṙā-ang im töhet chöngö tökētu nö in cha.

²²Teungten an nö in cha nö sā ngam tökô-en inchōḵoṙô, Havantöre an ngam am nö im kuvavre, ngam yöng ha-un inrē tö keuheūtö sinöichö, kiyu-öre nö el tilin.