Read Car_Nicobarese 2 PĪTÖR 3 Bible Online

2 PĪTÖR 3 - Car_Nicobarese bible

2 PĪTÖR 3

¹Kahōlö, innëtö līpöre ön ngih töngamuh kahūichtö chu in yīö; i mat u nö nëtre öich harunlö nup tökô-en ellōn yīö, i finëlö yīö;

²Hòṅ yīö köpölōn tö nuk ṙô, nuk töngaichngen misī ṙô yik töhet pròfĕt, ngam chöngö ngam Mā inrē ngam Mahayööken, nö lökten yik tanīnöṙô yīö;

³Akahalōn tö ngih urĕh, tö yik mahayëk, i nup manā-aṅ sakāmö nö kumtö inyëḵngen, nö lök i nup kanahngenre tötlöök lōn;

⁴Nö ngö ṙô, Isuh ap kinlēḵngô yanihih Ò? Tön höng iṙūöhen nun në taṙòkhöre nö sāre misī tö ranehlö vinī-il u, hētentö yik muvöhngö hī nö kapah.

⁵Pòn tölngenre cha-a nö vaichngö tö minë halīöngö nö ha-ehelen misī, ngaich misī, ngaich ngam tumlat nö mullöre nö ṙeū-eung el mak, tö kūö ṙô ngam Tēv;

⁶Ngaich kūö e ngam tö ngaich nö panam, nö ṙööingö tö kūö mak, ngaich lëlngö:

⁷Minë halīöngö pöri tö ōtre töngamuh, tö ngam tumlat inrē, nöng kūö e angū-ö ṙô, nö ngaich nö hanöng tö tameūyö nö halēni, höngkö öp sakāmö kinṙôka, öp ötinkôlò yip tötlöök tarik inrē.

⁸Kahōlö, uh yin pöri vaichngö tö ngih tö hĕng tö ngam tö hĕng sumkam nö im Mā, nö sā tököṅnyu samyeūheu anë inrē ngam tököṅnyu samyeūheu nö sā tö hĕng sakāmö.

⁹Öt höhölōn an ngam Tēv tö ngam ṙôre kinlēḵngô nö sā yip rīkre kamheuṅktö hanöhölōn, tön marôta manöiyö an nö in yīö, öt hōten yīö hĕng hang tak tölëlngö, hōten yīö pöri ṙòkhöre yihtöre im invöötö ellōn,

¹⁰Sā mū-ulāiya pöri min ngam sakāmö ngam Mā nö yih; hē e min minë halīöngö, nö changāichi nö hol tö yöngṙën ṙô ngaich payööyi nup alaha u tö kūö öp tökalē-ĕkūö ṙanāichö, ngaich ngam panam tö nup vahīṙen in e nö ṙāpngö min.

¹¹Meuk öm pöichö tö në nö ngatī nö ṙòkhöre nö piyööyi, hòṅ sitih inlahen öi yī-ö tarik öi i nup töhet, nup lanöökö inrē,

¹²Kalē-ĕ ellōn hönga, ane inrē meūkkö ngam sakāmö ngam lökngen minë halīöngö min nö ikūö tameūyö nö piyööyi, ngaich min minë aṅ ngam halīöngönö yëngö tökūö öp tökalē-ĕkūö tameūyö.

¹³Meūkkö minë tufömngöre pöri ayī-ö halīöngö, tufömngöre inrē tumlat, minë chūök lanöökö, nö iyöng sā ngam kinlēḵngô Ò.

¹⁴Lökten, kahōlö, yĕh meūköre öi höngö u anū-ö, haṙūöttökūöre hòṅ yīö min kôti im lanāmö, öi öt mirūnuvö, öt chnôichu inrē ikūö Ò.

¹⁵Kaṙötngö e inrē hòṅ ngam tömarôta manöiyö ngam Mā hī nö inyööken; sā tī ngam hanāngen hol hī Pôl inrē, nö kūichhöti nö in yīö, sā ngam mikah kinë-eṅkūö ò;

¹⁶Sā mat nup kahūich ò līpöre, nö ṙô tö u nö i mat u; i mat u nup inrē tö kihngen inkaha, nup kahil yip töt akaha, tötköp inrē, sā cha ṙung nö i nup tahëng töhet līpöre, nöng öt hakôlòre.

¹⁷Kahōlö, haṙēmngenre yin, yī-ö öi tö ngaich akahalōn, hôiṅ öt kē-ĕyö öi kum vanāichö yip tötlöök, hòṅ yīö öt fukngö ṙā-ang im kanöpö yīö.

¹⁸Sīöplö pöri im inlōnti ane inrē inkaha ngam Mā hī Mahayööken hī inrē Yēsū Kristū. Kanôlò Ò yēḵ, hĕnghöre töngamuh örheūheu inrē. Āmen.