Read Car_Nicobarese 1 YÔHAN 2 Bible Online

1 YÔHAN 2 - Car_Nicobarese bible

1 YÔHAN 2

¹Yī-ö kun kūön chu, në nun kahūichtö chu in yīö, hòṅ yīö öt köölö fālen. Ngaich yĕn tarīkuvö tököölö fālen, vamëlukui in im yöng tö Yēsū Kristū ngam tölöök;

²Anga-aṅ An inlāmö nup tökööl hī; öt höng kūö nup tökööl hī tön nup tökööl ngih panam nö ṙòkhöre.

³In e lökten in akahalōn tö hī akahakūö tö Ò, yē hī haköp në chöngö Ò.

⁴Anga-aṅ ngòh tö ngö ṙô, Akahakūö chin tö Ò, ngaich rö-ö nö haköp në chöngö Ò, töminyôiny an anga-aṅ, öt in ò ngam kanô-en inrē:

⁵Öp mahaköp ṙôre pöri, in ò an nö kô-en nö teungten ngam hanāngenlōn ngam Tēv. In e in akahalōn tö hī öi in Ò:

⁶Ngòh ameūköre nö köp nö in Ò, anga-aṅ inrē tö hòṅ vāngngöre, nö sā ngam röön Ò anga-aṅ nö vāngngöre.

⁷Kahōlö, öt kūichtö tufömngöre chin chöngö in yīö, tön höng ngam höteh ngam in yīö nö ngaich hēten tök raneh: ngam höteh chöngö, angū-ö an ṙô ahang yīö ngaich.

⁸Hēk, hĕng öp tufömngöre chöngö kakūichtö chu in yīö, ngam tökô-en nö in Ò, in yīö inrē; pò ngam sinngūlö nö chuhngöre, ngaich ngam tökô-en ëāṅvö nö ha-ehelen nö hū.

⁹Anga-aṅ ngòh ameūköre nö i kūö ëāṅvö, ngaich surīkhö holre, ṙòngmö el sinngūlö an anga-aṅ ing töngamuh.

¹⁰Anga-aṅ ngòh töhāngenlōn tö holre köp nö i kūö ëāṅvö ngaich öt löktu ngam kinvē-ĕre nö in ò.

¹¹Anga-aṅ pöri më-el sinngūlö ngòh tö sumrīk tö holre, lök el sinngūlö inrē, öt akahakūö inrē tö kū-öre, pò ngam sinngūlö nö tilupngö nup mat ò.

¹²Kūichhöti chin in yīö, yī-ö kun nyīö, pò nup tökööl yīö nö aṙēlöngö, tö kūö minë-eny Ò.

¹³Kūichhöti chin in yīö, yī-ö inyöngö, pò yīö akahakūö tö Ò ngam mī-im raneh. Kūichhöti chin in yī-ö ṙāl tarik, pò yīö ngaich mihôiṅ töm tötlöök. Ngaich tī chin kūichhöti in yīö, yī-ö kun nyīö, pò yīö akahakūö töm Yöng.

¹⁴Ngaich tī chin kūichhöti in yīö, yī-ö inyöngö, pò yīö akahakūö tö Ò ngam mī-im raneh. Ngaich tī chin kūichhöti in yīö, yī-ö ṙāl tarik, pò yīö kalēḵ, ngaich ngam ṙô ngam Tēv nö köp nö in yīö, ngaich yī-ö inrē mihôiṅ tö ngam tötlöök.

¹⁵Uh yin hāngen töng panam, un rēhĕn tö nup chehen aṅkūö ngih panam. Yĕn tarīkūvö töhāngenlōn töng panam, öt in ò ngaich ngam hanāngenlōn ngam Yöng.

¹⁶Pòn ṙòkhöre nup aṅ ngih panam, töchōich lōn alaha, töchōich lōn minë mat, tötöl inrē kanôlò ngih nômö, nö öt aṅ im Yöng, aṅ ing panam pöri.

¹⁷Ngaich ngih panam nö chuhngöre nö holtö nup töchōich lōnre: anga-aṅ pöri ngòh töla-evṙen tö lōn ngam Tēv köp nöng örheūheu.

¹⁸Yī-ö kun nyīö, manā-aṅ ön ngih ṙētak: sā ahang yīö ngaich töp töminyôiny Kristū nö yih, pōyen yip ing töngamuh sumlòklöre töminyôiny Kristū; lökten in e in akahalōn tö e nö manā-aṅ nö ṙētak.

¹⁹Kiröönngöre yik nö ṙāngen hī, rö-ö pöri sin cha-a nö aṅ in hī; ngaich öre cha-a nö iṙūöhen nö in hī, yē cha nö aṅ in hī: kiröönngöre pöri cha-a nö ngaich, hòṅ cha nö hameuktu, tö cha nö öt ṙòkhöre nö aṅ in hī.

²⁰Ngaich yin yī-ö inchāmu elkui tö aṅ im Töhĕng Töhet, ngaich yin akahalōn tö taṙòkhöre.

²¹Rö-ö chin kūichhöti in yīö nö pò yīö öt akahalōn töm kanô-en, tön pò yīö akahalōn tö e, pòn öt aṅ im kanô-en ngam minyôiny inrē.

²²Achiāp töminyôiny? Tön höng anga-aṅ ngòh mamahngen Yēsū nö Kristū. Anga-aṅ an ngòh töminyôiny Kristū, anga-aṅ ngam mamhangö ngam Yöng töm Kūön inrē.

²³Öp mamahngö ngam Kūön, anga-aṅ töt aṅhaṅv-in töm Yöng: anga-aṅ ngòh mahalööknyôre töm Kūön īnu töm Yöng inrē.

²⁴Yī-ö pöri, hökngen e nö köp nö in yīö, ngam ahang yīö löktökūö ik raneh. Yē e nö köp nö in yīö ngam ahang yīö ik raneh, köp yī-ö min inrē im Yöng inrē.

²⁵Ngih ön yih kinlēḵngô, ngam tökilēḵĕyö nö in hī, angū-ö ngam nômö tö-örheūheu-aṅ.

²⁶Ngaich tī chin kūichtö u nö in yīö, i inlahen cha, yip tö hòṅ halō-ongkūö yīö.

²⁷Yī-ö pöri, köp an nö in yīö ngam taneūngen yīö incham elkui; öt kusīkten inrēngöre yin mahaköpten yīö; sā ngam incham elkui pöri tī Ò nö haköpten yīö tö inlahen nup taṙòkhöre, ngam tökô-en, hö-ö nö minyôinyaṅ, sā inköptö yīö tö e, haköpöre yī-ö in Ò.

²⁸Yĕh pöchö, yī-ö kun kūön chu, haköpöre in Ò; hòṅ hī tayāchaṙen, öi öt sirōngkūö i kūö ò, hē öp yanihih Ò, yĕn hameuktu min Anga-aṅ.

²⁹Yē yīö akahalōn tö Ò nö tölöök, akahalōn yī-ö ngaich tö ò inrē ngòh tövahī-ivṙen tö lanöökö, aṅ in Ò finötnyi anga-aṅ.