Read Car_Nicobarese 1 YÔHAN 3 Bible Online

1 YÔHAN 3 - Car_Nicobarese bible

1 YÔHAN 3

¹Yĕh meuk ṙôkö hanāngenlōn ngam Yöng tö hī i invëkö hī öi kūön ngam Tēv; ngaich kô ayī-ö. Angū-ö an lökngen ngih panam nö öt akahakūö tö hī; pò e nö öt akahakūö tö Ò.

²Kahōlö; ngaich in töngamuh kūön ngam Tēv; öl an nö hameuktu, ngam insā hī min. Akahalōn pöri ayī-ö yē Ò min nö hameuktu, ngaich sā Ò ayī-ö; pô hī min meūkan, nö sāre.

³Ngòh töngatī maheūṅkka nö in Ò, ahetlöre anga-aṅ, sā Ò Anga-aṅ nö het.

⁴Ṙòkhöre vē tököölö fālen, nö falālö tī töm chöngö; pò ngam tökööl nö finlalngö chöngö.

⁵Ngaich akahalōn yī-ö tö Kristū nö hameuktu nö kamëngö tökööl; öt īnu An Anga-aṅ tö tökööl.

⁶Ngòh töngngöh nö in Ò, öt köölö fālen. Ngòh tököölö fālen öt meūkan, öt rēhĕn nö akahakūö tö Ò.

⁷Yī-ö nyīö, ui hökngenre halō-oikūö tö tarik. Tölöök ön ngòh tölöökö la-en sā Ò Anga-aṅ nö löök.

⁸Ngòh tö la-evṙen tö tökööl, aṅ im sī-ö anga-aṅ, pò ngam sī-ö nö tö köölöfālen, hētentö ök raneh. Angū-ö an lökten ngam Kūön ngam Tēv nö hameuktu, pòn hōtu Anga-aṅ nö luhngö la-en ngam sī-ö.

⁹Ngòh aṅ im Tēv finötnyi, öt vīken tökööl, pò ngam kulöl ò nö köp nö in Ò. Ötkô anga-aṅ nö köölö fālen, pò ò nö aṅ im Tēv finötnyi.

¹⁰In e yin vē kūön ngam Tēv nö hameuktu, tö vē kūön ngam sī-ö inrē. Öp töng la-evṙen tö öt lanöökö, öt aṅ im Tēv, öt rēhĕn ngòh töt hāngenlōn tö holre.

¹¹Pòn ngih yih inhāngan ahang yīö löktökūö ik raneh, tö hī hōtu hāngenlōn tö höö:

¹²Öt sā Kēn, nö aṅ im sī-ö tötlöök, ngaich fëlngö ök kahëmre. Kūöyòh ök nö fëlngen ò? Pò nuk la-en ò nö tötlöök, ngaich tölöök nuk la-en ök kahëm ò.

¹³Kahōlö: ui rötlö töng panam nö surīkhen yīö.

¹⁴Akahalōn in tö hī ngaich chööḵngö ngam kinpaha, öi im nômö: pò hī hāngenlōn tö yip holre.

¹⁵Ngòh sumrīkhö holre, famël tarik an anga-aṅ, ngaich akahalōn yī-ö tö ngòh famël tarik nö öt īnu tö ngam nômö tö-örheūheu-aṅ.

¹⁶I ngih, pò Ò nö kēḵngö nômöre tö pòkūö hī. Ngaich hòṅ kēḵngö nômöre ayī-ö töpòkūö yip holre.

¹⁷Yē ngòh tökôlò nö ing panam ngaich meuk holre nö ötkôlò, ngān rö-övö nö aheūkölōn tö Ò, sitih hanāngenlōn ang anga-aṅ tö ngam Tēv?

¹⁸Yī-ö nyīö, uh yin höng im ṙô hanāngenlōn, unrēhĕn nöng i litāk; i la-en pöri, kanô-en inrē.

¹⁹In e in akahalōn tö hī aṅ im kanô-en, hatöḵöng ellōnre ayī-ö min inrē i kūö Ò,

²⁰I nup ṙô ellōn hī nö vëken hī; pò ngam Tēv nö mööḵlö tö ellōn hī, akahalōn inrē tö tökeuheūttöre.

²¹Kahōlö, hē ngam ellōn hī nö öt veken hī, ngaich öt pinheṅ-eṅvkūö ayī-ö im Tēv.

²²Ngaich yē nup havëkö hī, teūngen ayī-ö in Ò, pò hī haköp në chöngö Ò, ane inrē la-evṙen tö tölöök nö i kūö Ò.

²³Ngih öng yih chöngö Ò, tö hī hōtu ṙātö ellōnre i Minë-eny ngam Kūön Ò, Yēsū Kristū, kö hāngenlōn inrē tö höö, sā hinôtö hī tö Ò.

²⁴Ngòh mahaköp në chöngö Ò, in Ò nö iyöng, in ò inrē Anga-aṅ. I ngih, in akahalōn tö Ò nö iyöng in hī lökten im Töhet Fanöinylö ngam kahëtö Ò nö in hī.