Read Car_Nicobarese 1 YÔHAN 4 Bible Online

1 YÔHAN 4 - Car_Nicobarese bible

1 YÔHAN 4

¹Kahōlö, un ṙātö ellōnre i töng ma-alahaṙa, kalah yip ma-alaha pöri yē cha nö aṅ im Tēv; tön pōyen yik nö ngaich töminyôiny pròfĕt nö chuh i në panam.

²Ihih yin akahakūö tö ngam Fanöinylö ngam Tēv; aṅ im Tēv yin nö ṙòkhöre vē mahalööknyôre tö Yēsū Kristū nö tarik nö yih:

³Ṙòkhöre vē mamahngen Kristū, nö öt aṅ im Tēv: acha-a yin vē ma-alaha ngam töminyôiny Kristū. Öp tö hāngö tö yīö nö yih, ngaich öp nö ha-eheten nö ing panam.

⁴Yī-ö kun kūön chu, aṅ im Tēv yin yī-ö, ngaich mihôiṅ inrē tö cha: pòn kiröng öp in yīö tö ò öp ing panam.

⁵Aṅ ing panam yin cha-a: lökten cha nö ṙôtö aṅ ing panam, ngaich hang ṙô cha ngih panam.

⁶Aṅ im Tēv ayī-ö hang ṙô hī ngòh tö akahakūö tö ngam Tēv, öt hang ṙô hī anga-aṅ ngòh töt aṅ im Tēv. Angū-ö an lökten hī akahakūö tö ngam ma-alaha tökô-en töm ma-alaha tövaich inrē.

⁷Kahōlö; ta-a töi kö hāngenlōn tö höö, tön aṅ im Tēv an ngam hanāngenlōn; ngòh tö hāngenlōn, lamökngörit ngam Tēv anga-aṅ, akahakūö töm Tēv inrē.

⁸Ngòh töt hāngenlōn, ötakahakūö töm Tēv; pò ngam Tēv nö hanāngenlōn.

⁹I ngih, in meukti an ngam hanāngenlōn ngam Tēv nö in hī, pò ngam Tēv nö tīntö ngam töng hĕng maneuk kūönre nö ing panam, pòi hōtu aṅ lökten in Ò.

¹⁰In ngih an ngam hanāngenlōn, öt kūö hī ayī-ö hāngenlōn töm Tēv; tön Anga-aṅ pöri tö hāngenlōn tö hī, ngaich nö tōntö ngam Kūönre nö inlāmö pòkūö në tökööl hī.

¹¹Kahōlö; yē ngam Tēv nö ngatī hanāngenlōn tö hī, hòṅ ngatī ayī-ö kö hāngenlōn tö höö.

¹²Öt hĕng tak ngaich nö hĕng heuh nömeuk ngam Tēv; yē hī ayī-ö kö hāngenlōn tö höö, i yöng in hī ngam Tēv; ngaich hateungtuṙen ngam hanāngenlōn hī tö Ò.

¹³Lökten in ngih, in akahalōn tö hī iyöng in Ò, in hī Anga-aṅ inrē, pò Ò nö kē-ĕkūö hī tö aṅ im Töhet Fanöinylöre.

¹⁴Ngaich in ayī-ö meuk, ngaich eū-a inrē, tö ngam Yöng nö tīntö ngam Kūönre nö mahayööken ngih panam.

¹⁵Ngòh vamënyen Yēsū nö Kūön ngam Tēv, iyöng in ò ngam Tēv, im Tēv anga-aṅ inrē.

¹⁶Ngaich in ayī-ö köp, ṙātö elllōnre inrē, töm hanāngenlōn, ngam hanāngenlōn ngam Tēv tö hī. Hanāngenlōn An ngam Tēv; ngòh mī-iyöng im hanāngenlōn, iyöng im Tēv anga-aṅ; iyöng in ò inrē ngam Tēv.

¹⁷In e an ngam hanāngenlōn nö teungten nö in hī; hòṅ hī öt pa-ekūö im sakāmö kinṙôka: pòn sā Ò Anga-aṅ, ngatī ayī-ö ing panam.

¹⁸Öt pinheṅ-eṅvkūö in im hanāngenlōn; pò ngam töteung hanāngenlōn nö ha-ōngö pinheṅ-eṅkūö; pò ngam pinheṅ-eṅkūö nö öt inkôlòvö. Anga-aṅ ngòh tö pa-ekūö tö teungten nö im hanāngenlōn.

¹⁹Hāngenlōn in; pòn urĕh Anga-aṅ nö hāngenlōn tö hī.

²⁰Yĕn hĕng tak tö ngö ṙô, Hāngenlōn chin chu-ö töm Tēv; ngaich surīkhö holre: töminyôinyaṅ an anga-aṅ. Pò ngòh töt hāngenlōn tö holre tö ngòh maheuṅkre, ötkô nö hāngenlōn töm Tēv, ngam töt maheuṅk ò.

²¹Ngih ön chöngö hī aṅ in Ò, tö ngòh töhāngenlōn tö ngam Tēv, hāngenlōn tö holre inrē.