Read Car_Nicobarese 1 YÔHAN 5 Bible Online

1 YÔHAN 5 - Car_Nicobarese bible

1 YÔHAN 5

¹Ngòh ṙamātö ellōnre tö Yēsū nö Kristū, aṅ im Tēv finötnyi Anga-aṅ: ngòh töhāngenlōn tö ngam lökngörit, hāngenlōn inrē tö ò ngam aṅ Ò finötnyi.

²In e in akahalōn tö hī hāngenlōn tö vē kūön ngam Tēv, yē hī hāngenlōn töm Tēv, ane inrē lök i nup chöngö Ò.

³Pòn angū-ö ngih hanāngenlōn ngam Tēv, tö hī öi haköp në chöngö Ò: hö-ö nun në chöngö Ò nö lumrāḵ.

⁴Ngòh lamökngörit ngam Tēv, mihôiṅ töng panam. Ngih ön yih minhôiṅyö tömihôiṅ töng panam, ngam mikah hī.

⁵Achīö öp tö mihôiṅ töng panam? Tön höng ngòh ṙamātö ellōnre tö Yēsū nö Kūön ngam Tēv.

⁶Anga-aṅ yamih lökten ngam mak, mahām inrē ang Yēsū Kristū: öt höng ngam mak, ngam mak pöri nö holtö ngam mahām.

⁷Ngam Töhet Fanöinylö An ameū-a; pò ngam Töhet Fanöinylö nö kanô-en.

⁸Lūöi tak yip ameū-a, ngam Töhet Fanöinylö, ngam mak, ngam mahām inrē; ngaich më tö lūöi taka nö hōḵen höö nö hĕng.

⁹Yē hī hōḵo aheūkö tarik; mötlö pöri ngam aheūkö ngam Tēv. Ngih ön yih aheūkö ngam Tēv, ngam aheūkö Ò nö ngaich nö im Kūön Ò.

¹⁰Ngòh ṙamātö ellōnre nö im Kūön ngam Tēv, īnu anga-aṅ tö ngam tö eūka nö in Ò. Ngòh töt ṙamātö ellōnre nö im Tēv, ngaich töminyôinyaṅ Anga-aṅ tö tī ò; pòn öt ṙātö ellōnre anga-aṅ nö im tö ngaich aheūkö ngam Tēv nö im Kūön Ò.

¹¹Ngih ön yih tö-eūka, tö ngam Tēv nö kē-ĕkūö hī tö nômö tö örheūheuaṅ. Im Kūön Ò ön ngih nômö.

¹²Ngòh tö īnu tö ngam Kūön, nômuvö anga-aṅ; ngòh töt īnu tö ngam Kūön ngam Tēv, öt nômuvö.

¹³Ngaich tī chin kūichtö në in yīö, hòṅ yīö akahalōn tö yīö aṅhaṅv-in tö nômö tö örheūheuaṅ, in yīö, yī-ö ṙamātö ellōnre i minë-eny ngam Kūön ngam Tēv.

¹⁴Ngih ön yih tinyāchen hī in Ò, tö hī, yē hī havëkuvö tö tösā lōn Ò, hang ṙô hī Anga-aṅ:

¹⁵Ngaich yē hī akahalōn tö Ò nö hang ṙô hī tö nup töng havëka tö hī, akahalōn ayī-ö, tö hī aṅhaṅv-in tö ngam töhavëka, ngam havëkö hī in Ò.

¹⁶Yĕn tarīku mameuk ngam holre nö köölö fālen, tö ngam töt mī-im kinpaha tökööl, havë-a Anga-aṅ, ngaich ngam Tēv min nö kē-ĕkūö Ò tö nômö cha, yip töt köölö fālen tö ngam mī-im kinpaha. Mī-im kinpaha ap umuh tökööl: rö-ö nö angu-ö havëkö ò tö ṙô chu.

¹⁷Ṙòkhöre nup ötlanöökö nö tökööl: öt mī-im kinpaha ap umuh inrē tökööl.

¹⁸Akahalōn in tö ngòh töng aṅ im Tēv finötnyi nö öt köölö fālen; anga-aṅ pöri ngòh aṅ im Tēv finötnyi, haköpöre, ngaich ngam tötlöök nö öt lūölken ò.

¹⁹Akalōn in tö hī ayī-ö aṅ im Tēv, ngaich ṙòkhöre ngih panam nö hulalhaka nö im tötlöök.

²⁰Akahalōn ayī-ö inrē, tö ngam Kūön ngam Tēv nö yih, ngaich nö kētö mikahlōn hī inrē, öi akahakūö töm kanô-en, im Kūön Ò Yēsū Kristū. Anga-aṅ ön ngòh tökô-en Tēv, Nômö inrē tö-örheūheu-aṅ.

²¹Yī-ö kun kūön chu, lakngöre yin tö nup insātēv.