Read Car_Nicobarese KAMHÔKA 1 Bible Online

KAMHÔKA 1 - Car_Nicobarese bible

KAMHÔKA 1

¹Ngaich ngö inlahen angū-ö unôichrit kinpaha Yôsuā tö yik kūön Israĕl nö hatöntöre nö i ngam Mā Tēv, nö ngö ṙô, Achiāp min kumröönngöre nö hol ih urĕh lā-al yip aṅ Kanā-an, öi kiyung lā-al cha?

²Ngaich ngö ṙô ngam Mā Tēv, Yūtā öp min kumröönngöre: Yĕh meuk, ngaich chin kētö ngih panam eltī ò.

³Ngaich Yūtā nö ngö ṙô tö Sīmōn ök kahëm ò, Tā-a in chu man ing kintölö chu, hòṅ hī kiyung lā-al yip Kanā-an; ngaich ngatī chū-ö min inrē hol meh im kintölö meh. Lökten Sīmōn nö kiröönngöre nö hol ò.

⁴Kiröönngöre ngaich Yūtā: ngaich ngam Mā Tēv nö kēten yik aṅ Kanā-an tö yik aṅ Peris nö eltī cha: ngaich cha-a nö fëlngen cha i Pēsek söm köny yik tarik.

⁵Ngaich kôtökūö cha-a tö Atōnipēsek nö i Pēsek: kiyung cha-a ngaich nö lā-al ò, fëlngen yik aṅ Kanā-an inrē tö yik aṅ Peris.

⁶Falngöre pöri Atōnipēsek; ngaich cha-a nö lūḵ an, ngaich kô-òngvah tī tö ò, röki ngaich nuk inyöng kuntī ò tö nuk inyöng kunröön ò.

⁷Ngaich Atōnipēsek nö ngö ṙô, Sat anāi tumtak yik rācha töröki inyöng kuntī inyöng kunröön inrē, hamūl nyā-aṅkūöre nö elkatòh mīs chu: sā tī chu chū-ö ngaich, ngati tī ngam Tēv tö chu. Kēten ò cha-a ngaich nö i Yēruselem, ngaich in e anga-aṅ nö kapah.

⁸Ngaich yik kūön Yūtā nö kiyung nö lā-al Yēruselem, ngaich kē-ĕ e, ngaich fangngen e nö aṅtī tö fël, ngaich föngtökūö ök elpanam tö tameūyö.

⁹Unôichngöre inrē yik kūön Yūtā nö peūtöre nö kiyung lā-al yik aṅ Kanā-an yik mī-iyöng ik rung panam, lā lòhngö, im töṙā-akūö panam inrē.

¹⁰Ngaich kiröönngöre Yūtā nö lā-al yik aṅ Kanā-an yik mī-iyöng Hepròn; (Kiriātarpā ap misī minë-eny Hepròn nö lā-urĕh) ngaich cha-a nö fëlö Sisāi, Ahīman, Talmai inrē.

¹¹Ṙeū-eung umuh anga-aṅ ngaich nö kiröönngöre nö lā-al yik aṅ Tīpir. (Kiriātseför ök misī minë-eny Tīpir nö lā-urĕh.)

¹²Ngaich ngö ṙô ang Kalĕp, Öp kumyūngö Kīrātseför, kē-ĕ e inrē, anga-aṅ min tö kē-ĕvkūö tö Aksā öp kikānö kūön chu nö pīhö ò.

¹³Ngaich Otnīĕl ök kikōnyö kūön Kēnās, ök manāngö kahëm Kalĕp, nö kē-ĕ e: ngaich anga-aṅ nö kūön ò nö pīhö ò.

¹⁴Ngaich angū-ö nö ngö inlahen hē Aksā nö yihtöre nö in ò, ngaich hōten ò anga-aṅ nö havëkö ök taṙeū nö in ök yöng ò kikōnyö: yôkti ngaich Aksā nö ṙā-ang uk ök köttö ò; ngaich ngö ṙô Kalĕp tö ò, Asuh ap lōn meh?

¹⁵Ngaich ngö ṙô anga-aṅ tö ò, Alōnten chu man yĕh; sā meh ngaich ṙāten chu im panam lā lòhngö, kētö në töhëmlö mak in chu inrē. Ngaich Kalĕp nö kētö nuk lātulöng töhëm mak tö nuk lātaṙeū inrē.

¹⁶Ngaich yik kūön aṅ Kēn, ök yöng pīhö Môsös, nö kiröönngöre nö ṙā-ang ip elpanam chūök kachūr nö hol yip kūön Yūtā, nö ik tönyalnyi i Yūtā, ök lā lòhngo tö Arāt; kiröönngöre cha-a ngaich, ngaich iyöng in yik tarik.

¹⁷Ngaich hol ök kahëmre Yūtā ang Simōn nö kiröönngöre, kiyung yik aṅ Kanā-an cha-a ngaich yik mi-iyöng Sefāt ngaich hatngö tī tö e. Ngaich kaheūkö minë-eny ök elpanam nö Hòrmā.

¹⁸Kē-ĕ Kāsā inrē ang Yūtā holre töp kūöngö e, Askēlòn holre töp kūöngö e, Ĕkròn inrē holre töp kūöngö e.

¹⁹Holtöṙah Yūtā ngam Mā Tēv; ngaich anga-aṅ nö ahōngö yik aṅ ngam rung panam, pò ò nö ötkô nö ahōngö yik aṅ el achāṙö, pò cha nö inröl tö vët.

²⁰Ngaich cha-a nö kēten Hepròn nö in Kalĕp, sā ṙô Môsös: ngaich anga-aṅ nö ahōngen yik tölūöi tak kikōnyö kūön Anak nö ṙā-ang umuh.

²¹Öt ahōngö yik Yepus yik kūön Penyamin yik aṅ Yēruselem; ngaich pöri yik Yepus nöng holtöṙah yik kūön Penyamin nö iyöng Yēruselem, söl i ngih sakāmö.

²²Kiröönngöre inrē yik aṅ patī Yôsĕf nö lā-al Pētĕl: ngaich holtöṙah cha ngam Mā Tēv inrē.

²³Ngaich yik aṅ patī Yôsĕf nö tīnngö mahayuntö matre tö Pētĕl. (Lus ök misī minë-eny ngam elpanam nö lā-urĕh.)

²⁴Ngaich yik amahati nö hĕng tak maheuk tö tarik kumnyī-inyre nö ṙā-ang elpanam, ngaich ngö ṙô cha-a tö ò, Vë-ekūö meh in, hameukhömat ih man tö ap lökhöt im elpanam, ngaich īhö min aṙē-ĕlōn tö meh.

²⁵Ngaich anga-aṅ nö hameukhömat cha tök lökhöt im elpanam, aṅtī tö fël cha-a ngaich nö kiyung ngam elpanam, ngaich cha-a nö kiyung ngam elpanam nö aṅtī tö kūö fël; höö-kīṙen pöri ök tarik tö cha nö kiröönngöre ṙòkhöre inrē yip kūön ò.

²⁶Ngaich öktarik nö chuh panam yik Hitait, ngaich vī-il elpanam, ngaich haheuk minë-eny e nö Lus; ngam minë-eny e söl i ngih sakāmö.

²⁷Ngaich hö-ö Manasē nö ahōngen yik aṅ Petsīan tö yik kikānö kūön ò inrē, öt rēhĕn Tā-anak tö yik kikānö kūön ò inrē, öt rēhĕn yik aṅ Tòr tö yik kikānö kūön ò inrē, öt rēhĕn yik aṅ Iptēm tö yik kikānö kūön ò inrē, öt rēhĕn yik aṅ Mekitō tö yik kikānö kūön ò inrē: im panam pöri yik aṅ Kanā-an nö iyöng.

²⁸Ngaich ngö inlahen angū-ö, hē Israĕl nö ngaich nö ṙūöhölre kumlēḵ, ngaich cha-a nö kēten yik aṅ Kanā-an nöng töla-evṙen, ngaich öt keuheūtnyöre tī nö ahōnyen cha.

²⁹Hö-ö inrē Ifrēm nö ahōnyen yik aṅ Kanā-an yik mī-iyöng Kēsör, höng in cha pöri yik aṅ Kanā-an mi-iyöng Kēsör.

³⁰Öt ahōnyen yik aṅ Kitròn ang Sepulön, ötrēhĕn yik aṅ Nahalol; höng iyöng in cha pöri yik aṅ Kanā-an, ngaich nö töng la-evṙen.

³¹Öt ahōngö yik aṅ Akkō an Asēr, öt rēhĕn yik aṅ Sītōn, öt rēhĕn aṅ Ahlap, öt rēhĕn aṅ Aksip, öt rēhĕn aṅ Helpah, öt rēhĕn aṅ Afik, öt rēhĕn aṅ Rēhòp;

³²Ngaich pöri yip aṅ Asēr nöng iyöng in yip aṅ Kanā-an, yik aṅ ngam panam: pò cha nö öt ahōnyen cha.

³³Öt ahōnyö yik aṅ Petsimes ang Naftalī, öt rēhĕn yik aṅ Petanāt; ngaich pöri anga-aṅ nöng iyöng in yik aṅ Kanā-aṅ yik aṅ ngam panam; höng kētuṙen pöri yik aṅ Petsimes aṅ Petanāt inrē nö in cha.

³⁴Ngaich yik aṅ Amôr nö līpngen yik kūön Tën nö im rung panam: pò cha nö öt halöngten cha nö peūtöre nö im achāṙö;

³⁵Iyöng ip rôngö Harheres pöri yik aṅ Amôr, i Ayialòn, i Sā alpim inrē: mihôiṅ pöri ngam kël yik aṅ patī Yôsĕf, lökten cha nö ngaich nö töng la-evṙen.

³⁶Ngaich ngam kūöngö yik aṅ Amôr nö löktö kūö im paneūlö Akrapim, löktö kūö im ihong, kū-ötö tulöng inrē.