Read Car_Nicobarese KAMHÔKA 10 Bible Online

KAMHÔKA 10 - Car_Nicobarese bible

KAMHÔKA 10

¹Choholre ang Tōla ök kikōnyö kūön Pu-a nö hayööken Israĕl unôichrit Apīmelek, ök kikōnyö kūön Tōtō tarik Isakār; iyöng Samīr ip rung panam Ifrēm.

²Nët anāi lūöi samyeūheu anga-aṅ nö hayöngö Israĕl, ngaich kapah, lāpi ngaich nö i Samir.

³Unôichrit ò Yā-ir nö choholre, ök aṅ Kilīöt: nët anāi nët samyeūheu anga-aṅ nö hayöngö Israĕl.

⁴Lūöi anāi kūön anga-aṅ tö kikōnyö yik mi-i uk tölūöi anāi kūön kötta, lūöi anāi elpanam cha-a, nup tökaheūkö nö Havòtyā-ir i ngih sakāmö töngamuh, nup panam Kilīöt.

⁵Kapah ngaich Yā-ir, ngaich lāpi nö i Kamòn.

⁶Hēk yik kūön Israĕl nö lūölkö tötlöök Pē-alim nö ikūö ngam Mā Tēv lök la-en Astaròt inrē tö nup tēv aṅ Siria inrē tēv aṅ Sītōn, tēv aṅ Mô-āp tēv yip kūön aṅ Amòn, tēv aṅ Filistain inrē; ṙāngö ngam Mā Tēv cha-a ngaich öt lök la-en ò.

⁷Ngaich ngam lanīnö ngam Mā Tēv nö hūlö kūö nö in Israĕl, ngaich anga-aṅ nö inyihngen cha nö eltī yik aṅ Filistain, eltī yik kūön Amön inrē.

⁸Ngaich cha-a nö hakihten yik kūön Israĕl ik samyeūheu angū-ö, hëvhör sīön samyeūheu cha-a nö hakihten yik kūön Israĕl yik lāmuh tö Yôtön i panam Amôr, öp i Kilīöt.

⁹Ngaich yik kūön Amön nö havāngngöre tö Yôtön nö kiyūngö Yūtā inrē, lā-al Penyamin, lā-al patī Ifrēm inrē; lökten Israĕl nö pōyen kanihngen.

¹⁰Peunyhökūö ngam Mā Tēv ngaich yik kūön Israĕl, nö ngö ṙô, Köölö fālen in in meh, kūö ih ṙāngö ngam Tēv re, ngaich lök la-en Pē-alim.

¹¹Ngö ṙô ngaich ngam Mā Tēv tö yik kūön Israĕl, Röh öich misī hayöölen yīö in yik aṅ Aikup, in yip aṅ Amôr inrē, in yip kūön Amön, ṙā-ang i Filistain.

¹²In yip Sitōn inrē, aṅ Amelek aṅ Ma-òn inrē, töt mahakôlò yīö; peunyhökūö chu ngaich yī-ö, ngaich hayööken yīö chū-ö ṙā-ang eltī cha.

¹³Sönngenre yī-ö ṙāngen chu, ngaich lök la-en tahëng tēv: lökten chin öthòṅ hēk hayööken yīö.

¹⁴Kuṙòh peunyhökūö nup atöllöre yin tēv; hökngen u nö hayööken yīö hē el nup kanihngen yīö.

¹⁵Ngaich ngö ṙô yik kūön Israĕl tö ngam Mā Tēv, Köölöfālen in: kahngö tī re man in ih töp töng tölöök nö in meh; vë-ekūö meh in, ṙānyen ih i ngih sakāmö.

¹⁶Ngaich cha-a nö kavalngö nuk tötohtöre tēv nö ṙā-ang in cha, ngaich lök la-en ngam Mā Tēv: ngaich anga-aṅ nö haṙīvlōn tökūö kanihngen Israĕl.

¹⁷Hamūlöre ngaich yik kūön Amön nö holre, ngaich iyöngtöre nö i Kilīöt. Hamūlöre inrē yik kūön Israĕl nö holre, ngaich iyöngtöre nö i Mispah.

¹⁸Ngaich yik tarik, tö yik rācha aṅ Kilīöt, nö ngö ṙô tö höö, Chīöp tarik min anga-aṅ kamëtöre nö kiyung nö lā-al yip kūön Amön? Ngaich anga-aṅ mīnö nö mākūö yip taṙòkhöre aṅ Kilīöt.