Read Car_Nicobarese KAMHÔKA 11 Bible Online

KAMHÔKA 11 - Car_Nicobarese bible

KAMHÔKA 11

¹Ngaich ang Yefta ök aṅ Kilīöt nö tökalēḵ nö tarik töt pa-ekūö, kikōnyö ök kūön mi-inyihköre: hakūönten Yefta ang Kilīöt.

²Ngaich ök pīhö Yefta nö kayôngö kūön ò tö yik kikōnyö; ngaich hē yik kikōnyö kūön ök pīhö ò nö kiröng, ahôngen Yefta ngaich cha-a, nö ngö ṙô tö ò, Uh man amīnu i patī öp kikōnyö yöng ih, tön kūön tahëng tak man kikānö.

³Meutngö ngaich Yefta nö ṙā-ang in yik hanöng kisānöre, ngaich iyöng i panam Tòp; hamūltöre ngaich nö in Yefta yik tarik tötkô-en, hol ò cha-a ngaich nö kiröönköre.

⁴Ngaich unôich rĕh rô-angen yik kūön Amön nö kiyung nö lā-al Israĕl.

⁵Ngaich angū-ö nö ngö, hē yik kūön Amön nö kiyung nö lā-al Israĕl, ngaich yik mā-aṅ Kilīöt nö kiröönngöre nö kē-ĕren Yefta nö ṙā-ang i panam Tòp:

⁶Ngö ṙô cha-a ngaich tö Yefta, Tā-a yöngkūö ih man, hòṅ hī kiyung lā-al yip kūön Amön.

⁷Ngaich ngö ṙô Yefta tö yik mā aṅ Kilīöt, Röh öi misī surīkhen chu, ahōngen chu inrē ṙā-ang patī ök yöng chu kikōnyö? Kūöyòh öi pökeh yih in chu töngamuh hē yīö el kanihngen?

⁸Ngaich yip mā aṅ Kilīöt nö ngö ṙô tö Yefta, Lökten in töngamuh hēk havöölö kūöre in meh, hòṅ meh kiröönngöre in ih, öm kiyung lā-al yip kūön Amön, ngaich më-eṅ inrē yöngkūö ih öi ṙòkhöre aṅ Kilīöt.

⁹Ngaich Yefta nö ngö ṙô tö yik mā aṅ Kilīöt, Yē yīö kēten chu hēk i patī öich kiyung lā-al yip kūön Amön ngaich kēten cha min ngam Mā Tēv nö i kūö chu, yöngkūö yīö hòng chū-ö min?

¹⁰Ngaich ngö ṙô yik mā aṅ Kilīöt tö Yefta, ngam Mā Tēv An min mameuk ihôi hī; öthō nö öt sā ṙô meh ngaich ngatī tī min īhö.

¹¹Kiröönngöre ngaich Yefta nö in yik mā aṅ Kilīöt, ngaich yik tarik nö vīlen ò nö yöngkūö mā inrē nö in cha: ṙô-òny nup ṙôre inrē Yefta nö i kūö ngam Mā Tēv nö i Mispah.

¹²Tīnngö ma-ahānga ngaich Yefta nö ik rācha yik kūön Amön, nö ngö ṙô, Suh ap la-en meh in chu, tö meh yih in chu kiyung lā-al ngih panam chu?

¹³Ngaich ök rācha yik kūön Amön nö sap ṙô yik ma-ahānga aṅ in Yefta, Pò Israĕl nö kē ap panam chu, hē ò nö yih nö ṙā-ang Aikup, löktökūö Arnòn söl Yapòk, Yôtön inrē: yĕh pöchö lökten havanten u hēk nö lām.

¹⁴Ngaich hēk Yefta nö tīnngö ma-ahānga nö ik rācha yik kūön Amön:

¹⁵Ngö ṙô anga-aṅ tö ò, Ngö ṙô öp Yefta; öt kē panam Mô-āp ap Israĕl, öt rēhĕn tö panam yip kūön Amön;

¹⁶Hē cha pöri nö yih nö ṙā-ang Aikup, ngaich Israĕl nö lök eltönyalnyi ip mai Ētöm, ngaich yih nö i Katēs;

¹⁷Tīnngö ma-ahānga ngaich Israĕl nö ik rācha Ētöm nö ngö ṙô, Vë-ekūö meh chin, hökngen chu lök im panam meh: öt hang pöri öp rācha Ētöm. Ngatī inrē anga-aṅ nö in öp rācha Mô-āp nö söömtö ṙô: Sōḵ pöri anga-aṅ: ngaich höngngöh Israĕl nö i Katēs.

¹⁸Ngaich anga-aṅ nö lök el tönyalnyi, havī ngam panam Ētöm inrē tö ngam panam Mô-āp, ngaich yih nö löktö lā chuhöt ngam panam Mō-āp, ngaich acha-a nö vītö chūökre nö ip tahëng lā kaha Arnòn; rö-ö pöri cha-a nö yih nö lā el öp kūöngö Mô-āp, pò Arnòn nö kūöngö Mô-āp.

¹⁹Ngaich tīnngö ma-ahānga Israĕl nö in Sīhòn öp rācha yik Amôr, ök rācha i Hespòn; ngö ṙô Israĕl tö ò, Vë-ekūö meh in, hökngen ih lök im panam meh öi chuh im chūökre.

²⁰Hö-ö pöri Sīhòn nö ṙātö ellōnre nö in Israĕl, nö lök im kūöngö ò: hamūl yik tarikre pöri Sihòn nö ṙòkhöre, ngaich iyöngtöre nö i Yāhas, ngaich kiyung nö lā-al Israĕl.

²¹Ngaich ngam Tēv Israĕl, ngam Mā Tēv, nö kēten Sihòn tö yik tarik ò inrē nö ṙòkhöre nö eltī Israĕl, fëlngen cha ngaich acha-a; lökten Israĕl nö amīnu töm panam yip Amôr, tö yip aṅ ngam panam angū-ö.

²²Keuheūtlöre amin cha-a ngaich tö ngam kūöngö yik aṅ Amôr, löktökūö Arnòn söl Yapòk, löktökūö ngam tönyalnyi söl Yôtön.

²³Lökten ngam Tēv Israĕl, ngam Mā Tēv nö öt amīnu tī tö yip aṅ Amôr nö i kūö yip tarik ò Israĕl, ngaich hòṅ amīnu hòng më-eṅ tö u?

²⁴Röh öm öre më-eṅ amīnu töp kahëtö ngam Tēv meh Kimòs nö in meh nö amin meh? Lökten yip töṙā-aiṙen tö aminre tö ngam Tēv ih ngam Mā Tēv nö i kūö ih, ngaich amin ih anū-ö.

²⁵Tö ĕhten öm më-eṅ tö Pēlak ök kikōnyö kūön Sīpòr, rācha aṅ Mô-āp? Hĕng heuh ök anga-aṅ nö lā-al Israĕl, hēk inrē hĕng heuh ök nö kiyung nö lālö cha?

²⁶Irô-òten Israĕl nö iyöng Hespòn ël nup elpanam e inrē, i Arō-er tö nup elpanam e inrē, i nup tökiröng elpanam tötöökhakṙen nö lā kaha Arnòn, nö lūöyòng samyeūheu: kūöyòh öi misī öt havāngngö u i ël e angū-ö ṙētak.

²⁷Lökten chin chū-ö öt köölö fālen in meh, më-eṅ pöri tövaich in chu öm kiyung lā-al chu: ngam Mā Tēv An, ngam ma-akah fālen, anga-aṅ An yēḵ ma-akah fālen töngamuh ihôi vē kūön Israĕl tö vē kūön Amön.

²⁸Hö-ö pöri ök rācha yip kūön Amön nö hang minë ṙô Yefta minë sahöömtö ò nö in ò.

²⁹Teungtöre ngaich ngam ma-alaha aṅ im Mā Tēv nö i kui Yefta, havāngngöre ngaich anga-aṅ tö Kilīöt tö Manasē inrē havāngngö kui Mispah inrē öp i Kilīöt, ngaich ṙeū-eung Mispah öp i Kilīöt anga-aṅ nö havāngtöre nö in yik kūön Amön.

³⁰Ngaich Yefta nö kilēḵngôre nö chūöku ṙô nö im Mā Tēv, nö ngö ṙô, Yē meh min kô-en kēten yip kūön Amön nö eltī chu,

³¹Ngaich mīnö, öp töng kumnyī-inyre nö löknyö nup inkūp öp patī chu nö höngkūö chu, yē chu havan ip lanāmö ṙā-ang in yip kūön Amön, ngaich anga-aṅ min nö minë-eny ngam Mā Tēv, kēten ò chū-ö min nö töföngö tökētu.

³²Havāngngöre ngaich Yefta nö in yip kūön Amön nö kiyung nö lā-al cha; ngaich ngam Mā Tēv nö kēten cha nö eltī ò.

³³Fëlö cha ngaich anga-aṅ löktökūö Arō-er söl i Minit, nët anāi nup tökiröng elpanam, söl i Apĕlkëramin nö pōihangvah. Ötkô ngaich yik kūön Amön nö i kūö yik kūön Israĕl.

³⁴Yih ngaich Yefta nö i Mispah ip patī ò, ngaich meuk ök kikānö kūönre nö kunyī-inyre nö höngkūö ò nö holtö timpöröl nö kiṙīöm; töng hĕng maneuk ök nö kūön ò; öt hōlu anga-aṅ tö kūön ò tö kikōnyö öt rēhĕn kikānö.

³⁵Ngaich hē ò nö meūkan, tikaichngö inyut re ngaich anga-aṅ, nö ngö ṙô, Aōla, kūön chu kikānö! tumṙeūtu chin ngaich tö meh lā taṙeū. Ngaich man inrē sā cha yip mahakihten chu: pò chu ngaich vā-anykūöre im Mā Tēv, ngaich ötkô öich heūlritre.

³⁶Ngaich ngö ṙô anga-aṅ tö ò, Kayöngö, ngaich man vā-anykūöre im Mā Tēv; tinī-iv man yēḵ ngaich tö chu sā öp lamöknyö elvāng meh; sā ngam Mā Tēv nö havahalvah meh nö in yip lā-al meh, yip kūön Amön.

³⁷Ngaich ngö ṙô anga-aṅ tök yöngre kikōnyö. Hökngen ngih yēḵ nö hateūngi nö in chu; hökngen chu nët chumngëṅtö höng hĕngtöṙah, hòṅ chu kiröönngöre chuh kui minë rôngö, öich haram ngih rinëlöre, tö yip nôlö chu inrē.

³⁸Kuṙòh, ngö anga-aṅ ngaich. Tīnngörit ò ngaich anga-aṅ nö nët hang chumngëṅtö, kiröönngöre ngaich anga-aṅ, tö yik nôlö ò inrē, ngaich haramngörit ngam rinëlöre nö i kui rôngö.

³⁹Ngaich hē minë tönët nòng chingëṅt nö keuheūten, havantöre ngaich anga-aṅ nö ik yöngre kikōnyö, ök tö tinī-iv tö ò sā ök töchūöku kinlēḵngô ò: öt akahakūö anga-aṅ tö kikōnyö. Kētöre ngaich angū-ö nö kui panam nö in Israĕl.

⁴⁰Tö yip kikānö kūön Israĕl nö kaheuk samyeūheu nö afēken öp kikānö kūön Yefta aṅ Kilīöt fën sumkam i töhĕng samyeūheu.