Read Car_Nicobarese KAMHÔKA 12 Bible Online

KAMHÔKA 12 - Car_Nicobarese bible

KAMHÔKA 12

¹Ngaich yik tarik Ifrēm nö hamūlöre ngaich kū-ötö kapā nö kiröönngöre; ngaich ngö ṙô cha-a tö Yefta, Kūöyòh ömeh havāngngöre kiyung lā-al yip kūön Amön, ngaich öt havëken ih öi kiröönngöre in meh? Hòṅ föngtö kūö meh in el ap patī meh tö tameūyö.

²Ngaich ngö ṙô ang Yefta tö cha, Kasal kumlēḵre chin tö vē tarik chu inrē i vē kūön Amön; ngaich hē chu havëken yīö, öt hayööken chu yī-ö ṙā-ang eltī cha.

³Ngaich hē chu meūkö yīö öt hayööken chu, kē ngih nômöre chū-ö ngaich eltīre, ngaich havāngngöre lā-al yip kūön Amön, kēten cha ngaich ngam Mā Tēv nö eltī chu: lökten kūöyòh öi yih in chu töngamuh, öi kiyung lā-al chu?

⁴Hamūl yik tarikre ngaich Yefta nö ṙòkhöre yik aṅ Kilīöt, ngaich kiyūngö Ifrēm, pô cha nö ngö ṙô, Aṅ Ifrēm yin yī-ö tökatūöyaṙen, yī-ö aṅ Kilīöt, nö el ṙôngö Ifrēm, el ṙôngö Manasē inrē.

⁵Ngaich yik aṅ Kilīöt nö kē nup talöökö invāngngö ël Yôtön nö lā-al yik aṅ Ifrēm: ngaich, hē yik Ifrēm nö falngöre nö ngö ṙô, Hökngen chu havāngngöre, ngaich yik tarik aṅ Kilīöt nö ngö ṙô tö ò, Aṅ Ifrēm ömeh? Ngaich yē ò nö ngö ṙô, Hö-ö;

⁶Ngaich ngö ṙô cha-a tö ò, Sīppolet ngö man yĕh; ngaich ngö ṙô anga-aṅ Sippolet: pòn ötkô anga-aṅ nö löökö ṙô ngaich cha-a nö kē an, fëlngen ò ngaich nö ël nup talöökö invāngngö ël Yôtön: ngaich in e hē e nö fën anāi nët köny aṅ Ifrēm töfukngö.

⁷Tafūöl samyeūheu ang Yefta nö hayöngö Israĕl. Kapah ngaich Yefta ök aṅ Kilīöt, ngaich lāpi nö ik töhĕng aṅ i nuk elpanam i Kilīöt.

⁸Unôichrit ò Ipsān öp aṅ Petlihem nö hayöngö Israĕl.

⁹Lūöi anāi kūön anga-aṅ tö kikōnyö, lūöi anāi kūön inrē tö kikānö tīnngen cha anga-aṅ nö marôvat, ngaich lūöi anāi yik nyīö kikānö kahëtö ò nö ṙā-ang tömarôvat nö pīhö yik kūön ò kikōnyö. Sat samyeūheu anga-aṅ nö hayöngö Israĕl.

¹⁰Kapah ngaich Ipsān, lāpi ngaich nö i Petlihem.

¹¹Unôichrit ò nö hayöngö Israĕl ang Elòn aṅ Sepulòn; söm samyeūheu anga-aṅ nö hayöngö Israĕl.

¹²Kapah ngaich Elòn ök aṅ Sepulòn, lāpi ngaich nö i Ayalòn i panam Sepulòn.

¹³Unôichrit ò Aptòn nö hayöngö Israĕl ök kikōnyö kūön Hīlel ök aṅ Piratön.

¹⁴Fën anāi kūön anga-aṅ tö kikōnyö lūöi anāi inrē yik kūön yik kūön, yik mi-uk tösat anāi kūön kötta, hëvhör samyeūheu anga-aṅ nö hayöngö Israĕl.

¹⁵Kapah ngaich Aptòn ök kikōnyö kūön Hīlel ök aṅ Piratön, ngaich lāpi nö i Piratön i panam Ifrēm, ip rung panam Amalek.