Read Car_Nicobarese KAMHÔKA 13 Bible Online

KAMHÔKA 13 - Car_Nicobarese bible

KAMHÔKA 13

¹Ngaich hēk yik kūön Israĕl nö ötlöökö la-en nö i kūö ngam Mā Tēv; Kēten cha ngaich ngam Mā Tēv nö eltī yik Filistain fën anāi samyeūheu.

²Ngaich hĕng tak ök umuh tarik aṅ Sōrah, aṅ i mupīhö Tën, ök tö minënyu tö Manô: tötkūönu ök pīhö ò, tötkamyô inrē.

³Meūkö ngaich ök ma-ahānga aṅ im Mā Tēv tök kikānö, ngaich ngö ṙô tö ò, Yĕh meuk, ötkūönu man, tötkamyôḵ inrē: pirūkö nyīö pöri min më-eṅ, kayôḵnyö nyīö kikōnyö inrē.

⁴Vë-ekūö meh chin lökten haṙēmngenre, un òk vāin un rēhĕn òk tökalēḵ, un nyā-aṅvkūö inrē tö töthet:

⁵Yĕh meuk, pirūkö nyīö man min, kayônyö kikōnyö nyīö inrē: öt kētu kūö min kunhāk nö i kui ò: pò ap nyīö min nö aṅ Nasaret nö im Tēv löktökūö el chūök kanūönö: ngaich anga-aṅ min nö rultenre nö hayööken Israĕl nö ṙā-ang eltī yip aṅ Filistain.

⁶Ngaich ök kikānö nö yihtöre nö vë-eny nang ök pīhöre, nö ngö ṙô, Hĕng tak ök tarik ngam Tēv yihtöre nö in chu ngaich ök arëkūö ò nö sā arëkūö ma-ahānga aṅ im Tēv, nö vanööṙö: öt hatönan chū-ö töp ṙeūngö ò, öt rēhĕn anga-aṅ nö vë-enynang chu tö minë-enyre:

⁷Ngö ṙô pöri anga-aṅ tö chu, Yĕh meuk, pirūkö nyīö man min kayônyö nyīö inrē kikōnyö; un òk vāin töngamuh inrē un rēhĕn òk tökalēḵ, un nyā-aṅvkūö inrē tö töng öthet: tön aṅ Nasaret öp min nyīö nö im Tēv töngamuh löktö kūö el chūök kanūönö söl kinpaha ò.

⁸Ngaich Manô-a nö vë-ekūö ngam Mā Tēv, nö ngö ṙô, Ō Mā vë-ekūö meh chin, hökngen ap tarik ngam Tēv öp tahīntö meh taheui nö yih nö hēk nö in ai, haköpten ai inrē tö tī ai min töp nyīö öp tökayônyu min.

⁹Ngaich hang ṙô Manôa ngam Tēv; yih ngaich ök ma-ahānga nö hēk aṅ im Tēv nö ik kikānö hē ò nö ūichhaka nö el panô-òṅ: hö-ö pöri ök pīhö ò Manôa nö in ò.

¹⁰Kurāten ngaich ök kikānö, fal inrē, ngaich vë-eny nang ök pīhöre, nö ngö ṙô tö ò, Yĕh meuk, meūkö öp tarik tö chu, öp yamih nö in chu fömngöre.

¹¹Choholre ngaich Manô-a, ngaich kiröönngöre nö tömrit ök pīhöre, ngaich yihtöre nö ik tarik, ngaich ngö ṙô tö ò, Më-eṅ öm tarik vamë-eṅkūö öp kikānö? Chū-ö chin, ngö anga-aṅ.

¹²Ngaich ngö ṙô Manô-a, Hökngen nup ṙô meh yēḵ nö teungtökūö: tösitih inlaha ap min nyīö, sitih tī öi min tö ò inrē?

¹³Ngaich ök ma-ahanga aṅ im Mā Tēv nö ngö ṙô tö Manô-a, Nup ṙô chu nö ṙòkhöre im kikānö hökngen ò nö haṙēmngen re.

¹⁴Öt nyā-aṅvkūö an tö nup töng lamöknyö i ṙòng vāin, un rēhĕng nö òk vāin hēk tökalēḵ òk, un nyā-aṅv kūö nö rēhĕn tö töthet; hökngen ò nö haköpkö nup ṙô chu tölṙô ò nö ṙòkhöre.

¹⁵Ngaich Manô-a nö ngö ṙô tök ma-ahānga aṅ im Mā Tēv, Ve-ekūö meh chin, hökngen ai man hangöhten meh, hòṅ ai halēn öp kun pököre nyā-aṅkūö meh.

¹⁶Ngaich ngö ṙô ök ma-ahānga aṅ im Mā Tēv tö Manô-a, Pòrô man hangöhten chu, öt hōḵ chū-ö min nyā nyā-aṅkūö meh: ngaich yĕḵ meh halēnlö töföngö tökētu, hòṅ kēten e me-eṅ im Mā Tēv, Pò Manô-a nö öt akahakūö tö ò nö ma-ahānga aṅ im Mā Tēv,

¹⁷Ngaich ngö ṙô Manô-a tök ma-ahānga aṅ im Mā Tēv, Chīāp mine-eny meh, hòṅ ih ha-öinyö meh min yĕn teungtökūö nup ṙô meh?

¹⁸Ngaich ngö ṙô tö ò ök ma-ahānga aṅ im Mā Tēv, Kūöyòh öm hatön mine-eny chu, yē e nö töt ankahen?

¹⁹Ngaich Manô-a nö kē ök kun pököre nö holtö ök nyā-aṅ tökētu, kētö e ngaich nö im Mā Tēv nö i kui ök ihong: ngaich ök ma-ahānga nö tītö pinngangkūö, höng hatīöna Manô-a tök pīhö ò inrē.

²⁰Pò e, hē ngam tameūyö nö hūlökūö nö kū-ötö el halīöngö nö ṙā-ang el öp; tahāklö, öp ma-ahānga aṅ im Mā Tēv nö yônlö nö i kūö ngam töhū el ngam tahāklö: hatīöna Manô-a tök pīhö ò inrē; afukngöre cha-a ngaich nö fāthak kūö nö el tumlat.

²¹Öt hēk pöri öp ma-ahānga aṅ im Mā Tēv nö mēukö tö Manô-a hēk tök pīhö ò. Akahalōn ngaich Manô-a tö ò nö ma-ahānga aṅ im Mā Tēv.

²²Ngaich ngö ṙô Manô-a tök pīhöre, Kô-ông vah an min kapah pò hā meuk ngam Tēv.

²³Ngö ṙô pöri ök pīhö ò tö ò. Yē ngam Tēv öreh nö lōnu tö finëlngö hā, ngaich sōḵ öre anga-aṅ tök töföngö tökētu nö ṙa-ang eltī hā tök nyā-aṅ inrē tö kētu, öt rēhĕn öre anga-aṅ nö hameuk tö në nö ṙòkhöre nö in hā, öt rēhĕn öre nö ve-eny nang hā tö në nö ṙòkhöre.

²⁴Ngaich ngam kikānö nö kayônyö nyīö kikōnyö, ngaich kaheuk mine-eny ò nö Sëmsön; sīöplö ngaich ök nyīö, ngaich hakôlò ò ngam Mā Tēv.

²⁵Ngaich ök ma-alaha aṅ im Mā Tēv nö kēngen ò nö i Mahanetan ihòi Sōrah tö Esta-òl.