Read Car_Nicobarese KAMHÔKA 15 Bible Online

KAMHÔKA 15 - Car_Nicobarese bible

KAMHÔKA 15

¹Rĕhĕ rô-angen pöri, hē el inmūlö ṙòng vīt, ang Semsön nö chöh kö ök pīhöre nö kumtö kun pököre; ngaich ngö ṙô anga-aṅ Hòṅ kuhēthötre chin ip pīhöre el ngam urôhò. Öt halöngten ò pöri ök kikōnyö yöng ök kikānö nö kuhēthöre.

²Ngö ṙô ök kikōnyö yöng ò, Ngaich chin kamngulōn tö meh öm kunyaha elmat takô-en tö ò; lökten chu ngaich kēngen ò ip nôlö meh: Röh öp ṙālö kanānö ò nö mötlö vanāyö tö ò? Vë-ekūö meh chin, kē an yĕh ṙënngen ò.

³Ngaich ngö ṙô Semsön tö cha, Öt chōich chin min töngamuh in vē aṅ Filistain, yē chu chökhu tī tö cha.

⁴Kiröönngöre ngaich Semsön, ngaich lūöyòng tumnòng kahë tö am aṅ elinchōn, kē tanyukngö ngaich, ngaich kapòk nuk lamrit u, harònglö tīre ngaich nö ihôi minë tönët lamrit nö kapòk tö ngam tanyukngö.

⁵Keuheūhë tī anga-aṅ nö tōttökūö minë tanyukngö, haṙeulngö u ngaich nö lök ël nuk tösökhakaṙen sāiny yik aṅ Filistain, ngaich ṙāpngötī tö nuk kaha ṙòng nuk tösökhakaṙen inrē, tö nuk panô-òṅ ôliv inrē.

⁶Ngaich ngö ṙô yik aṅ Filistain, Chiāp tötī-iv tö ngih? Ngaich ngö ṙô cha-a, Semsön, öp köiny kūön yip aṅ Timnā, pò ò nö kēngö ök pīhö ò, ngaich kēngen ò nö ip nôlö ò. Yih ngaich yik aṅ Filistain, ngaich föngtökūö ò töp kikōnyö yöng ò inrē.

⁷Ngaich ngö ṙô Semsön tö cha, Yē yīö öi ngatī tī, hòṅ keuheūtngenre chin havahalre in yīö, ngaich möl chū-ö min ṙāngenre.

⁸Foh ṙat cha ngaich anga-aṅ takeun inrē nö pōihang vah tī: kiröönngöre ngaich anga-aṅ ngaich iyöng el kinluhu ök i Ētöm.

⁹Kiröönngöre ngaich yik Filistain, ngaich iyöngtöre nö i Yūtā, ngaich pirātngöre nö i Lëhī.

¹⁰Ngaich ngö ṙô yik tarik aṅ Yūtā, Kūöyòh öi yih lā-al ih? Ngaich ngö ṙô cha-a, Yih in nyëkö Semsön, öi sā tī ò tö ih ngatī tī īhö tö ò.

¹¹Lūöi köny ngaich yik tarik aṅ Yūtā chamuh el öp tömëngö ihong i Ētam, ngaich ngö ṙô tö Semsön, Öt akahalōn öm tö vē Filistain nö mahayöngö hī? Asuh öng pökeh ngih tī meh in hī? Ngaich ngö ṙô anga-aṅ tö cha, Sā tī cha cha-a tö chu, ngaich ngatī tī chū-ö tö cha.

¹²Ngaich cha-a nö ngö ṙô tö ò, Yih in īhö öi nyëkö meh hòṅ ih kēten meh eltī yip Filistain. Ngaich Semsön nö ngö ṙô tö cha, Chūökuṙô yin in chu, tö yīö min yī-ö öt fëlö chu.

¹³Ngaich cha-a nö ngö ṙô tö ò, Hö-ö; höng haköpngen meh in min nyëkö meh, ngaich kēten meh eltī cha: öthō pöri öi fëlngen meh. Nyëkan cha-a ngaich nö aṅtī tö nuk tönët tufömngöre pisik, ngaich kēlen ò nö ṙā-ang el ök ihong.

¹⁴Hē ò ngaich nö yih nö i Lëhī, hū-a ngaich yik Filistain tö saha cha nö meūkan: kalēḵ ngaich ök ma-alaha aṅ im Mā Tēv nö yih nö in ò, ngaich nuk pisik i kël ò nö vītöre nöng sā ta-īö tö ökngö tökūö tameūyö, ngaich sukngöre nuk nyanëk ò nö ṙā-ang i nuk kël ò.

¹⁵Kôtökūö anga-aṅ ngaich tök tufömngöre samā köttö, silô tö këlre ngaich nö kē-ĕ e, aṅtī tö e ngaich nö fël yik töhĕng köny tarik.

¹⁶Ngaich Semsön nö ngö ṙô, aṅtī tö samā köttö öich fël töhĕng köny tarik.

¹⁷Ngaich hē ò nö keuheūtö ṙô nö ṙô-òvö, kavalngö ök samā ngaich anga-aṅ nö ṙā-ang eltīre; ngaich kaheuk ök chūök nö Ramatlëhī (Rung samā.)

¹⁸Ngaich kalē-ĕ inṙëhe nômö anga-aṅ, ngaich havëkö ngam Mā Tēv nö ngö ṙô, Löktö eltī ngòh kūönre man kētö ngih yöng ṙinānyö: ngaich pöchö chin yih hòṅ kapah tö inṙehe nômöre, ngaich fuk eltī yip töttunyīnyi.

¹⁹Ngaich ngam Tēv nö liraknyökūö ök tökahuhu ël chūökö i Lëhī, löknyö ël e ngaich ök mak nö hëmnyi; hē ò nö keuheūtökūö nö òk, havan ngaich ök ma-alaha ò, ngaich aṅ anga-aṅ. Lökten ök minë-eny e nö kaheūkö nö Enhakkôrë, ing töngamuh, öp i Lëhī.

²⁰Nët anāi samyeūheu anga-aṅ nö hayöngö Israĕl hē nuk sakāmö yik Filistian.