Read Car_Nicobarese KAMHÔKA 16 Bible Online

KAMHÔKA 16 - Car_Nicobarese bible

KAMHÔKA 16

¹Chuh Kāsā ngaich ang Semsön, ngaich meuk ök kikānö mi-inyihköre umuh, ngaich kuhēthötre nö in ò.

²Ngaich ngö ṙô yik aṅ Kāsā nö vënyen ò, Yih öp Sëmsön nö ihih. Ngaich cha-a nö havīlen ò, hĕng mitööm nö ikūö inkūp öp elpanam nö höngan ngaich hĕng mitööm cha-a ngaich ngö ṙô, Höklö öp hanātö öp peuheū ngaich fëlngen ò min ayī-ö.

³Söl chūöl hatööm ngaich Semsön nö hulalhaka, choholre ngaich ik chūöl hatööm, kētö tīre ngaich nö i nuk inkūp lökhöt ik elpanam, in nuk tönët machööḵlö inrē, ngaich teuklö u, ṙòkhöre nuk kālkūö inrē, tayūkö ngaich tö ò nö elranôṙö ò ngaich keunngö u nö ip rôngö lākūö Hepròn.

⁴Ngaich unôichngöre, anga-aṅ nö hāngenlōn tök kikānö el achāṙö Sōrek, ök töminënyu tö Tīlaila.

⁵Ngaich yik mā aṅ Filistain nö yihtöre nö in ò, ngaich ngö ṙô tö ò, Haṙöiyan, ngëichkö chūök öp yöng kumlēḵ ò, töp aṅtī hī inrē öi mihôiṅ lā-al ò, hòṅ hī nyëkan öi hakihten ò: ngaich kö tī-ivö min īhö in meh tö rupīö kahuk sīönòng.

⁶Ngaich ngö ṙô Tilaila tö Sëmsön, Vë-ekūö meh chin, vë-enynang chu tö chūök öp yöng kumlēḵ meh, töp nyanëk meh inrē öm hakihtuṙen.

⁷Ngö ṙô ngaich Semsön tö ò, Yē cha nö nyëkö chu nö sātö aṅtī tö tö-uhāv inröt linreny, nup töt hanyôṙö, ngaich min chū-ö öt kalēḵ, ngaich höng sā töng tarīka.

⁸Ngaich yik mā aṅ Filistain nö sātö kahëti nö in ò tö tö-uhāv inröt linreny nup töthanyôṙö, aṅtīten tö u ngaich anga-aṅ nö nyëkan.

⁹El ök lātuhēt urôhò yik mahayūnan nöng ngöh tö tī ò. Ngaich ngö ṙô anga-aṅ tö ò, Semsön, Filistain yin vē in meh. Litòkngö nuk inröt linreny anga-aṅ ngaich höng sā tökuvaha tanūök nö latôki yē e nö ökngö tökūö tameūyö. Ngatī öp kumlēḵ ò nö öt ankahen chūök.

¹⁰Ngaich ngö ṙô Tilaila tö Semsön, Yĕh meuk miyëḵ man tö chu, minyôinyaṅ ṙô in chu inrē: Vë-ekūö meh chin, vë-enynang chu töngamuh, öp yòh öp tökô nyanëk meh.

¹¹Ngaich ngö ṙô anga-aṅ tö ò, Yē cha nö nyëkö chu nö aṅtī tö tufömngöre pisik öp tö-öl nö kētu kūö nö i lā-en ngaich min chū-ö öt kalēḵ, sā töng tarīka inrēngöre.

¹²Kē tufömngöre ngaich pisik ang Tilaila ngaich nyëkan tö e, ngaich ngö ṙô tö ò, Semsön Filistain yin vē in meh. El öp lātuhēt urôhò yik hamöng nöng ngöh. Litòkngö u ngaich anga-aṅ nö i këlre nöng sā tā-īö.

¹³Ngö ṙô ngaich Tīlaila tö Semsön, Ihih man inrē hayëngen chu, minyôinyaṅ ṙô inrē in chu: ve-enynang chu man töp tökô nyanëk meh. Ngaich ngö ṙô anga-aṅ tö ò, Yē meh kupat në tösat keūyö el kui chu nö hol tö haveūngö.

¹⁴Kapòkngö e ngaich anga-aṅ nö ik tumnôkö, ngaich ngö ṙô tö ò, Semsön Filistain yin vē in meh. Aṅhen ngaich anga-aṅ, teuklö ök tumnôkö ngaich nö ik mikeūnö, tök haveūngö inrē.

¹⁵Ngö ṙô anga-aṅ tö ò, sitih kanô-òṅ öm ngö ṙô, Hāngenlōn chin tö meh, yē ngam ellōn meh nö öt in chu? Ngaich man yih lūöi heuh hayëḵngen chu, öt vë-enynang chu inrē tö chūök öp tökiröng kumlēḵre.

¹⁶Ngaich hē ò nö öt hĕng hang sumkam nö līpnyö ṙô ò, nö mileūchen, ngaich hòṅ kapah anga-aṅ tö kanihngen ellōnre.

¹⁷Ngaich keuheūtnyö ellōnre anga-aṅ nö ve-enynang ò, nö ngö ṙô tö ò, Öt hĕng nòng kinmöp tö ngaich nö el kui chu: pò chu löktökūö el chūök kanūönö yöngre öich Nasaret im Tēv. Yē chu kuhāki, ngaich öp kumlēḵ chu min nö kiröönngöre nö ṙāngen chu, ngaich chū-ö min öt kalēḵ, sā töng tarīka inrēngöre.

¹⁸Ngaich hē Tilaila nö meūkan nö ṙā-ang ellōnre ṙô nö ve-enynang ò, tīnngö mahavëtö yik mā aṅ Filistain anga-aṅ nö ngö ṙô Yih yin höng hĕng tör heuh, tön ngaich ön nö löknyö ellōnre ṙô nö ve-enynang chu. Yih ngaich yik mā aṅ Filistain nö in ò, kumtö nuk rupīö inrē nö eltīre.

¹⁹Miṙôhan ngaich anga-aṅ nö i kui kinmônöre; hĕng tak havëti ngaich tö tarik, ngaich kuhākngö nuk tösat keūyö i kui ò; rultöre ngaich anga-aṅ nö hakihten ò, ngaich ök kumlēḵ ò nö kiröönngöre nö ṙā-ang in ò.

²⁰Ngaich ngö ṙô anga-aṅ, Semsön Filistian yin vē in meh. Choholre ngaich anga-aṅ nö ṙā-ang ik inṙôhò, ngaich ngö ṙô, Hòṅ kunnyī-inyre chin sāre ṙung, öich piyònglö alahare. Öt akahalōn pöri anga-aṅ tö ngam Mā Tēv nö rāngen ò.

²¹Kētö tīre ngaich yik Filistain tö ò, ngaich piòknyö mat ò, ngaich kēten ò cha-a nö i Kāsā, nyëkan inrē tö mās sayōk; ngaich kiṙīöt atra anga-aṅ nö el ök patī inkövö.

²²Sīöplöre pöri nö hēk nuk keūyö ò nö i kui ò unôichrit kunhākngö ò.

²³Hamūlöre ngaich yik mā aṅ Filistain nö kētö tökiröngen tökētu ik tēv cha Takòn, haṙamlōnre inrē: pò cha nö ngö ṙô, Kēten Semsön an ngam tēv hī nö eltī hī, ngam tökunyaha elmat tö hī.

²⁴Ngaich hē yik tarik nö meūkan, ha-öiny ngam tēvre ngaich cha-a pò cha nö ngö ṙô, Kētö ngam tökunyaha elmat an tö hī ngam tēv hī, nö eltī hī, ngam mahalëlngö ngam panam hī inrē, ngam töpōihangvah tī nö fëlngen hī

²⁵Ngaich hē cha nö ṙāmö ellōn, löknyö ṙô cha nö ngö. Havëten Semsön, hòṅ ò nö nyamkö kūö hī. Havënyen Semsön cha-a ngaich nö ṙā-ang el ök patī chūök inkövö; ngaich nyamkö kūö cha anga-aṅ; ngaich ha-ūichngen ò cha-a ihôi nuk machööḵlö.

²⁶Ngaich ngö ṙô Semsön tök ṙāl tarik ṙamapkö kël ò, Höktötī chu man ṙēpkö nup machööḵlö nup tö aṅhaṅv kui töng patī, hòṅ chu harôntöre in u.

²⁷Tööḵlö ök patī tö kikōnyö tarik kikānö inrē; umuh inrē yik mā aṅ Filistain nö ṙòkhöre; i kui patī yik inrē umuh kikōnyö kikānö inrē, lūöi köny yip mameūkö Semsön nö nyamhötô.

²⁸Ngaich Semsön nö havëkö ngam Mā Tēv, nö ngö ṙô. Ō Mā Tēv, fē-ĕlre tö chu, vë-ekūö meh chin, hangëken chu, vë-ekūö meh chin, höng hĕng törheuh. Ō Tēv, hòṅ chu havāhalvah re i vē Filistain tö në tönët matre.

²⁹Ṙapngö tīre ngaich Semsön nö i nuk tönët elmilūkö machöḵlö nuk chūök ngam patī nö töönghakaṙen, harôntöre ngaich nö in u, hĕng ök i lāhāmö eltī ò, lātavē ò ök tahëng.

³⁰Ngaich ngö ṙô Sēmsön, Hökngen chu kapah anòngngen vē Filistain. Holtö kumlēḵre ngaich anga-aṅ nö sōnngöre; fukngö ngaich ngam patī nö i kui yik mā, i kui yik tarik inrē nö ṙòkhöre me-ël e. Lökten yik tökapah fahëlngö ò ik kinpaha ò nö mötlö tö yik fahëlngö ò hē ò nö aṅ.

³¹Yih ngaich yik hanöng kisānö ò yik aṅ patī ök yöng ò kikōnyö inrē, ngaich kē an, kēnyen ò inrē, ngaich lāpngen ò ihôi Sōrah tö Esta-ôl inrē ik kui kupah Manôa ök kikōnyö yöng ò. Nët anāi samyeūheu anga-aṅ nö hayöngö Israĕl.