Read Car_Nicobarese KAMHÔKA 17 Bible Online

KAMHÔKA 17 - Car_Nicobarese bible

KAMHÔKA 17

¹Ngaich hĕng tak ök umuh tarik aṅ ip rung panam Ifrēm, Maika ök minë-eny ò.

²Ngö ṙô anga-aṅ tök yöngre kikānö, Nuk tökahuk sīönnòng rupīö nuk tö kē-ĕyö nö ṙā-ang in meh, nuk ṙô meh chūökuṙô öt lēkôre, ngaich vë-eny nang chu inrē tö e, yĕh meuk in chu nun në rupīö; chū-ö chin kamë-eṅ u. Ngaich ngö ṙô ök yöng ò kikānö. Më-eṅ kūön chu kikōnyö, tökôlò man im Mā Tēv.

³Ngaich anga-aṅ nö havantö nuk tökahuk sīönnòng rupīö nö ik yöngre kikānö. Hòṅ kētö ngih rupīö chin im Mā Tēv öich hakôtö tīre nö tī öp kūön chu kikōnyö, nö vī-i nö insātēv töhaṙöichö insā inrē lökten chin hòṅ havantö u in meh.

⁴Ngaich hē ò nö havan tö nuk rupīö nö ik yöngre kikānö nëtòng kahë ngaich tö rupīö ök yöng ò kikānö, ngaich kēten u nö ik mahaṙöich ök vamī i e nö insā tēv töhaṙöichö insā inrē: ngaich angū-ö nö i patī Maika.

⁵Ngaich ök tarik Maika nö patī-ivö tö patī tēv, vī fanūömṙat ngaich anga-aṅ, insā tarik inrē, ngaich hĕng tak ahetlö tö aṅ i yip kūönre kikōnyö ök tövītuṙen nö kūönṙô ò.

⁶I nuk sakāmö anū-ö misī öt rāchavö i Israĕl: höng kö kahngenre tarik töp töhuveū maheuṅk ò.

⁷Ngaich hĕng tak ök umuh ṙāl tarik aṅ Petlihem Yūtā, aṅ mupīhö Yūtā, ök Lēvī, ngaich chuh umuh anga-aṅ.

⁸Ṙāngö elpanam Petlihem Yūtā ngaich ngam tarik, nö kiröönngöre nö chöh chūökṙen re: teungtökūö anga-aṅ ngaich nö ip rung panam Ifrēm nö i patī Maika, ip kinröönö ò.

⁹Ngaich Maika nö ngö ṙô tö ò, Ṙā-ang yih ömeh? Ngaich ngö ṙô anga-aṅ tö ò, Lēvi chin aṅ Petlihem Yūtā, höng kiröön chin ip kanôtökūöre chūökö

¹⁰Ngaich ngö ṙô Maika tö ò, Iyöng in chu man, öm yöng chu kūönṙô chu in chu inrē, ngaich söm milôhò tī chu-ö min tö rupīö meh i töhĕng samyeūheu, hĕng tamrīkö inyut, tö nyā-aṅkūö meh inrē. Kuhēthötre ngaich ngam Lēvi.

¹¹Hōḵ ngaich ngam Lēvī nö iyöng nö im tarik; ngaich ngam ṙāl tarik nö sā töhĕng tak aṅ i yip kūön ò kikōnyö.

¹²Ahetlö ngam Lēvī ngaich ang Maika, ngaich ngam ṙāl tarik nö kūönṙô ò, ngaich el patī Maika.

¹³Ngö ṙô ngaich ang Maika, Ngaich chin akahalōn töngamuh tö ngam Mā Tēv nö kôlòtī min tö chu; pò chu aṅhaṅv in tö Lēvī nö kūönṙô chu.