Read Car_Nicobarese KAMHÔKA 18 Bible Online

KAMHÔKA 18 - Car_Nicobarese bible

KAMHÔKA 18

¹Hē u anū-ö sakāmö ök miyöngö Tën nö chöh aminre tö chūök re nö iyöng; pò cha hē e angū-ö sakāmö nö öl nö michööḵö tö aminre nö i nuk miyöngö Israĕl.

²Ngaich yik kūön Tën nö taneui tak tahīnngö tö tarik i mupīhö cha nö aṅ in cha nö ṙòkhöre, tarik töt pa-ekūö aṅ Sōrah, aṅ Esta-òl inrē, ulāikö matre töm panam nö chöhö e; ngö ṙô cha-a tö cha, Kuṙòh, chöh ngam panam: sölta cha-a ngaich nö ik rung panam Ifrēm, nö i patī Maika, ngaich hachūöklöre nö umuh.

³Ngaich hē cha nö i patī Maika, akah ëlô ök Lēvi cha-a ṙāl tarik: kāntöre cha-a ngaich nö umuh, ngaich ngö ṙô tö ò, Chiāp tökumuṙen tö meh ihih? Asuh ap inrē lā-en meh in ngih chūökö? Asuh ap inrē in meh ihih?

⁴Ngaich ngö ṙô anga-aṅ tö cha, Ngö inlaha tī öp Maika tö chu, haṙāyö chu ap inrē, ngaich chū-ö vītuṙen kūönṙô ò.

⁵Ngaich ngö ṙô cha-a tö ò, Ve-ekūö meh in, havëkö inlēnö man im Tēv hòṅ ih akahalōn, yē ngih talöökö ih kiröönngöre min nö takôlò.

⁶Ngaich ngö ṙô ök kūönṙô tö cha, Ngaich yin kuṙòh im kumchikṙen: ikūö ngam Mā Tēv an ngam talöökö yīö kiröönngöre.

⁷Kiröönngöre ngaich yik tötaneui tak tarik, ngaich sölta nö i Lāis, ngaich meuk yik tarik aṅ e nö öt pa-ekūö nö iyöng, sā yip aṅ Sītōn, ṙēm nyatlö inrē; pòn öt mahayönguvö im panam öp töchökhuṙen tö cha i nuk inlaha cha, marôvat cha-a inrē tö yip aṅ Sītōn, öt nôlta inrē nö i holre tarik.

⁸Yih cha-a ngaich nö i yik holre i Sōrah, Esta-ōl inrē; ngaich yik hol cha nö ngö ṙô tö cha, Sitih ṙô öyih?

⁹Ngaich ngö ṙô cha-a, Chōholre, tā-a töi kiröönngöre lāḵlö cha: matö ih ngaich meuk öp panam, ngëcha, tölngö tölöök ap: öt halöinyköre öyih? Uh yin ṙahata kiröönngöre öi kuhēt in e kē ngam panam.

¹⁰Yē yīö pöchö kiröönngöre yih yin min i yip tarik tönyatlö, kiröng ap inrē panam: kētö e an ngam Tēv nö eltī yīö; chūökö ap chūök hī öthāṅten tö nup chehen ing panam.

¹¹Tafūölòng ngaich yik tarik nyamëklö nuk aṅtī kumyung nö in cha nö ngaich nö kiröönngöre nö ṙā-ang i mupīhö Tën, ṙā-ang Sōra Esta-ōl inrē.

¹²Kiröönngöre cha-a ngaich, ngaich iyöngtöre nö i Kīriatyēarim, i Yūtā; lökten cha nö kaheuk ök chūök nö Mahanehtan söl ing töngamuh: meūkö e lāmuh ap tö Kiriatyēarim.

¹³Ṙā-ang umuh cha-a ngaich nö chuh ip rung panam Ifrēm, ngaich sölta nö i patī Maika.

¹⁴Kaknyöre ngaich yik tö taneui tak tarik yik mu-ulāikö matre nö ngëichngö ngam panam Lais, ngö ṙô cha-a tö yik holre, Akahalōn öyih tö në patī nö aṅhaṅv tö fanūmṙat, insā tarik insātēv, töhaṙöichö inrē insā? Lökten yīö pöchö meuk öp inlahenre.

¹⁵Kānngöre cha-a ngaich nö umuh, ngaich yihtö re nö i patī ök Lēvi ṙāl tarik, i patī Maika, ngaich hatönken lanööken ò.

¹⁶Ngaich yik tö tafūölòng tarik tönyëkhak aṅ in tö aṅtī kumyung nö söktöhëich nö ik inkūp lökhöt, yik aṅ i yik kūön Tën.

¹⁷Ngaich yik tö taneui tak tarik kumröönngöre, nö ulāikö matre töm panam, ngaich yihtöre nö umuh, ngaich kē öp insātēv, tök fanūmṙat tök insā tarik ök töhaṙöichö insā inrē: ik lökhötkūö inkūp ök kūönṙô nö sökhak nö holtö yik tötafūölòng tarik tönyëkhak aṅ in tö aṅtī kumyung.

¹⁸Ngaich hē cha nö kuhēthötre nö el patī Maika nö kē ök insā tēv tök fanūmṙat tök insā tarik, ök töhaṙöichö insā inrē, ngö ṙô ngaich ök kūönṙô tö cha, Suh ap la-en yīö?

¹⁹Ngaich ngö ṙô cha-a tö ò, Um ṙò-òv, tilupngö elvāngre man tö eltīre, ngaich tā-a in ih, öm yöng ih kūönṙô inrē: ĕhten ṙöng öm höng kūönṙô i patī töhĕng tak tarik, hēk sitih röng i töhĕng miyöngö hòng, i mupīhö in Israĕl inrē?

²⁰Ṙāmölōn ngaich ngam kūönṙô, kē ök fanūmṙat anga-aṅ ngaich, tök insā tarik, tök insātēv, ngaich chuh elṙôngö yik tarik.

²¹Havöökūöre cha-a ngaich nö kiröönngöre, halānyu yik nyīö tö nuk nuā tö nuk chehen inrē nö lā kūö cha.

²²Hē cha nö ngaich nö löökö rôvat tö patī Maika, ngaich yik tarik aṅ nuk patī tö röhta nö i patī Maika nö hamūlöre, kôlò ngaich nö i yik kūön Tën.

²³Hūkö yik kūön Tën cha-a ngaich. Tēklö kūöre cha-a ngaich, ngaich ngö ṙô tö Maika. Suāp halöny meh töp lökten meh yih i tö ngatī ṙôngö?

²⁴Ngaich ngö ṙô anga-aṅ tö cha, kēngö nuk tēv chu yin chöh nuk vahī chu, tök kūönṙô inrē ngaich nö kiröönngöre, asuh ap tö ōtre nö in chu? Ngaich sitih yī-ö ngö ṙô tö chu, Suāp halöiny meh.

²⁵Ngaich ngö ṙô yik kūön tö ò, Uh ap yēḵ ṙô meh nö hāngö nö in ih, hòṅ yip yô-òv tötainy tarik nö öt fëlö meh, ngaich chuhu nômö më-eṅ min, nö holtö nômö yip aṅ patī meh.

²⁶Kiröönngöre ngaich yik kūön Tën: ngaich hē Maika nö meūkö cha nö kalēḵ tö ò, havöökūöre ngaich anga-aṅ ngaich havan nö i patīre.

²⁷Ngaich cha-a nö kē nuk vahī Maika tök kūönṙô ò inrē, ngaich yih nö i Lais, in yik tarik töṙēm tönyatlö inrē, fëlngen cha ngaich nö aṅtī tö sanët, ngaich cha-a nö haṙāpngö ök elpanam nö aṅtī tö tameūyö.

²⁸Öt ṙamānyu nö umuh, pò e nö marôvat tö Sītōn, öt tö nôlta cha-a inrē nö i holre; el achāṙö angū-ö inrē nö ranghö Pĕtrehòp. Vīlök elpanam cha-a ngaich, ngaich iyöng in e.

²⁹Tën ngaich ök elpanam nö kaheūkö tö cha sā minë-eny ök yöng cha ang Tën ök kūön Israĕl: Lais pöri ök minënyö ngam elpanam nö lā-urĕh.

³⁰Ngaich yik kūön Tën nö vīlö ök insātēv: Ngaich Yônatan ök kikōnyö kūön Kirsōm, ök kikōnyö kūön Môsös, anga-aṅ tö yik kikōnyö kūön ò inrē nö kūönṙô yik miyöngö Tën söl ik sakāmö inkövö ngam panam.

³¹Ngaich cha-a nö asöklö ök insā tēv Maika ök vahī ò, i rô-òten ök patī ngam Tēv nö i Sailō.