Read Car_Nicobarese KAMHÔKA 21 Bible Online

KAMHÔKA 21 - Car_Nicobarese bible

KAMHÔKA 21

¹Chūöku ṙô ngaich yik tarik Israĕl nö kilēḵngôre i Mispah, nö ngöṙô, Öt hĕng tak min tö hī kamëtö kūönre tö kikānö nö pīhö aṅ Penyamin.

²Yih ngaich yik tarik nö i Pētĕl, ngaich i kūö ngam Tēv nö ūichhak söl harap, pōitô ngaich cha-a nö ayôṙa, kalē-ĕ ṙô inrē nö peuiny.

³Ngö ṙô cha-a ngaich, Ō Mā Tēv, Tēv Israĕl, kūöyòh öng ngih nö yih nö in Israĕl, nö hĕnghang miyöngö min törö-ö in Israĕl?

⁴Ngaich im huṙöich, yik tarik nö ka-eūilökūö nö choholre, vīlö ök tahāklö ngaich ngaich kētö töföngö tökētu, tökētu inrē nö inlām.

⁵Ngaich yik kūön Israĕl nö ngö ṙô, Achiāp i miyöngö Israĕl nö ṙòkhöre öp töt yamih nö im inmūlö im Mā Tēv? Pò cha nö kirööngen ṙô nö chūökuṙô nö kilēḵngôre tö ò öp töt yamih nö im Mā Tēv nö i Mispah, nö ngö ṙô, Hakò-òi vah ap min nö kumpaha.

⁶Ngaich yik kūön Israĕl nö havöötö ellōnre nö ik kahëm cha Penyamin, ngaich ngö ṙô, Hĕng hang miyöngö ök töngamuh töröki in Israĕl:

⁷Sitih inlahen öi min tö pīhö cha yip tö ōtren, tö hī yih ngaich kilēḵngôre chūökuṙô im Mā Tēv tö hī min öt kētö kūönre tö kikānö nö pīhö cha?

⁸Ngaich ngö ṙô cha-a, Achīö ap töhĕng hang tak aṅ miyöngö Israĕl töt yamih nö im Mā Tēv nö i Mispah? Ngaich meūkö nö öt hĕng tak yamih nö im elyöngö manūlö ṙameū-eung Yapeskilīöt.

⁹Pòn hē më tarik nö kaheūkö, ngaich öt hĕng tak aṅ Yapeskilīöt umuh.

¹⁰Ngaich yik tömaṙôngö nö tīnngö tarik nët sīön köny töt pa-ekūö, ngaich ngö ṙô nö tölṙô cha, Kuṙòh aṅtī tö sanët yin fëlngö yip aṅ Yapeskīlīöt, kumngöre tī tö kikānö tö nyīö inrē.

¹¹Angū-ö ön min ngih tī yīö; keuheūtngöre vahtī yin fëlngö kikōnyö, kikānö inrē töyōmu tö kikōnyö.

¹²Ngaich cha-a nö kôtikūö tö aṅ Yapeskilīöt fënòng tö ayal rēlö, tö-öl nö akahakūö tö tarik nö holtuṙah: ngaich cha-a nö kēten cha nö ik elyöngö i Sailō, öp i panam Kanā-an.

¹³Ngaich yik tömaṙôngö nö tīnngö vamë-eṅkūö yik kūön Penyamin yik me-el ök ihong Rimōn, ngaich ahangken cha tölanöökö.

¹⁴Havan ngaich Penyamin hē e; ngaich cha-a nö kētö yik kikānö nö in cha yik tö-aṅ aṅ i yik kikānö i Yapeskilīöt: sön pöri cha-a nö öt kô-òre kūö tö cha.

¹⁵Havöötö ellōnre ngaich yik tarik nö in Penyamin, pò ngam Mā Tēv nö hôingötī tö miyöngö Israĕl.

¹⁶Ngaich yik makūö yik tömaṙôngö nö ngö ṙô, Sitih inlahen öi min tö pīhö cha yip tö-ōtren tö yik kikānö in Penyamin nö keuheūtngöre vah nö ngaich?

¹⁷Ngaich ngö ṙô cha-a, Hòṅ amīnu yip cha-a yip töt kô-òngvah aṅ in Penyamin, hòn öt hĕng hang miyöngö tö sīchiyö nö ṙā-ang Israĕl.

¹⁸Uh pöri ayī-ö kētö pīhö cha tö kūönre kikānö pò yik kūön Israĕl nö chūöku ṙô nö kilēḵngôre, nö ngö ṙô, Rūtivah öp min kamëtö pīhö Penyamin.

¹⁹Ngaich ngö ṙô cha-a, Yĕh meuk kaheuk samyeūheu öp paratīn ngam Mā Tēv i Sailō, öp lā kapā tö Pētĕl, lā chuhöt töp tökiröng talöökö chamuh Pētĕl nö söl Sīkem, lā lòhngö inrē tö Leponā.

²⁰Ngaich ngö ṙô cha-a nö töl ṙô yik kūön Penyamin, Kuṙòh höng yin el nup panô-òṅ vāin;

²¹Ngëicha inrē yē yip kikānö kūön aṅ Sailō nö yih nö kiṙīöm nö i nup kinṙīömö, ngaich meutnyi yī-ö ṙā-ang el nup panò-òṅ vāin ngaich kö kahĕng tak kahë yī-ö tö pīhöre tö aṅ i yip kikānö kūön aṅ Sailō, kiröönngöre ngaich chuh panam Penyamin.

²²Ngaich mīnö yē yip kikōnyö yöng cha hēk inrē yip kanônyö cha nö yihtöre nö ih nö vë-eny miṙivlōnre, ngaich ngö ṙô min īhö tö cha, Kēten cha aṙē-ĕlōn tö ih: tön rö-ö in kö kē pīhö cha ik kinyūngö: rö-ö yī-ö inrē kē-ĕti in cha; yī-ö yin min töfaluṙen yĕi öt ngatī.

²³Ngaich ngatī yik kūön Penyamin, kē pīhöre cha-a ngaich, sā tum tak cha, tö aṅ i yik kumṙīöm, yik tö tayūki tö cha: havantöre cha-a ngaich nö ik aminre, vīlö nuk elpanam ngaich, iyöng ël u ngaich.

²⁴Hē e ngaich yik kūön Israĕl nö kiröönngöre nö ṙā-ang umuh, kö i miyöngöre kö i mupīhöre inrē, kiröönngöre cha-a ngaich nö ṙā-ang muh nö kö löö i amin re.

²⁵Öt rāchavö i Israĕl hē nuk sakāmö anū-ö: höng kö kahngenre ngaich tarik töp töng huveū nö elmatre.