Read Car_Nicobarese KAMHÔKA 3 Bible Online

KAMHÔKA 3 - Car_Nicobarese bible

KAMHÔKA 3

¹Vē yin punāmö tarik töṙātu tö ngam Mā Tēv, nö kinlaha Israĕl tö cha, i tumtak cha nö töt-akahalōn tö nuk kinyūngö i Kanā-an;

²Hòṅ yip tumköl chap yip kūön Israĕl nö huveū-en, nö haköpten cha tö kinyūngö, in cha yip töt akahalōn nö lā-urĕh;

³Vē tö taneui tak mā kūö Fillistian, ṙòkhöre inrē aṅ Kanā-an, Sītōn, yik Hivait inrē ip rung Pē-al Harmòn söl ip lökhöt i Hamat.

⁴Acha-a yin kinlaha Israĕl, nö minkahtölōn yē cha min nö hang nup chöngö ngam Mā Tēv, nuk tinöölô yik muvöhngö cha tö ò nö löktö eltī Môsös.

⁵Ngaich yik kūön Israĕl nö iyöng nö in yik aṅ Kanā-an; Hitait, aṅ Amôr, aṅ Përis, aṅ Hiyi, aṅ Yëpus inrē:

⁶Ngaich cha-a nö kē yik kūön cha kikānö nö pīhö cha, kētö yik kūönre cha-a inrē kikānö nö pīhö yih kūön cha kikōnyö lök la-en nuk tēv cha inrē.

⁷Ngaich yik kūön Israĕl nö la-evṙen tö tötlöök nö i kūö ngam Mā Tēv, ngaich vaichngö tö ngam Tēv cha ngam Mā Tēv, lök la-en nup Pē-al ngaich tö nup Asēròt inrē.

⁸Lökten ngam lanīnö ngam Mā Tēv nö tōttöre kūö nö in Israĕl, ngaich inyihngen cha anga-aṅ nö eltī Kusānrisaēm rācha aṅ Mesopotamiā: ngaich yik kūön Kusānrisatēm.

⁹Ngaich yik kūön Israĕl nö peunyhökūö ngam Mā Tēv, hĕng tak hachohlö ngaich ngam Mā Tēv tö mahayööken yik kūön Israĕl, ök mahayööken cha, ang Otnīĕl ök kikōnyö kūön Kēnās, ök manāngö kahëm Kalĕp.

¹⁰Teungtöre ngam fanöinylö ngam Mā Tēv nö i kui ò, ngaich akahfālen Israel anga-aṅ; kiröönngöre inrē anga-aṅ nö kiyung, ngaich ngam mā Tēv nö kēten Kusānrisatēm nö in ò; mihôiṅ anga-aṅ nö lā-al Kusānrisatēm.

¹¹Fën anāi samyeūheu ngaich ngam panam nö heū-heure. Ngaich Otnīĕl nö kapah ök kikōnyö kūön Kēnās.

¹²Ngaich hēk yik kūön Israel nö la-evṙen tö tötlöök nö i kuö ngam Mā Tēv: ngaich ngam Mā Tēv nö hangëlen Ĕklòn ök rācha aṅ Mô-āp nö lā-al Israel, pòcha nö kēken tötlöök nö i kūö ngam Mā Tēv.

¹³Ngaich anga-aṅ nö hamūl yik kūön Amön nö in ò kūön Amelek inrē; kiröönngöre ngaich anga-aṅ ngaich kiyūngö Israĕl, ngaich kē ngam elpanam kachūr, cha-a.

¹⁴Hëvhör sīön samyeūheu ngaich yik kūön Israel nö kūön Ĕklòn ök rācha aṅ Mô-āp.

¹⁵Hē yik kūön Israĕl pöri nö peunyhökūö ngam Mā Tēv, ngaich hĕng tak hachohlö ngam Mā Tēv tö mahayööken cha, tö Ēhöt ök kikōnyö kūön Kēra, ök Penyamin, tötavē nö tarik: ngaich yik kūön Israĕl nö sööm-ngö raneushö Ĕklòn ök rācha aṅ Mô-āp, nö kum ò.

¹⁶Vī sanëtre ngaich ang Ēhöt tök tö-āṅngöre keūtö, töhĕng sukmôngö rôta; hīötlen ò ngaich anga-aṅ nö el inyut ò i lāhāmötakeun ò.

¹⁷Kētö ök raneushö anga-aṅ ngaich nö in Ĕklòn ök rācha aṅ Mô-āp: tökiröng alaha ök Ĕklòn nö tarik.

¹⁸Ngaich hē ò nö keuheūtötī nö kētö ök raneushö, tīnngörit yik tarik ngaich anga-aṅ yik tö kum tök raneushö.

¹⁹Havantöre pöri anga-aṅ nö ṙa-ang i nup chūök vinī-ī insā tēv ihong nuk mī-i Kilkāl, ngaich ngö ṙô, Ō rācha, kūmuṙen chin in meh töp tö ulāikaṙen ṙô. Ngaich ngö ṙô anga-aṅ, Un ṙô-òv. Ngaich ṙòkhöre yik mī-in ò tösökhakṙen nö ṙāngen ò nö kunyī-inyre.

²⁰Yihtöre ngaich Ēhöt nö in ò; ūichhakṙen anga-aṅ nöng hĕng töṙah nö el öp chūök mumfōv elmat lātulöng. Ngaich Ēhöt nö ngö ṙô, Kūmu chin tö ṙô in meh aṅ im Tēv. Hōklöre ngaich anga-aṅ nö ṙā-ang el öp anūichöre.

²¹Ngaich Ēhöt nö sëphöt kūö ök lātavēre, ngaich hōknyö ök sanët nö ṙā-ang ik lāhāmö takeun ò, saphötkūö ò ngaich nö i aich ò;

²²Talöphötvö inrē ök haṙah nö unôichrit ök kūö ò; ngaich ök tö sangöö ò nö lömtörekūötī tök kūö ò, pò ò nö öt hōknyö kūö ök sanët nö ṙā-ang i aich ò; tafunköiny kūö nö lā uk.

²³Ku-nyī-inyre ngaich Ēhöt nö el ök ranang taseū, öpngökūö ò anga-aṅ nö el ök lööṙö yamih, nö keuheūt tö kūö nuk inkūp, hachāp ngökūö u.

²⁴Ngaich hē ò nö ngaich nö elkahôyö, yih ngaich yik tarik Ĕklòn; ngaich meuk cha-a yĕh meuk, öphakkūö nuk inkūp ök lööṙö yamih nö köpö kūö; ngaich ngö ṙô cha-a, kahumngö kunröönre ap lohten nö el ap chūök mumfōvöre urôhò.

²⁵Ngaich höngngöh cha-a hanöng saha cha ngaich nö aṙē-ĕv: ngaich yĕh meuk, hö-ö anga-aṅ nö löpnyökūö nuk inkūp, ök lööṙöyamih; lökten cha nö kē chāpi, ngaich löpnyö kūö u: ngaich meuk ök mā re cha-a nö fukngö nö kapah nö el tumlat.

²⁶Falngöre ngaich Ēhöt i saha chān ṙòngmö höka, ngaich vāngngö röön nö chööḵngö ök chūök vinī-i insā tēv ihong, ngaich i Seirah anga-aṅ nö falngöre.

²⁷Ngaich ngö inlahen angū-ö, hē ò nö ngaich nö sölngö, ip rung panam Ifrĕm anga-aṅ nö föö öp römpet, ngaich hol ò yik kūön Israĕl nö peūtöre nö ṙā-ang im rung panam, urēhĕkūö cha anga-aṅ.

²⁸Ngaich ngö ṙô anga-aṅ tö cha, tömrit chu: tön kēlö yip lā-al yīö an ngam Mā Tēv nö eltī yīö yip aṅ Mô-āp. Ngaich cha-a nö peūtöre nö tömrit ò, ngaich kē nuk lökngö invāngngö i Yôtön nö lā-al yik aṅ Mô-āp ngaich öt hĕng tak halöngten tö tarik nö havāngngöre.

²⁹Kiyūngö Mô-āp cha-a ngaich hē e lohten nö söm köiny yik tarik, nö tö kalēḵ nyöre nö tarik, nö töt pa-ekūö inrē nö tarik; ngaich öt hĕng tak tarik tökô-òngvah.

³⁰Hē e angū-ö sakāmö Mô-āp nö tumṙeūtu nö eltī Israĕl. Ngaich ngam panam nö hëvhöre anāi samyeūheu nö heūheure.

³¹Unôichrit ò ang Samkār ök kikōnyö kūön Anat, ök kumyung yik aṅ Filistian, tafūölòng tarik nöng aṅtī tö lanòkrit nuā: anga-aṅ inrē mahayööken yik aṅ Israel.