Read Car_Nicobarese KAMHÔKA 5 Bible Online

KAMHÔKA 5 - Car_Nicobarese bible

KAMHÔKA 5

¹Tikökṙôre ngaich Tipōre tö Parök inrē ök kikōnyö kūön Apīnō-am ik sakāmö angū-ö, nö ngö ṙô.

²Pò yik yöngṙen nö hachōḵ nö in Israĕl, pò yik tarik nö hol tö ellōn re nö kēngöre, hakôlò ngam Mā Tēv yin.

³Hangihtöre, Ō yī-ö rācha; kētö elnang re Ō yī-ö kūön rācha; tikökṙô chin min im Mā Tēv; tinköknyö nöönyö ngam Mā Tēv chin min ngam Tēv Israĕl.

⁴Mā Tēv, hē Meh kunyī-inyre ṙā-ang Sīör, hē Meh kiröönngöre ṙā-ang el öp töngā i Ētöm, kichëyöre ngaich ngam tumlat, suktöre inrē minë halīöngö, hòn kitak tö mak minë taṙul.

⁵Kayīna minë ṙôngö nö ikūö ngam Mā Tēv, uroh öp umū- aṅ Sināi nö i kūö ngam Mā Tēv, ngam Tēv Israĕl.

⁶I nuk sakāmö Samkar ök kikōnyö kūön Anat, I nuk sakāmö Ya-ĕl, Öt aṅ- havkūö nup tökiröng talöökö, ngaich yip kumröönngöre nö el nup tökūöṅnö talöökö.

⁷Öt ōtren yik mahayöng in Israĕl, öt ōtren cha-a, hanöng saha chu chū-ö Tīpōra choholre, choholre chū-ö öich yöngnyīö in Israĕl.

⁸Atöllö tufömngöre cha-a tēv re ngaich kinyūnguvö i kūö inkup: Meūkö hòng hĕng lanaklö hēk vöi nö in yik tö fën anāi köny in Israĕl.

⁹Lā in yip mahayöngö Israĕl öp lōn chu, yip tö hol tö ellōnre nö kēngöre aṅ i yip tarik. Hakôlò ngam Mā Tēv yin.

¹⁰Vë-eny e, yī-ö mī-i uk tö-isoh köttö, yī-ö amūichhaka el tökôlò inṙĕhtö el patī, yī-ö inrē lamök el ngam talöökö.

¹¹Marôvat tö ṙënṙô yip lum- reiny, i chūök finôkö mak, umuh cha-a min nö ahang- nyö nuk tölöök tī ngam Mā Tēv, nuk tölöök tī inyöngö Israĕl. Ngaich yip tarik ngam Mā Tēv nö chuh kūö inkūp.

¹²Choholre, choholre, Tīpōra; Choholre, Choholre, kaknyö tinkökö: Hōklöre, Pērak hachōḵ ngam töhakövö tö meh nö hakövö më-eṅ kikōnyö kūön Apīnō-am.

¹³Ngaich peūtöre öp chööḵṙen yip mā tö yip tarik inrē; yônti ngam Mā Tēv nö in chu lā-al ngam tökalēḵ.

¹⁴Löknyö in Ifrēm cha-a yip ṙĕh in Amelek; unôichrit meh, Penyamin i vē tarik meh; Löknyö Makīr nö peūtöre yip mahayöng, Löknyö Sepulòn inrē cha-a yip kumṙapkö tinkung minā-aṅ öp miyöngö.

¹⁵Hol Tīpōra inrē yip kūön rācha Isakār; Sā Isakār, ngatī ang Pērak; El achāṙö cha-a nö haṙömtöre nö iröön ò. I nup talöökö mak Rūpön. In e nup tökiröng vīni-il ellōn.

¹⁶Kūöyòh ömeh höng ūich- haka i chūök kinlōngö sīṅp, Öm hangihtöre tö ṙô finöökö nup sīṅp? I talöökö mak Rūpön In e öp tökiröng chanöh ellōn.

¹⁷Höngngöh Kīlīöt nö lāmuh tö Yôtön: Tën inrē, kūöyòh ang anga-aṅ nöng ngöh nö el chōng? Ūichhaka Asēr nöng öt halöny- köre nö elsanāṙö ngam mai, Iyöng inrē nö el nup kun töhëm mak.

¹⁸Sepulön an tarik mahakihten nômöre nö im kinpaha, Naftalī inrē lamā kui nup chūökö el töngā.

¹⁹Yih yik rācha ngaich kiyung: möl nö kiyung yik rācha aṅ Kanā-an, I Tē-anak i nup mak i Mekītō; Öt kē taneūngenre cha-a tö rupīö.

²⁰Löktö el halīöngö cha-a nö kiyung, Ip talöököre minë taneūsömat nö lā-al Sīsërā nö kiyung.

²¹Ahëmi cha-a ngaich töm tahël Kisòn, ngam hötṙeh tahël, ngam tahël Kisòn. Ō nômö chu, iṙuhöröön man holtö kumlēḵ.

²²Tirëpöre ngaich kunröön kōra kūö ngam hinṙeūtlö röönre. Ngam hinṙeūtlöröön yip tökalēḵ.

²³Tötkôlò man më-eṅ Mērōs ngö ṙô ngam ma-ahānga ngam Mā Tēv, kalēḵĕ ṙô yin rūtngövah yip aṅ in e; pò cha nö öt yih nö holṙen ngam Mā Tēv. Nö holṙen ngam Mā Tēv nö lā-al ngam tökalēḵ.

²⁴Tökôlò an yēḵ Ya-ĕl min tūlöng tö kikānö, ngam pīhö Hīpör ök aṅ Kēnait, tökôlò an yēḵ min tulöng tö kikānö el rūkui.

²⁵Havëkö mak anga-aṅ, ngaich anga-aṅ nö kē-ĕkūö ò tö aṅteh; Kētö ta-öng aṅteh anga-aṅ nö in ò nö el chūök kūö mā.

²⁶Kētö tīre anga-aṅ nö ik tumnôkö rūkui, ngaich ök lāhāmö kël ò nö im mūngöre töla-evṙen; aṅtī tö ngam mūngöre anga-aṅ inrē nö fëlngen Sisërā, löktö elkui ò tī anga-aṅ nö fëlan, hòṅ, tafūnitī anga-aṅ nö löktö elkui inrē nö tōkhöti.

²⁷Iröön ò anga-aṅ nö sōnngöre, fukngö anga-aṅ, hulalhaka anga-aṅ; iröön ò anga-aṅ nö sōnngöre, fukngö anga- aṅ: I chūök ò nö sōnngöre, umuh anga-aṅ nö fukngö nö kapah.

²⁸Löknyö kūö inkūp kuföt anga-aṅ nö môknyö kūö re, ngaich hū-a nö ngö ṙô, Hū-a ök yöngnyīö yöng Sīsërā nö löknyö tinlāchö mat inkūp, Kūöyòh öpvöh inröl ò nö marô- òtö röön nö yih? Kūöyòh nup kalröön inröl ò nö sökngöre.

²⁹Sap ṙô ò ngaich yik in ò tö-akaha kikānö, Hôṅ, höng sap ṙôre anga-aṅ,

³⁰Röh yip nö kôtökūö, röh yip nö michööḵöre tö pôre? Hĕng tak rēlö, nët tak rēlö i töhĕng tak tarik; Pôk Sīsërā nup töṙōlkangen mat hīla, Pôḵ ò nup töṙōlkangen mat töchōktu mirun, nö töṙōlka- ngen mat töchōktu mirun nö āṅngöre lā-a nö i likeun yip pôḵ.

³¹Ō Mā Tēv, hökngen yip lā-al meh yēk, nö ngatī nö lëlngö! hökngen cha pöri yip töhān- genlōn tö ò sā ngam tavūöi yĕn kiröönngöre nö ip kumlēḵ matre. Fën anāi samyeūheu ngaich ngam panam nö heūheure.