Read Car_Nicobarese KAMHÔKA 6 Bible Online

KAMHÔKA 6 - Car_Nicobarese bible

KAMHÔKA 6

¹Ngaich yik kūön Israĕl nö la-evṙen tö tötlöök nö i kūö ngam Mā Tēv: ngaich kēten cha ngam Mā Tēv nö sat samyeūheu nö eltī aṅ Mītīa.

²Mihôiṅ tī ngaich yik aṅ Mītīa nö lā-al Israĕl: ngaich kūö yik aṅ Mītīa yik kūön Israĕl nö vī chūökre tö kinluhu nö i nuk rôngö, tökiröng nuk töngëḵ inrē chūökö.

³Ngaich ngö inlahen angū-ö, hē yik Israĕl nö teūich, ngaich yik aṅ Mītīa nö yih, tö yip aṅ Amelek, tö yip kūön aṅ lā chuhöt inrē; yih cha-a nö lā-al cha;

⁴Iyöngtöre cha-a ngaich nö lā-al cha, ngaich halëlngö nuk ṙòng ngam tumlat, nö sölngö nö i Kāsā, öt ṙātö nyā-aṅkūö yik Israĕl, öt rēhĕn sīṅp, öt rēhĕn nuā, öt rēhĕn köttö.

⁵Pò cha nö yih nö kumtö nuāre rūkuire inrē, yih cha-a sā mufākö töṙôngöre; acha-a nyöre tö nuk ūṅt cha öt kanṙeūken: yih cha-a nö im panam nö halëlngen e.

⁶Ngaich yik aṅ Israĕl nö yāichngen tökūö yik aṅ Mītīa; peunyhökūö ngam Mā Tēv ngaich yik kūön Israĕl.

⁷Ngaich hē yik kūön Israĕl nö peunyhökūö ngam Mā Tēv tökūö yik aṅ Mītīa,

⁸Ngaich tīntö Pròfĕt ngam Mā Tēv nö in yik kūön Israĕl: ngö ṙô anga-aṅ tö cha, Ngö ṙô an ngam Mā Tēv, ngam Tēv Israĕl, Kē-ĕ meh chin ṙā-ang el ap patī inkövö;

⁹Ṙānyen meh chin inrē ṙā-ang eltī yip aṅ Aikup, ṙā-ang eltī yip mahakihten yīö nö ṙòkhöre, ngaich ahōngen cha nö ṙā-ang i kūö yīö, kē-ĕkūö yīö inrē tö panam cha;

¹⁰Ngö ṙô chin ngaich tö yīö, Tēv yīö chin chū-ö Mā Tēv; uh yin pa-ekūö tö nup tēv aṅ Amôr yip tö iyöngö panam tö yīö: ngaich rö-ö yī-ö hang ṙô chu.

¹¹Ngaich yih ök ma-ahānga aṅ im Mā Tēv, ngaich ūichngöre nö elkatòh ök ōk mi-i Ôfrah, Yô-as ök minë-eny ò aṅ Apiēsör ngaich Kītīön ök kikōnyö kūön ò nö piṙōng ṙòng vīt nö ik kinrān vāin, nö hayunngö e tö yik aṅ Mītīā.

¹²Meūkö ngaich tö ò ök ma-ahānga aṅ im Mā Tēv, ngö ṙô anga-aṅ tö ò, In meh An ngam Mā Tēv më-eṅ tökalēḵ tarik öm tömihôiṅ.

¹³Ngaich ngö ṙô Kītīön tö ò, Ō Mā chu, yē ngam Mā Tēv nö in ih, kūöyòh pönri në lāinyngen nö in ih? Isuh nuk inrē pinngangkūö la-en nuk tö-eūka tö yik muvöhngö ih, nö ngö ṙô, Röh ang misī ngam Mā Tēv nö kēnyen hī ṙā-ang Aikup? Ngaich pöri töngamuh ngam Mā Tēv nö kavalngen ih, kēten ih inrē eltī aṅ Mītīa.

¹⁴Hatīönken ò ngaich ngam Mā Tēv, ngaich ngö ṙô, Kuṙòh i ngih kumlēḵ man kiröönngöre, hayöölen Israĕl ṙā-ang eltī yip aṅ Mītīa: röh öich chū-ö tamīnngen meh?

¹⁵Ngaich anga-aṅ nö ngö ṙô tö ò, Ō Mā, aṅtī tö yòh öich min hayöölen Israĕl? Yĕh meuk, manā-angkūö yanāchö öp mupīhö chu nö in Manāsē, ngaich chū-ö inrē tökūönö kūö yip aṅ patī öp yöng chu kikōnyö.

¹⁶Ngaich ngam Mā Tēv nö ngö ṙô tö ò, Kô-en chin min in meh, ngaich më-eṅ min fëlngö yip aṅ Mītīa sā nyaha töng hĕng tak tarik.

¹⁷Ngaich ngö ṙô anga-aṅ tö ò, Yē chu tö inkôluṙô öich i kūö meh, hameukhömat chu yēḵ töp hĕng minkahngö tö meh öm më-eṅ va-me-eṅkūö chu.

¹⁸Vë-ekūö meh chin, uh man kē-ĕngre ihih, hanöng saha chu yih in meh, öich kumtö öp tökētu, ngaich ṙātö e nö i kūö meh. Ngaich ngö ṙô anga-aṅ höngngöh chin hanöng saha meh yih hēk.

¹⁹Kuhēthötre ngaich Kitīön, ngaich halēn ök kun pököre, hĕng nyanum inrē ök atra tötaföhlöng ṙôti: chaplö ök alaha anga-aṅ nö el kuvôkö, asëlö ök hūt inrē nö el tanīöyö, ngaich kēnyen e nö in ò nö elkatòh ök ōk, ngaich kēten e.

²⁰Ngaich ngö ṙô tö ò ök ma-ahānga aṅ im Tēv, Kē ngam alaha man tö minë rôti inrē tötaföhlöng, ṙātö u i kui ngòh ihong, ṙösnyö ngam hūt inrē ngaich ngatī tī anga-aṅ.

²¹Ngaich ök ma-ahānga ngam Mā Tēv nö sōngtörit tinkung re nö eltī ò, ngaich sūöhkö ök alaha tö nuk tötaföhlöng rôti; hūlökūö ngaich ök tameūyö nö löklö kui ök Ihong, ngaich ṙāpngö kūö tök alaha tö nuk tötaföhlöng inrē rôti; ṙā-ang i kūö ò ngaich ök ma-ahānga aṅ im Mā Tēv nö chaṙēviṙen.

²²Meuklöre ngaich Kitīön tö ò nö ma-ahānga aṅ im Mā Tēv; Aōla Ō Mā Tēv! Ngö ṙô ang Kitīön, Pò chu ngaich kôtamat meuk kūö ma-ahānga aṅ im Mā Tēv.

²³Ngaich ngam Mā Tēv nö ngö ṙô tö ò, Lanāmö yēḵ in meh; um pa-ekūö: öthō man kapah.

²⁴Ngaich Kitīön nö vīlö tahāklö im Mā Tēv, ngaich kaheūkö e nö Yavē Salom; ōtren ap töngamuh nö i Ôfrah yip aṅ Apisārī.

²⁵Ngaich im hatööm e angū-ö, ngaich ngam Mā Tēv nö ngö ṙô tö ò, Kē kōiny nuā ap yöngre man kikōnyö, ap innët nòng kōiny nuā ap tösāt samyeūheu ṙēti tiṙölngö ngam tahāklö Pē-al ap ip yöng meh kikōnyö, kūöltö ap Asēra ap ël e:

²⁶Ngaich vīlö tahāklö ngam Mā Tēv ngam Tēv meh nö i kūi ngih töngëḵ chūökö, lēnö tī, ngaich kē ap innët nòng kōiny nuā, kētö töföngö tökētu nö ngòh tö nup chōn Asēra öp tökūöltu tö meh.

²⁷Söm tak ngahôṅ ngaich Kitīön tö tarik aṅ i yik kūön alaha ò, ngaich asā ṙô ngam Mā Tēv nö vë-ekūö ò: ngaich kūö ò nö pa-ekūö tö yik aṅ patī ök yöng ò yik tarik inrē aṅ ngam elpanam, lökten ò nö ötkô tösakāmö nö la-evṙen tö e, ngaich höng hatööm anga-aṅ nö la-evṙen tö e.

²⁸Ngaich hē yik tarik aṅ ngam elpanam nö choholre tö peuheū nö ka-euilökūö, meūkö ngaich ök tahāklö Pē-al nö taṙōli, kūöltu inrē Asēra ök më-ël e kētu inrē ök kōiny nuā innët nòng nö el ök tövīlöng tahāklö.

²⁹Ngaich ngö ṙô cha-a tö höö, Tī chīö öng vöh ngih? Keuheūthëṙen cha-a nö hatönken e, ngaich ngö ṙô, Tī Kitīön an öp kikōnyö kūön Yôas.

³⁰Ngaich ngö ṙô yik tarik aṅ elpanam tö Yôas, Kēnyö öp kūönre man kikōnyö, hòṅ ò nö kapah: pò ò nö tiṙōlngö ngam tahāklö Pē-al, kūö ò inrē nö kūöltö ök Asēra ök me-ël e.

³¹Ngaich Yôas nö ngö ṙô tö yik lā-al ò tö sökhaka nö in ò, Hòṅ hayööken ò öyih? Anga-aṅ öp töhòṅ ve-elkui ò, hökngen ò nö kumphaha i saha e nö ṙòngmö peuheū: yĕn tēv anga-aṅ, hökngen ò nö ve-elkuire, pòn hĕng tak ap tumṙōlngö ngam tahāklö ò.

³²Lökten anga-aṅ ik sakāmö angū-ö nö kaheūkö ò nö Yērūpē-al nö ngö ṙô, Hökngen Pē-al nö lā-alkūö ò, tön tiṙōlngö ngam tahāklö ò an.

³³Ngaich ṙòkhöre yik aṅ Mītiā yik aṅ Amelek inrē tö yik kūön aṅ lāchuhöt nö hamūlöre, havāngöre ngaich cha-a ngaich iyöngtöre nö el Achāṙö Yesrīl.

³⁴Teunghökui Kitīön pöri ngam ma-alaha aṅ im Mā Tēv; föönyö kūö ök römpet ngaich anga-aṅ; ngaich yik Apīsarī nö hamūlöre nö tömrit ò.

³⁵Tīnngö ma-ahānga ngaich anga-aṅ nö i Manasē nö keuheūt chūökre; hamūlöre cha-a inrē nö tömrit ò: Tinngö ma-ahānga inrē anga-aṅ nö i Asēr i Sepulòn, i Naftalī inrē; ngaich yih cha-a nö höngkūö cha.

³⁶Ngaich ngö ṙô Kitīön tö ngam Tēv Yē meh min lökten eltī chu hayöölen Israĕl, sāṙô meh ngaich,

³⁷Yĕh meuk, ṙātö ngih chin tösā tūsā sanôi sīṅp nö el ngam chūök pinṙōngö sāiny; ngaich yē ngam sanôi min nöng angū-ö tötachāmu aṅ kui, ngaich nyôṅ nö keuheūtngöre nö el tumlat, ngaich chū-ö min akahalōn tö meh lökten eltī chu hayöölen Israĕl, sā ṙô meh ngaich.

³⁸Ngaich ngatī angū-ö pòn kaeūilökūö anga-aṅ nö choholre im huṙöich, ngaich hamūl nuk sanôi, kicheūichnyö öp tacham ngaich nö ṙā-ang i nuk sanôi, tööḵlö ngaich ök töchilū pingāṅl tö mak.

³⁹Ngaich Kitīön nö ngö ṙô tö ngam Tēv, Uh man yēḵ hūlökūö lanīnö in chu, töich ṙô-òv hēk tö ngih höng hĕng töreheuh: Vë-ekūö meh chin halöngten chu kala höng hĕng töreheuh i në sanôi sīṅp; hökngen minë sanôi sīṅp yēḵ nö nyôṅ, hökngen ap tacham pöri nö keuheūtngöre chūök nö el tumlat.

⁴⁰Ngaich ngati tī ngam Tēv ik hatööm angū-ö: pòn höng nuk sanôi sīṅp tönyôṅ, tachāmu pöri nö el tumlat nö ṙòkhöre.