Read Car_Nicobarese KAMHÔKA 9 Bible Online

KAMHÔKA 9 - Car_Nicobarese bible

KAMHÔKA 9

¹Ngaich ang Apimelek ök kikōnyö kūön Yērūpē-al nö chuh Sikem nö i yik kanônyö ök yöng ò kikānö, ngaich vë-ekūö cha, nö ṙòkhöre yik aṅ patī ök yöng ök yöng ò kikānö nö ngö ṙô,

²Vë-ekūö yīö chin, vëhet elnang yip tarik yin aṅ Sikem nö ṙòkhöre yē e nö tölöök nö in yīö tö yip kikōnyö kūön Yērūpē-al nö ṙòkhöre nö hayöngö yīö yip tösat anāi tum tak, hēk inrē yĕn höng hĕng tak öp mahayöngö yīö? Köpölōn inrē tö chu chū-ö öich tangë yīö alaha yīö inrē.

³Ngaich vënyô ò yik kanônyö ök yöng ò kikānö nö elnang yik tarik aṅ Sikem nö ṙòkhöre tö në ṙô: ngaich nuk ellōn cha nö lā i tinömörit Apimelek; pòn ngö ṙô cha-a, Hanöng kisānö hī öp anga-aṅ.

⁴Ngaich sat anāi nuk rupīö kahëtö cha nö in ò aṅ el patī Pē-alperit aṅtī tö u ngaich anga-aṅ nö haṙāi yip töng kulō-ov tarik, nö mī-in ò.

⁵Ngaich anga-aṅ nö chuh patī ök yöngre kikōnyö i Òfra, ngaich fëlngö yik hanöng kisānöre kikōnyö kūö Yērūpē-al sat anāi tum tak, nö i kui töhĕng ihong: öt kô-òngvah pöri ang Yôtam ök manāngö kikōnyö kūön Yērūpē-al; pò ò nö hayunngöre.

⁶Hamūlöre ngaich yik tarik aṅ Sikem nö ṙòkhöre, ṙòkhöre inrē yik aṅ patī Milō, kiröönngöre ngaich nö vīlen Apimelek nö rācha, nö i röön tö öp ōk ip chūök kumyung i Sikem.

⁷Ngach hē cha nö ve-eny e nö in Yôtam, kiröönngöre ngaich anga-aṅ ngaich söktöre nö i kui öp ṙôngö Kerisim, hachônglöṙôre ngaich anga-aṅ nö hū-a, nö ngö ṙô tö cha, Yī-ö tarik aṅ Sikem hangihtöre yin tö ṙôchu hòṅ yīö hāngö ṙô tö ngam Tēv.

⁸Hĕng heuh nun në chōn nö kiröönngöre nö hacham el kui öp rācha nö hayöngö u; ngaich ngö ṙô cha-a tö ngam ôliv chōn, Hayöngö ih man.

⁹Ngaich ngö ṙô ngam ôliv chōn tö cha, Ṙāngö ngih tö tum-eūm öich min alahare, tö cha ṙung nö lökten in chu nö eū ngam Tēv, tarik inrē, ngaich kiröönngöre min hòng öich kuvāi rōire i kui në chōn?

¹⁰Ngaich ngö ṙô nuk chōn tök fik chōn, Tā-a me-eṅ hayöngö ih.

¹¹Ngö ṙô pöri tö cha ök fik chōn, Ṙāngö ngam pinchāköre öich min, ngih tökôlò ṙòng chu inrē, ngaich kirööngngöre öich kuvāi ṙōi re i kui minë chōn?

¹²Ngaich ngö ṙô minë chōn tö ngam vain, Tā-a me-eṅ, hayöngö ih.

¹³Ngaich ngö ṙô ngam vain tö cha, ṙāngö ngam mak alahare öich min ngam töṙāmölōn tī tö ngam Tēv, tarik inrē, ngaich kiröönngöre öich kuvāi rōire i kui minë chōn?

¹⁴Ngaich ngö ṙô nuk chōn töp töchökhu kaha chōn, Tā-a me-eṅ hayöngö ih.

¹⁵Ngaich ngö ṙô ök töchökhu kaha tö nuk chōn, Yē yīö kô-en hacham elkui chu rācha yīö, ngaich tā-a hayönglenre el nyat chu: ngaich yē yīö hö-ö, hökngen öp tameūyö löknyö im töchökhu kaha, nö haṙāpngö nup sitör i Lepanön.

¹⁶Lökten, yē yīö kô-en inlaha chiplen inrē, i tī yīö vīlen Apimelek nö rācha, yē yīö inrē löökö tī in Yērūpē-al i patī ò inrē, ngaich inrē öi asā nuk lā-en kahëken ò;

¹⁷(Pò ök yöng chu nö kiyunglö kui yīö, hakihten nômöre inrē, ṙānyen yīö inrē ṙā-ang eltī yip aṅ Mītiā:

¹⁸Ngaich yī-ö töngamuh choholre lā-al patī ök yöng chu, keuheūtngöre vah tī ngaich öi fëlngö yik kikōnyö kūön ò, sat anaī tum taka, i kui ök töhĕng ihong, ngaich vīlen Apīmelek nö rācha i kūö vē tarik aṅ Sikem, öp kikōnyö kūön öp mahalanṙen ò kikānö, pò ò nö hanöngkisānö yīö:)

¹⁹Yē yīö ngaich kô-en löökö tī chiplen tī inrē in Yērūpē-al ip patī ò inrē töngamuh, ṙāmölōn yin yēḵ ngaich in Apimelek, hökngen ò inrē anga-aṅ nö ṙāmölōn nö in yīö:

²⁰Yĕn rö-ö pöri, hökngen öp tameūyö nö löknyö in Apimelek nö tōttörekūö, ngaich haṙāpngö yip tarik aṅ Sikem, töp patī Mīlō inrē; hökngen öp tameūyö inrē nö löknyö in yip tarik aṅ Sikem nö tōttörekūö löknyö i patī Mīlō inrē, nö haṙāpngen Apimelek.

²¹Falngöre ngaich Yôtam, ngaich meutngö, ngaich chuh Pīr, iyöng in e ngaich, kūö pinhë-eṅkūöre tö Apimelek ök mëm ò.

²²Lūöi samyeūheu ngaich Apimelek nö rācha kūö Israĕl,

²³Ngaich ngam Tēv nö tīntö öp tötlöök sī-ö nö ihôi Apimelek tö yip tarik inrē aṅ Sikem; ngaich yik tarik aṅ Sikem nö ulāingö vah lōnre tö Apimelek:

²⁴Hòṅ ök chanökhuṙentī ò tö yik tösat anāi kikōnyö kūön Yērūpē-al nö yih, hòṅ ṙātu nö i kui Apimelek öp hanöng kisānö cha, ök famëlngen cha, i kui yip tarik inrē aṅ Sikem, yip mahangëlö kël ò nö fëlngö yik hanöng kisānöre.

²⁵Ngaich yik tarik aṅ Sikem nö ṙātö tarik töminyôinyaṅ nö hayūnan nö i kui nuk rôngö, ngaich cha-a nö ulāingen yip tarik lamök in cha: vënyu nang ngaich Apimelek tö e.

²⁶Ngaich ang Kā-al ök kikōnyö kūön Epet nö holtö yik hanöng kisānöre nö kiröönngöre ngaich havāngngöre nö chuh Sikem: ngaich yik tarik aṅ Sikem nö hayönglenre nö in ò.

²⁷Kiröönngöre ngaich cha-a nö el kahôiyö, ngaich hamūl ṙòng nup vāinre, ngaich karānnyö nuk ṙòng vāin, ngaich ha-öiny ngam tēvre, chuh el patī öp tēvre cha-a inrē, nyā ngaich ka-eūt inrē, rūtngövah Apimelek ngaich.

²⁸Ngö ṙô ang Kā-al ök kikōnyö kūön Epet, Achīö ap kan Apimelek, achīö inrē Sikem, töp lökten hī kūön alaha? Röh öp kan anga-aṅ nö kikōnyö kūön Yērūpē-al? Yöngṙen kumyung ò inrē Sīpūl? Kūön alaha yip tarik Hamôr öyih ök kikōnyö yöng Sikem? Kūöyòh ṙöng öi ayī-ö min kūön alaha ò?

²⁹Eltī chu yin öre vē tarik yē lōn ngam Tēv! ngaich möl öre chū-ö kēngen Apimelek. Ngaich ngö ṙô anga-aṅ tö Apimelek, Ṙūöhöl ṙôken yip kumyungre man, tā-a kunyī-inre.

³⁰Ngaich hē Sīpūl ök mahayöng ngam elpanam nö hang në ṙô Kā-al ök kikōnyö kūön Epet, hūlökūö tanānyö ngaich anga-aṅ.

³¹Ulāikenre ngaich anga-aṅ nö tīnngö ma-ahānga nö in Apīmelek nöngö ṙô Yĕh meuk yih öp Kā-al nö i Sikem, öp kikōnyö kūön Epet tö yip hanöng kisānö ò; ngaich yip inrē nö hōten ngam elpanam nö lā-al meh.

³²Lökten, choholre tö hatööm, më-eṅ tö yip tarik in meh, hönga öi el töngāṙö:

³³Ngaich mīnö, ip peuheū, i saha maneutlö ngam tavūöi, ka-euilökūö më-eṅ choholre, rultöre ngaich kiyung ngam elpanam: ngaich yē ò tö yip tarik hol ò inrē nö kunyī-inyre nö lā-al meh, ngaich më-eṅ tinī-iv tö cha ip töng huneū-enre hē e.

³⁴Choholre ngaich Apimelek tö hatööm tö yip tarik hol ò, ngaich hayūnö Sikem nö fën kiteūm.

³⁵Kunyī-inyre ngaich Kā-al ök kikōnyö kūön Epet, söklöre ngaich nö ik lökhöt inkūp ök elpanam: choholre ngaich Apīmelek tö yik tarik inrē hol ò, nö ṙā-ang im chūök cha nö hayunngöre.

³⁶Ngaich hē Kā-al nö meuk yik tarik, ngö ṙô anga-aṅ tö Sīpūl, Yĕh meuk, peūtöre yin më tarik nö ṙā-ang kui minë rôngö. Ngaich ngö ṙô Sīpūl tö ò, Höng meuk nyat minë rôngö man nö sā tarik.

³⁷Ngaich hēk Kā-al nö ṙô-òv nö ngö ṙô, Yĕh meuk löktö ellōn ngam panam yin më tarik nö peūtöre, hĕng kiteūm më yamih löktö im Tērapim i Minōnenim.

³⁸Ngaich ngö ṙô Sīpūl tö ò, Isuh ap elvāng meh nö ngaich, më-eṅ öm tö ngö ṙô, Achīö ap Apīmelek, töp lökten hī min kūön alaha ò? Röh aich nö vē tarik vē töha-āchiṙen tö meh? Kunyī-inyre man kuṙòh töngamuh, vë-ekūö meh chin öm kiyūngö cha.

³⁹Kunyī-inyre ngaich Kā-al i kūö yik tarik aṅ Sikem ngaich kiyūngö Apīmelek.

⁴⁰Lūḵ an ngaich Apīmelek, urēhĕkūö ò ngaich anga-aṅ nö falngöre, ngaich pōyen yik töfukngö tönyahaṅvö, uroh nö sölta nö ip lökhöt kūö inkūp.

⁴¹Ngaich iyöng Arumah ang Apīmelek: ngaich Sīpūl nö ahōngen Kā-al tö yik hanöng kisānö ò, pòn sōten cha nö iyöng Sikem.

⁴²Ngaich im huṙöch, yip tarik nö kunyī-inyre nö elkahôyö; ngaich vë-eny nang Apīmekek cha-a.

⁴³Ngaich kē yik tarik anga-aṅ, harēvö cha ngaich nö lūöi kiteūm, ngaich ṙātö hamöng nö hayun nö el kahôyö; ngëicha ngaich anga-aṅ ngaich meuk yik tarik nö kunyī-inyre nö ṙā-ang ngam elpanam; choholre ngaich anga-aṅ nö lā-al cha ngaich fëlngen cha.

⁴⁴Ngaich Apīmelek, tö yik hol ò inrē tökiteūm haka, nö siyöötöre nö kū-ötö lākūö, söktöhech ngaich nö ik lökhöt kūö inkūp ök elpanam: hayittöre inrē yik tö nët kiteūm nö in yik elkahôyö ngaich fëlngen cha.

⁴⁵Hĕng sumkam ang Apīmelek nö kiyung ngam elpanam; Kē ngam elpanam ngaich anga-aṅ, fëlngö yik tarik inrē ël e tiṙölngö ngam elpanam inrē ngaich piṙōng ël e tö sāl.

⁴⁶Ngaich hē yik tarik nö ṙòkhöre nö hāngö e nö el öp chūök chamônga i Sikem, meuthöt cha-a ngaich nö el kinluhu ök patī Elperit.

⁴⁷Ngaich vënyu nang Apīmelek tö e tö yip tarik el ngam chūök chamônga nö mūlhakaṙen.

⁴⁸Peūlöre ngaich Apīmelek nö i kui öp rôngö Salmòn, ṙòkhöre yip tarik inrē nö hol ò; kē hanīöng ngaich ang Apīmelek nö eltīre, ngaich ṙaltö pak nuk chōn, kē-ĕ e ngaich keūnö e nö elranôṙöre: ngö ṙô inrē anga-aṅ tö yik tarik yik hol ò, Nup maheuṅk yīö inlaha chu, ka-eūnyen asīnken chu.

⁴⁹Ngaich ṙòkhöre yik tarik nö ngatī nö kö ṙaltö pak, ngaich tömrit Apīmelek, ṙātö u ngaich nö i kūö ök kinluhu, ngaich tōttökūö ök kinluhu cha-a tö tameūyö, ngaich lökten yik tarik nö ṙòkhöre el ök chūök chamônga i Sikem nö kapah inrē, hĕng köny kikōnyö kikānö inrē.

⁵⁰Chuh Tēpes ngaich ang Apīmelek ngaich iyöngtöre nö lā-al Tēpes, ngaich kĕ-e e.

⁵¹Hĕng pöri ök umuh töngëḵ chūök chamônga ellōn ngam elpanam, in e nö ṙòkhöre kikōnyö kikānö inrē nö falngöre, ṙòkhöre cha-a inrē yik aṅ ngam elpanam, ngaich öp ngö kūöre, yônlö inrē cha-a nö i uk ök chūök chamônga.

⁵²Yihtöre ngaich Apīmelek nö ik chūök chamônga, kiyūngö e ngaich, ngaich yāha ranöhta nö i inkūp ök chūök chamônga nö hòṅ tōttökūö e tö tameūyö.

⁵³Ngaich hĕng tak ök kikānö samuk tö kui Apīmelek tök ihong kōiny tinlön atra ngaich likuknyö elkui ò.

⁵⁴Kurāten ngaich anga-aṅ nö havëtö ök ṙālö tarik kameunkö ök lanaklö ò, ngaich ngö ṙô tö ò, Hōknyö ap sanëtre man, fëlngen chu, hòn öt ngö ṙô tarik min tö chu, Fëli ök tö kikānö. Ngaich ök tarik ò ṙālö nö sapngen ò, kapah ngaich anga-aṅ.

⁵⁵Ngaich hē yik tarik Israĕl nö meūkö Apīmelek nö kapah kö kiröönngöre ngaich cha-a nö i chūökre.

⁵⁶Ngati tī ngam Tēv nö havahal öt lanöökö Apīmelek, tök tī ò tök yöng ò kikōnyö, i finëlngö yik tösat anāi

⁵⁷Ṙòkhöre hanöng kisānö ò: inrē nuk öt lanöökö yik tarik aṅ Sikem nö havëka tö ngam Tēv nö i kui cha: teunghö kui cha inrē öp rinūtngövah tö Yôtam ök kikōnyö kūön Yērūpē-al.