Read Car_Nicobarese 2 YÔHAN 1 Bible Online

2 YÔHAN 1 - Car_Nicobarese bible

2 YÔHAN 1

¹Ap kūönṙô, löö i ngam tökatöllöng mā kikānö in yip kūön ò inrē, yip hanāngen chu im kanò-en, öt höng chu-ö, tön ṙòkhöre cha-a inrē yip tö akahakūö töm kanô-en:

²Kūö ngam kanô-en, ngam tököp nö in yīö, in hī min angū-ö nöng örheūheu:

³Inlōnti, neūkölōn, lanāmö min inrē nö in hī, nö ṙeū-eung im Tēv, ngam Yöng, ṙeū-eung in Yēsū Kristū inrē, ngam Kūön ngam Yöng, im kanô-en, hanāngenlōn inrē.

⁴Pōyen ṙanāmölōn chin, töre öich kôtökūö tö yip rīkre kūön meh nö lök im kanô-en nö sā ngam chöngö taneūngen ih ṙeū-eung im Yöng.

⁵Me-eṅ mā kikānö, vë-ekūö meh chin, öt pò chu öre ngaichtī kūichtö tufömngöre chöngö in meh, tön höng angū-ö ngam mī-in hī ngaich ik raneh, tö hī hōtu kö hāngenlōn tö höö.

⁶Angū-ö ön ngih hanāngenlōn, hinôtö hī lök i minë chöngö Ò. Angū-ö ön ngih chöngö, ngam ahang yīö ngaich, löktö kūö ik raneh, hinôtö yīö lök in e.

⁷Pòn maṙôngö nö ngaich yik mahachīl, nö chuh ing panam, cha-a yik töt mahalööknyôre tö Yēsū Kristū nö yih nö tarik. Anga-aṅ ön ngòh mahachīl, töminyôiny Kristū inrē.

⁸Meūköre yin, hòṅ yīö öt löhlö tö u nuk tī ih, hòṅ yīö pöri teūngen tö tötimtörkūö raneushö.

⁹Öp töng iṙuhöröön nö kiröönngöre, ngaich öt köp nö im inköphöti aṅ in Kristū, öt īnu töm Tēv: ang-aṅ ngòh tököp nö im inköphöti, anga-aṅ tö hĕnghöre īnu töm Yöng, töm Kūön inrē.

¹⁰Yĕn hĕng tak öp yamihtöre in yīö, ngaich öt kūmu tö ngih inköphöti, un hōḵovö nö i patī yīö, un salāmö inrē.

¹¹Pò ngòh samlāman, hamòl ò nö i nup tötlöök la-en ò.

¹²Pōyen aṅin chin tö kahūichtöre in yīö, hö-ö chin hòṅ kūichö u aṅtītö kinsumkūö kanūich nö i mat līpöre: meūkkenre pöri chu-ö hòṅ yih in yīö, hòṅ kôtaṙô inrē vë-ekūö yīö, hòṅ ngam ṙanāmölōn yīö nö hateūngi.

¹³Salāmö man tö yip kūön öp tökatöllöng kanānö meh.