Read Car_Nicobarese 3 YÔHAN 1 Bible Online

3 YÔHAN 1 - Car_Nicobarese bible

3 YÔHAN 1

¹Tī öp kūönṙô, nö löö in Kaiyös, öp hanāngen chu im kanò-en.

²Kahōlö, vë-ekūö Tēv chin, hòṅ meh kôlò i tökeuheūttöre, hòṅ meh lööken alaha inrē, nö sā kanôlò ngam ma-alaha meh inrē.

³Pò chu ngaich kiröngen ṙanāmölōn, hē chinlôtö yip hol, ngaich eūkö ngam kanô-en meh, nö sā röön meh lök im kanô-en.

⁴Hö-ö chin tösamötngörevö ṙanāmölōn tö ngih, öich hang yip kūönre nö lök im kanô-en.

⁵Kahōlö, tö la-evṙen man i tökô-en la-en, ip töng tī meh lā in cha yip hol, tö yip aṅ tahëng inrē;

⁶Yip ameūkö ngam hanāngenlōn meh nö ikūö ngam Māṅ: yip chūök tī meh min öm huveū-en öm kiröönngöre, töhōḵov töm Tēv:

⁷Pòn kūö ngam minë-eny, cha-a nö kiröönngöre, öt kahë-evṙen nö ṙā-ang i yip tahëng mihëṅṙö.

⁸Lökten in hòṅ ha-öiny töngatī, hòṅ hī hamòl alaha töla-evṙen im kanô-en.

⁹Rahëichyen tī chin kūich höti im māṅ: ngaich pöri Ti-òtrifes nö öt hōḵen ih, öp töhāngenlōn tö tulöng minā-aṅ nö in cha.

¹⁰Lökten, yē chu yih, fēḵlen yīö min tö nup la-en ò, nup vahīṙen ò, vë-eng uk nang hī tö töchökhuṙô: öt tööḵngen tö e, ötrēhĕn anga-aṅ nö hōḵ, tö yip hol hī, acha-a inrē yip tötāhai tö ò, ahōnyu inrē nö ṙā-ang im māṅ.

¹¹Kahōlö, un asīnö ngam tötlöök, angū-ö pöri ngam tölöök. Anga-aṅ ngòh vamī tölöök, aṅ im Tēv: anga-aṅ ngòh vamī tötlöök, öt meuk ngam Tēv.

¹²Eūka öp Timetrīös tö taṙòkhöre tarik, tö ngam kanô-en inrē: hôṅ, eū-a in īhö inrē; ngaich akahalōn me-eṅ tö ngam aheūkö ih nö tökô-en.

¹³Pōyen nup kahūichtö chu lang in meh, sōḵ pöri chu-ö kūichtö u in meh öich aṅtītö tökinsūmukūö kanūich:

¹⁴Ötṙôktörevö pöri chu-ö öich meūkkenre meukkūö meh, ngaich kôta ṙô min ayā-a vë-ekūöre.

¹⁵Lanāmö yēḵ in meh. Salāmö meh yin vē hol. Minënyu ṙô salām yip hol.