Read Car_Nicobarese YŪT 1 Bible Online

YŪT 1 - Car_Nicobarese bible

YŪT 1

¹Tīnngö sinlāmö ön Yūt, kūönkūö Yēsū Kristū, kahëm Yāköp, i yip töhavëka, hanāngen im Tēv Yöng, yip töhaköpka tö pòkūö Yēsū Kristū inrē:

²Neūkölōn yēḵ in yīö, kumchikṙen, hanāngenlōn inrē, ṙūhölre ṙôken.

³Kahōlö, i panītnyöre chin kūichhöti in yīö, tö inlahen ngih inyööken tarik; hòṅ kūichhöti chin in yīö, hōten yīö chin i tölngöre, laklö ngam mikah, ngam töng hĕng heuh kinëti nö ngaich nö i yip töhet.

⁴Pòn rēvre yip tarik mu-ulāihötre, yip tökūichiyö ötinkôlò nö ngaich, tötmilēḵṙen tarik, harīkngö ngam inkôlò aṅ im Tēv nö i töchōich; ngaich mahngö ngam töng hĕng tak mahayöng, ngam Mā ih, Yēsū Kristū.

⁵Hòṅ fēḵlen yīö chin pòrô yin ngaich tö-akahalōn tö në, tö tī ngam Mā Tēv nö hayööken yik tarik nö ṙā-ang ngam panam Aikup, ngaich unôichngöre nö fëlngö yik töt ṙamātö ellōnre.

⁶Ngaich yip ma-ahānga inrē, yip töt mahaköp nehngenre inlahare, ṙāngö nup chūökre pöri cha-a; ngaich haköpi tö Ò nö örheūheu nö nyëki nö elsinngūlö, söl im kinṙôka tökiröng sakāmö.

⁷Hòṅ fēḵlen yīö chin inrē tö Sôtòm, Kômòra, nuk ranghö u inrē panam, yik kamëḵngöre nö i chinô-òṅkānö, ngaich tömrit nup töngyô-òv lōn alaha; ngaich kihngen nö im ötkanôlò tötnyangngökūö tameūyö, nö inmeukhömat hī.

⁸Ngaich nö ngatī inlahen vē inrē, i nup heūvö, nö hachōichngö ngam alaha, ngaich harāinyngö ngam chöngö, ötlēkôre inrē tö kanôlò.

⁹Ngaich pöri Maiköl, ngam mākūö ma-ahānga, hē ò nö lā-alkūö ngam sī-ö nö kil ngam alaha Môsös, öt kētö chanökhuṙô tö ò nö im kinṙôka, ngö ṙô pöri, Vëka man töm Mā.

¹⁰Ngaich pöri vē nö chökhuṙô, nö i nup nehngenre nö mikahkūö cha, in u cha-a ngaich nö ötkôlò, sā në töṙeūla töt chanöhöv ellōn.

¹¹Töt kôlò yin cha-a! pò cha ngaich nö lök el talöökö Kēn, ngaich inrē nö ahôhangen nö fal im vanāichö Pēlam pòn hòṅ haṙāyö, ngaich ötkôlò i inhôngôre tö Kōrah.

¹²Acha-a yin vē ihong tö nyöptikui im nyina-aṅ hanāngenlōn tö yīö, yē cha nö holkūö yīö, yōm pököre töng maha-aṅhaṅlre, töt īnu tö pinheṅ-eṅkūö; taṙul töt aṅhaṅv tö mak, kumröön kuföt nöng heuingö; chōn el anöhtökūö chuhöt töt ṙônguvö, nët tum nö kapah, nyòklöngö nö holtö ṙĕhre;

¹³Tökalēḵ mahūṅvö ngam mai, hapĕhnyö sumrōngkūö nöng kahngenre; taneūsömat mahavöt, töhöngkaṙen töp tösah aṅ i tösah nöng örheūheu.

¹⁴In cha ṙô inrē Ēnòk, ök sinat tak kūön Ātöm, nö ṙô-òv, nö ngö ṙô Yĕh meuk ngam Mā nö yih holtö yip tösöm köṅny töhet,

¹⁵Nö kahòkken taṙòkhöre, nö öthakôlò yip taṙòkhöre tötlöök, tö nup kahëken cha i ötlanöököre, ṙòkhöre inrē nup töchökhu ṙô yip tötlöök tököölö fālen nö lā-al Ò.

¹⁶Cha-a yin famël tarik, vame-eny miṙivre, tömrit kuilōnre (minë elvāng cha inrē nö ṙôtö yöng ṙô tö föh), hameuktö miṙēre tö tarik, nö chööḵnyö tö taneūngenre.

¹⁷Yī-ö pöri, kahōlö, köpölōn yin tö nuk ṙô tö ngaich nö ṙônyu nö lā-urĕh, tö yik tanīnöṙô ngam Mā hī Yēsū Kristū;

¹⁸Tö ṙô cha nö ngaich tö yīö, Ip manā-aṅ ṙētak min yip tö mināich, tömrit nup tötlöök lōnre min cha-a.

¹⁹Cha-a yin mahaköhngen, mahakô-ònglōnre, öt aṅhaṅv-in töm Töhet Fanöinylö.

²⁰Yī-ö pöri, kahōlö, haruklöre yin im tölngö töhet ṙinātö ellōn yīö, vë-ekūötēv im Töhet Fanöinylö.

²¹Haköpöre yin im hanāngenlōn ngam Tēv, meūkkö ngam neūkölōn aṅ Mā hī Yēsū Kristū im nômö tö örheūheu-aṅ.

²²Ikui yip rēvre inrē neūkölōn, yip tökatöngalōn;

²³Rēvre inrē tö hayöölöngṙen, kichötnyu cha-a nö i kui yip rēvre inrē ngam neūkölōn holtö pinheṅ-eṅkūö; surīkhö ngam hilā töpaṙòk tö kūö ngam alaha.

²⁴In ò yēḵ töngamuh ngam tökô nö laklen yīö im kinvē-ĕre, ngaich asöklen yīö i kūö ngam kanôlò Ò öi öt chanôchu im tökiröng ṙanāmölōn,

²⁵Im töng hĕng Tēv mahayööken hī, lökten Yēsū Kristū mahayööken hī kanôlò, minā-aṅ, pūlngö, chöngö inrē, ha-eh misī, töngamuh inrē höng örheūheu inrē. Āmen.