Read Car_Nicobarese INMEUKHÖMAT 1 Bible Online

INMEUKHÖMAT 1 - Car_Nicobarese bible

INMEUKHÖMAT 1

¹Ngam inmeukhömat aṅ in Yēsū Kristū, ngam kahëtö ngam Tēv nö in Ò, tö hameuktu nö i yip tanölöṙô Ò, anū-ö nup töt ṙôktörevö nö yih min: tīnhanga Anga-aṅ nö hameukhöti nö ip tanölöṙô Ò Yôhan, nö lökten i Ma-ahānga;

²Ngam ameūkö ngam ṙô aṅ im Tēv, aṅ im inmeukhöti inrē tö Yēsū Kristū, tö nup maheuṅk Ò nö ṙòkhöre.

³Tökôlò öp anga-aṅ yēḵ, öp vame-eṅkūö e, acha-a inrē yip hamang minë ṙô mu-urĕhnyi, ngaich haköpö u nup tökūichi nö in e: pò ngam ṙētak nö röhta.

⁴Tī Yôhan nö löö i nup tö sat māṅ nup i Āsi: Inlōnti yēḵ in yīö, lanāmö inrē, ṙā-ang in Ò, ngam töngamuh, tö ha-ehelen misī inrē, ngam yamih inrē; ṙā-ang i yip mi-ikūö ngam kantēra;

⁵Ṙā-ang in Yēsū Kristū inrē, ngam tökô-en ameū-a, ngam lanòh kupah, ane inrē mahayöng yip rācha kūö panam. In Ò ngam töhāngenlōn tö hī, ngaich luhnyen hī ṙā-ang i nup tökööl hī, lökten i mahām Ò;

⁶Ngaich vīlen hī pūlngö, mameukṙen ngam Tēv Ò, Yöng inrē; kanôlò Ò yēḵ, minā-aṅ inrē örheūheu yēḵ. Āmen.

⁷Yĕh meuk holtö taṙul an nö yih; ṙòkhöre mat inrē min nö meūkan, tö cha inrē yip samapngen Ò; ṙòkhöre inrē min yip miyöngö ing panam nö haṙivhen Ò. Ngatī an yēḵ. Āmen.

⁸Chu-ö Chin Alfa, Omeka inrē, ngö ṙô ngam Mā Tēv, Öich töha-ehelen misī, Öich yamih, Tökeuheūttöre Chöngö.

⁹Ip kun panam, chu-ö Yôhan, tö Petmòs invëka, mëm kahëm yīö, ane inrē hamòlkūö yīö i kanihngen, ane inrē im pūlngö, manöiyö inrē aṅ in Yēsū, ngam ṙô ngam Tēv, ane inrē inmeuktö Yēsū.

¹⁰Im Töhet Fanöinylö chu-ö hē sakāmö ngam Mā, ngaich hang ök töpōitô chu-ö lā-ukre, nö sā ṙô fanöö.

¹¹Ngö ṙô, Minë maheuṅk meh, kūichngö u i mat līpöre, ngaich söömngö e i nup tö sat māṅ; löö Efisös, Ismörnā inrē, löö Pörkamöm, Taitiriā inrē, löö Sārtis, Filitalfiā, Laotisiā inrē.

¹²Ngëichkö ngam ṙô ngam vame-eṅkūö chu. Havöötö kūöre chū-ö, ngaich meuk nup tösat humlum chūök rööntö manyak;

¹³Ellōn nuk chūök rööntö manyak, hĕng taka öp tö sā kūön tarik töhĕng tak, hayūtö tö sā kūön tarik töhĕng tak, hayūtö tö tösölti nö i ukröön tö-aṙū-uti inyut, hamööpö ṙat nö vinngö nö i teh ò tö ök humlum inmöpṙat.

¹⁴Ngaich ök kui Ò, tö nuk keūyö Ò inrē nö isoh, sā tö-isoh tökënngöre tacham; nuk mat Ò inrē nö sā töhūkūö tameūyö;

¹⁵Nuk kunröön Ò inrē nö sā töminyangnyu mās; sāre öre yĕn halöökö nö ikūö tameūyö; ngaich ök ṙô ò nö sā ṙënṙô töpōyen mak.

¹⁶Sat nuk taneūsömat, aṅ eltī Ò lāhāmö: ngaich lökyö elvāng Ò, hĕng nòng ök tö-āṅlā keūtö sanët ngaich nuk arëkūö Ò nö sā yanāngö mat ngam tavūöi yĕn ip kumlēḵre.

¹⁷Ngaich hē chu meukan, ngaich fukngö chu-ö iröön Ò sā kupah, Ngaich lāhāmötī anga-aṅ nö ṙātö eltīre nö in chu, Un pa-ekūö, nö ngö; Chu-ö Chin raneh, manā-aṅ inrē,

¹⁸Öich tö aṅ inrē; kapah sin Chu-ö, ngaich yĕh meuk, örheūheu Chin ngaich aṅ, aṅhaṅv-in Chin inrē tö në tinkīök ngam kinpaha, tö ngam chūök tökapah inrē.

¹⁹Lökten man kūich minë maheuṅkre, minë töngamuh, minë yamih min nö unôich;

²⁰Ngam ötmikahkūö aṅ i minë tö sat taneūsömat, minë maheuṅk meh lāhāmö chu, minë tö sat inrē humlum chūök rööntö manyak. Ma-ahānga nup tösat māṅ, nun minë tö sat taneūsömat: tö sat nö māṅ minë tö sat chūök rööntö manyak.