Read Car_Nicobarese INMEUKHÖMAT 10 Bible Online

INMEUKHÖMAT 10 - Car_Nicobarese bible

INMEUKHÖMAT 10

¹Ngaich meuk ök tahëng chū-ö tökalēḵ ma-ahānga, yônti nö ṙā-ang el halīöngö, hayūtö tö taṙul; ane inrē i kui ò ök tasēkö, ngaich inrē ök kūö ò nö sā tavūöi, ngaich nuk kalröön ò inrē nö sā tameūyö machööḵlö;

²Aṅhaṅv eltī anga-aṅ tök kun līpöre nö fehnyu mat: röön tök lāhāmö anga-aṅ elröönre nö el mai, el tumlat ök lātavē elröön ò;

³Ngaich hūḵa anga-aṅ nö pōitô sā ṙô lāyön nö ayôṙa: ngaich hē ò nö hūḵa, kaknyöre nup tö sat kunṙôkö nö ṙô-òv.

⁴Keuheūthë ṙô minë tö sat kunṙôkö, ngaich hòṅ kūich tö tīre chū-ö; ngaich hang ök ṙô chū-ö lamöktö el halīöngö tö ngö ṙô, Hapanngö kūö u, nup ṙô minë tö sat kunṙôkö, un kūichö anū-ö.

⁵Ngaich ök Ma-ahānga, ök tömeūktö tö chu nö sökhak nö el mai el tumlat inrē, nö hachônglö ök lahāmö këlre nö el halīöngö.

⁶Ngaich chūökuṙô nö in Ò ngam töng örheūheu nö aṅ, ngam vamī-il halīöngö, nup chehen in e inrē, vamī-il mai, nup chehen in e inrē, tö törö-ö rô-òten ṙētak nö ngaich:

⁷Hē nup sakāmö pöri, hē ṙô öp sinat tak Ma-ahānga, ip hē ò nö hòṅ rultöre nö föö, ngaich keuheūten nö möl, ngam öt mikahkūö sin aṅ im Tēv, nö sā minë tölöök inhānga, ṙahônyö Ò nö i yip kūön Ò pròfĕt.

⁸Ngaich ök ṙënṙô, ök ṙameū-eung el halīöngö nö hāngö tö chu, hang ṙô e chū-ö hēk nö vë-ekūö chu, nö ngö ṙô, Kuṙòh kē ngam līpöre man ngam eltī ngam Ma-ahānga, ngam samökhaka nö el mai el tumlat inrē.

⁹Ngaich chū-ö chuh ik Ma-ahānga, ngaich vë-ekūö ò öich hōten ò nö kē-ĕkūö chu tök kun līpöre. Ngaich ngö ṙô anga-aṅ tö chu, Euṅh kē-ĕ e, nyā-aṅ e ngaich, hòṅ e min nö angū-övtī tö ellōn meh, elvāng meh pöri min angū-ö nö pachāka, sā hönī.

¹⁰Kē ök kun līpöre chū-ö ngaich, nö ṙā-ang eltī ök Ma-ahānga, ngaich nyāngö e; ngaich elvāng chu angū-ö nö pachāka sā hönī: keuheūthëkūö chū-ö nya-aṅ e, ngaich angū-öv ellōn chū-ö.

¹¹Ngaich ngö ṙô cha-a tö chu, Ahānga man i tömaṙôngö tarik, i pumnāmö tarik i tum mi-ëlô, i yip rācha inrē.