Read Car_Nicobarese INMEUKHÖMAT 11 Bible Online

INMEUKHÖMAT 11 - Car_Nicobarese bible

INMEUKHÖMAT 11

¹Ngaich hĕng milöichö ök pööp tökētū nö in chu tö sā tinkung: ngaich hĕng tak ök tö ngö ṙô, Choholre, kalah ṙôkö ngam Töhet chūök ngam Tēv, tö ngam tahāklö, tö yip samlām ël e.

²Tö ngam tökiröönö, töt me-ël ngam töhet chūök, ṙāngö ap el kahôyö, un kalaha ṙôkö angū-ö; tön ngaich an nö kē-ĕyö nö i yip Tahëng Mihëṅṙö tarik; ngaich cha-a min nö rööntö kui ngam elpanam nö fën anāi nët chumngëṅtö.

³Ngaich kē-ĕkūö nap tö nët tak min chū-ö ameūken chu, ngaich ahānga min cha-a, nö inyut tö sāk, hĕng köṅny nëtòng tafūöl anāi sumkam.

⁴Cha-a nan tö nët māṅ òliv, tö nët inrē chūökröön tö manyak, söktöheich nö i kūö ngam mā ngih panam.

⁵Ngaich yĕn tarīku tö hòṅ chökhutī tö cha, meutnyi ngaich tameūyö nö löknyö elvāng cha, ngaich haṙāpngö yip tökunyahaṅ elmat tö cha; ngaich yĕn tarīku tö hòṅ chökhutī tö cha, ngatī inlahen min anga-aṅ nö fëli.

⁶Minhôiṅyu nan cha-a nö öpngökūö ngam halīöngö, hòṅ e nö öt kumṙah i ṙô-òtö sakāmö cha nö ahānga: minhôiṅyu cha-a inrē nö i në mak, nö vīngö u nö mahām, nö hachök ngih panam inrē tö tölëlngö kūö invah, ip töng tumheuh lōn cha.

⁷Ngaich hē cha min nö keuheūten tö ngam hameuktö cha, ngaich ap töṙeūla min ma-meutlö nö ṙā-ang el öp töt lataṙeū-euvö, nö kiyung nö lā-al cha, ngaich mihôiṅ tö cha, ngaich kapahatī tö cha.

⁸Ngaich nup tökapah alaha cha nöng hulalhaka nö el talöökö öp tökiröng elpanam, öp töt minëòngu, Sôtòm, Aikup inrē, minë-eny e, i chūök ngam Mā inrē nö harātu.

⁹Ngaich ṙeū-eung i yip tarik, miyöngö, tum mī-ëlô, pumnāmö tarik, yip tarik min nö ngëichkö nup tökapah alaha cha, lūöi sumkam ròngti. Ngaich öt halöngtuṙen nuk tökapah alaha cha nö ūli nö ël anūlö.

¹⁰Ngaich cha-a yip mī-iyöng kūö ngam panam nö kuchīkölōn tö cha, ngaich nö ṙāmölōn inrē; ngaich cha-a min nö kö söömngö inlōnti nö in höö; pò pròfĕt nö öthakôlò yip mī-iyöng kūö ngih panam.

¹¹Unôichrit tö lūöi sumkam ròngtī, meuthöt ngaich öp unhôṅmö nômö aṅ im Tēv nö in cha, söklö röönre ngaich cha-a, ngaich kiröngö pinheṅ-eṅkūö cha-a yip ngamëichken cha.

¹²Ngaich hang ök tö pōitô cha-a lamöktö el halīöngö, tö ngö Ṙô tö cha, Yônlö ihih, Ngaich yônlö cha-a nö el halīöngö nö el taṙul; ngaich meūkö cha yik tökunyahaṅ elmat tö cha.

¹³Ik ṙētak angū-ö, ök yöng kumyeūnö umuh: taṙöli ngaich ök sinöm lā ngam elpanam; sat köṅny yik tarik tökapah tö kūö ök kumyeūnö; ngaich pa-ekūö yik tö ōtngöre, ngaich ha-öny ngam Tēv ngam halīöngö.

¹⁴Ngaich an ngam innëtö ötinkôlò, Yĕh meuk ngam linūöyö nö ka-eūyen nö yih:

¹⁵Föö ngaich ngam sinat tak Ma-ahānga; tömörit tök yöng ṙënṙô el halīöngö, ngaich ngö ṙô chā-a, Vītöre an ngam pūlngö ngih panam nö pūlngö ngam Mā hī, pūlngö ngam Kristū Ò inrē. Ngaich anga-aṅ min nö hayöng nöng örheūheu.

¹⁶Ngaich yik tö nët anāi fën tak Mā, yik amūichhak nö el kantērare, nö i kūö ngam Tēv nö, afukngöre nö fāthakkūö, ngaich salām ngam Tēv,

¹⁷Nö ngö ṙô, Ha-öinyö Meh in, Ō Mā Tēv, Tökeuheūttöre Chöngö, Öm töngamuh, tömisī inrē; pò Meh kēḵ ngam yöng minhôiṅyöre, ngaich Öm hayöng inrē.

¹⁸Ngaich yip pumnāmö tarik nö līn, ngaich yih ngam lanīnö Meh, ngam hē ṙētak yip tökapah inrē nö kahòkkaṙen, ane inrē ngam ṙētak cha nö kētö nup raneushö tī cha, nö i yip kūön meh, yik pròfĕt, i yip töhet inrē, in cha inrē yip tö pa-ekūö tö minë-eny Meh, yip tökūöṅnö, töpōyö inrē; ngaich halölngen cha inrē, yip mahalëlngö ngih panam.

¹⁹Ngaich nö löpnyukūö ngam töhet chūök ngam Tēv, ngam elhalīöngö; ngaich meūkö nö el ngam töhet chūök Ò, ök kasòng nuk chöngö; tömörit angū-ö tö hanyālö, ṙënṙô, kunṙôkö, kumyeūnö, yöng tö kënngöre kumṙah inrē.