Read Car_Nicobarese INMEUKHÖMAT 12 Bible Online

INMEUKHÖMAT 12 - Car_Nicobarese bible

INMEUKHÖMAT 12

¹Ngaich hĕng ök yöng minkahngö tö meūkö nö el halīöngö; hĕng tak kikānö tö hayūtö tö ngam tavūöi, lataṙeū inrē ngam chingëṅt nö elröön ò, i kui ò inrē nup tö nët sīön taneūsömat nö sapīöv:

²Puyōsö anga-aṅ; ngaich hūḵa anga-aṅ, halöinyöre nö kayôḵ, chök inrē tö finötöre.

³Ngaich meūkö ök tahëng umuh minkahngö el halīöngö; yĕh meuk hĕng nòng ök yöng tangāv tulan, sātö kui, sömö sinrōl inrē, ngaich i kui ò inrē nup tö sat sapīöv rācha.

⁴Ngaich öp lamrit ò nö tūök nup tö lūöi milā-a taneūsömat ngam halīöngö, ngaich suktö u nö el tumlat: söktöre ngaich ngam tulan nö i kūö ngam kikānö, ngam tö ṙònghöichṙen nö fötö, pòn hòṅ lanngö ök kūön ò anga-aṅ, yĕn ngaich nö fötnyu tö ò.

⁵Ngaich anga-aṅ nö fötnyö ök kikōnyö nyīö, öp mahayöng vē pumnāmö tarik nö ṙòkhöre nö aṅtī tö vët tinkung, ngaich ök kūön ò nö kēḵlöngö nö im Tēv, nö im kantēra Ò inrē.

⁶Ngaich meutngö ök kikānö nö el inchōn, nö ik chūök ò tö halēniṙen töm Tēv, pòn hōtu cha-a nö in e nö harūkan, hĕng köṅny nëtòng tafūöl anāi sumkam.

⁷Ngaich kinyūngö ök el halīöngö; Maiköl holtö yip Ma-ahāngare, nö kiyung ngaich ngam tulan, nö holtö yip Ma-ahāngare;

⁸Ngaich öt kô cha-a; ngaich ötrēhĕn nö ōtre chūök cha-a nö el halīöngö.

⁹Suktu ngaich ngam tökiröng tulan, ngam pēch misī, ngam sī-ö, Sātān invëka, ngam mahachīl në taṙòkhöre panam. Suktu anga-aṅ nö el tumlat; hol ò nö ṙòkhöre yip Ma-ahānga ò, nö suktu.

¹⁰Ngaich hang ök tö pōitô chu-ö, el halīöngö, tö ngö ṙô, Möl an nö hameuktu ngam inyööken, minhôiṅyö, ngam pūlngö ngam Tēv hī inrē; ngam chöngö ngam Kristū Ò inrē. Pò ngam vamë-eny yip hol hī nö suktuvö, ngam vamënyen cha nö i kūö ngam Tēv sakāmö hatööm inrē.

¹¹Ngaich mihôiṅ cha-a, lökten i mahām ngam pököre, lökten ngam ṙô inhangkö Ò tö cha. Öt ma-iṅ nômöre cha-a nö im kinpaha.

¹²Lökten yin ṙāmölōn, Ō yī-ö halīöngö, yī-ö mī-iyöng ël u inrē. Ötkôlò yin yī-ö panam, mai inrē; pò ngam sī-ö nö ngaich nö yôntī nö in yīö, holtö yöng lanīnö; pòn akahalōn töre nöng rahëchtöreṙen.

¹³Ngaich hē ngam tulan nö meukngenre nö suktu nö el tumlat, öthakôlò ngam kikānö ngaich anga-aṅ, ngam famötnyö ök kikkōnyö nyīö.

¹⁴Ngaich kētu nö ik kikānö nuk tö nët sanëòk ök tökiröng matēṙö, pòn hōtu anga-aṅ nö kiteūngöre nö ik chūökre el inchōn, ik chūök ò nö rĕh rò-òten nö harūkö, ane inrē pōyen ṙētak, ròngti inrē tö hĕng ṙētak, nö ṙā-ang i kūö ngam tulan.

¹⁵Ngaich ngam tulan, nö farômnyö öp mak tahël nö löknyö elvāngre, nö lāunôich töm kikānö, pòn hōten ò anga-aṅ nö hëmngö.

¹⁶Holṙen ngam kikānö ngaich ngam tumlat, vā-alkūöre ngaich ngam tumlat, ngaich òkngö ök tahël, ök farômnyö ök tulan nö löknyö elvāngre.

¹⁷Tainy takô ngaich ngam tulan nö im kikānö, kiröönngöre ngaich nö kiyung nö lā-al yip tö ōtngöre kūön ò, yip mahaköp nup chöngö ngam Tēv, ane inrē ṙamapkö ngam inmeuktö Yēsū: