Read Car_Nicobarese INMEUKHÖMAT 13 Bible Online

INMEUKHÖMAT 13 - Car_Nicobarese bible

INMEUKHÖMAT 13

¹Ngaich sökhak anga-aṅ nö i kuyāyö ngam mai. Ngaich hĕng nòng ök maheuṅk chu töṙeūla, meutlö nö löklö el mai, sömö sinrōl, sātö kui inrē, söm nup sapīöv rācha i kūö nuk sinrōl, ngaich i nuk kui ò nuk ötlinëkô minë-eny.

²Ngaich ngam töṙeūla, ngam maheuṅk chu, nö sā liōpāt, ane inrē nuk kunröön ò sā kunröön për, ane inrē sā elvāng lāyön ök elvāng ò: ngaich ngam tulan nö kē-ĕkūö ò tö minhôiṅyöre, ngam kantēra ò inrē, tö ök tökiröng chöngö inrē.

³Ngaich hĕng hang ök aṅ i kui ò tö sā tö pōngi kinpaha; ngaich ök nyahaṅ kinpahangvah ò nö lööken: ngaich hĕng pūlngö ngih panam nö pingangkūö tök töṙeūla:

⁴Ngaich cha-a nö salām ök tulan, pò ò nö kētö chöngöre nö ik töṙeūla; ane inrē cha-a salām ök töṙeūla, nö ngö ṙô, Achiāp tö sā ngam töṙeūla? Achiāp inrē tö kô nö kiyung nö lā-al ò?

⁵Ngaich kētu nö in ò ök elvāng tö kiröngô, töt lamëkôre inrē; kētu chöngö nö in ò inrē nö iṙūöhen nö fën anāi nët chumngëṅtö.

⁶Ngaich vā-ainykūöre nö ötlēkôre tö minë-eny Ò, tö ngam inrūkui Ò inrē, acha-a inrē yip mī-iyöng el ngam halīöngö.

⁷Ngaich kētu nö in ò angū-ö, pòn hōtu nö kiyung nö lā-al yip töhet, nö mihôiṅ tö cha: ngaich kētu inrē chöngö nö in ò, chöngö ò nö i kui yip miyöngö, i tarik, i tum mi-ëlô, ane inrē i pumnāmö tarik.

⁸Ngaich ṙòkhöre cha-a min nö salāman yip mī-iyöng ing panam, ṙòkhöre yip töt kūichi minë-eny nö i mat ngam līpöre nômö aṅ im pököre, ngam tö fëli hēten tö ranehlö ngih panam.

⁹Yĕn tarīku tö elnāngu, hökngen ò nö hang.

¹⁰Yĕn tarīku lamā im inkövö, chuh im inkövö min anga-aṅ: yĕn tarīku min tö aṅtī tö sanët nö fël, nyahaṅ tö sanët min anga-aṅ nö fëli. In e an ngam manöiyö ane inrē ṙinātö ellōn yip töhet.

¹¹Ngaich meuk ök tahëng nòng chu-ö töṙeūla mameutlö nö löklö el tumlat; nëtö sinrōl anga-aṅ nö sā pököre, kahôka ṙô anga-aṅ nö sā ṙô tulan.

¹²Ngaich anga-aṅ nö kēkö kaha nup chöngö ök raneh töṙeūla nö ṙòkhöre, nö i kūö ò. Ngaich anga-aṅ nö vīten ngih panam, acha-a inrē yip mī-iyöng kūö e, nö salām ngam raneh töṙeūla, ök tö lööken nö ngaich tök nyahaṅ kinpahare.

¹³Ngaich anga-aṅ nö kiröngö vahīken tö minkahngö, pòn hōtu anga-aṅ nö vīten tameūyö nö yônti nö ṙā-ang el halīöngö nö i kui ngih panam, nö i kūö tarik.

¹⁴Ngaich anga-aṅ nö hachīlö cha, yip mī-iyöng kūö ngih panam, tö kūö nup minkahngö tökētu nö in ò, vahīṙen ò nö i kūö öp töṙeūla: ngö ṙô tö cha yip mī-iyöng kūö ngih panam, nö hōten cha nö vī insā ngam töṙeūla, ngam tönyahaṅ tö kūö ök sanët, ngaich nöng aṅ.

¹⁵Ngaich kētu nö in ò, nö kētö unhômö ò, anga-aṅ ngam insā ngam töṙeūla, pòn hōtu ngam insā ngam töṙeūla nö hĕnghöre kahôka, ngaich hōten cha nö fëli i tumtak cha, yip töt samlām ngam insā ngam töṙeūla.

¹⁶Ngaich hōten cha anga-aṅ nö ṙòkhöre, tökūöṅnö, tökiröng inrē, tökôlò, tötkôlò inrē, töthakövö, töhakövö inrē, nö hōtö kinë-eṅkūö cha tö minkahngö i kël cha nö lāhāmö, hēk i māl cha inrē:

¹⁷Sōtu yip tarik inrē nö kô nö havah, hēk inyih, höng anga-aṅ öp tö minkahngu töp minë-eny ngam töṙeūla, hēk tö minkahngu töp minë-eny ò.

¹⁸In e an ngam mikah. Anga-aṅ ngam tö-akaha elmat, hökngen ò nö kaheuk minkahngö ngam töṙeūla; tön angū-ö an minkahngö ngam tarik, ane ap minkahngö Ò inrē tafūölòng tafūöl anāi tafūöl.