Read Car_Nicobarese INMEUKHÖMAT 14 Bible Online

INMEUKHÖMAT 14 - Car_Nicobarese bible

INMEUKHÖMAT 14

¹Ngaich meuk ngam pököre chu-ö, nö sökhaka nö i kui Rôngö Siyôn, hēngòng fën anāi fën köṅny yip hol Ò. Minënyu Anga-aṅ, ngam Yöng Ò inrē, nö kūichi nö i māl cha.

²Ngaich hang ök ṙô chu-ö, löktö el halīöngö, sā ṙô mahūṅvö mai, sā ṙô tö pōitô kunṙôkö inrē; ngaich ök ṙô ahang chu, sā ṙô yip ramöng nö röngkö nup ranöngre.

³Ngaich tufömngöre ök tinkökö cha, nö tikökṙôre i kūö ngam kantēra, i kūö nup tö fën nòng chehechōn, yip mā inrē. Öt hĕng tak tarik tökô nö haköp ök tinkökö, höng yip tö hēngòng fën anāi fën köṅny, yip töhavaha nö ing panam.

⁴Cha-a yin töt mahachōichngöre nö i kikānö; pò cha nö töhet. Cha-a yin vē tamömrit ngam pököre i töng kū-ö Ò nö kiröönngöre. Cha-a yin töhavaha aṅ i tarik, nö lanòh nö im Tēv, im pököre inrē.

⁵Öt aṅhaṅv elvāng yin tö minyôinyaṅ; öt aṅhaṅv-in yin tö tötlöök fālen.

⁶Ngaich chu-ö meuk öp tahëng Ma-ahānga, kiteūköre nö i ṙat ngam halīöngö, nö aṅhaṅv-in tö ngam töt chanūhuvṙen tölöök inhānga, nö ahangka nö in cha yip mī-iyöng kūö ngih panam, kö i pumnāmö tarik inrē, miyöngö, tum mi-ëlô, tarik inrē;

⁷Ngaich ngö ṙô anga-aṅ nö pōitô; Pa-ekūö yin töm Tēv, kē-ĕkūö Ò tö ineū-euṅ; tön yih an ngam ṙētak öp kinṙôka tö Ò, Salām ngam vamī-il halīöngö, panam inrē, mai, tö nup hanëmlö mak inrē.

⁸Ane inrē ök tahëng, ök innëtö Ma-ahānga, nö tömrit, nö ngö ṙô, Fukngö, fukngö ök Pēpilön ök tökiröng, ök vamīten vē pumnāmö tarik nö òk öp vāin lanīnö, öp chinô-òṅ ò.

⁹Ane inrē ök tahëng Ma-ahānga, ök linūöyö, tömrit cha, nö ngö ṙô, nö pōitô, Yĕn tarīkuvö samlām ngam töṙeūla tö ngam insā ò inrē, ngaich inrē nö kēḵ minkahngö nö i mālre, i këlre inrē,

¹⁰Ngaich anga-aṅ min nö òk ngam vāin ngam lanīnö ngam Tēv, öp töhalēnö, nö öt katēhĕ nö el öp kōp lanīnö ò; ngaich öt hakôlöngṙô min anga-aṅ nö i kūö tameūyö, tö hū ihong inrē, nö i kūö yip töhet Ma-ahānga, i kūö ngam pököre inrē:

¹¹Örheūheu ngaich öp lul kūö öt inkôlò cha, nö chuh lātulöng; öt haneūheuvö cha-a, sakāmö hatööm inrē, cha-a yip samlām ngam töṙeūla tö ngam insā ò inrē, yip töng kamëḵ minkahngö öp minë-eny ò inrē.

¹²Ihih an ngam manöiyö yip töhet, acha-a yip tököp tö nup chöngö ngam Tēv, ane inrē ngam ṙinātö ellōn in Yēsū.

¹³Ngaich chu-ö hang ök ṙô lamöktö el halīöngö tö ngö ṙô Kūich, töngamūhuten yin vē kupah, vē tökapah nö im Mā Tēv, nö tökôlò; hôṅ, ngö ṙô ngam Töhet Fanöinylö, hòṅ cha nö ngaich nö heūheure nö ṙā-ang i nup la-enre; pò nup la-en cha nö tömrit cha.

¹⁴Ngaich ngëicha chu-ö, ngaich meuk ök tö-ishoh taṙul, hĕng tak ök maheuṅk chu i kui ök taṙul, tö sā ngam Kūön tarik, elkui Ò ök hĕng humlum sapīöv, hĕng nòng ök kanöt eltī ò tö keut.

¹⁵Ane inrē ök tahëng Ma-ahānga, kunyī-inyre nö ṙā-ang el ök töhet chūök, pōitô nö hūken Ò, ngam amūichhak nö i kui taṙul, Tīnngö kamë-eṅrö ap kanötre man, ngaich köt, tön yih an ngam ṙētak kinötö nö ngaich; pòn ngaich në ṙòng ngih panam nö yahngö kanöiyö nö ngaich.

¹⁶Ngaich anga-aṅ ök amūichhak nö el ök taṙul nö suktö ök kanöt nö i kui ngam panam; ngaich hamūlö yip aṅkūö ngam panam.

¹⁷Ane inrē ök tahëng Ma-ahānga nö kunyī-inyre nö ṙā-ang el ök töhet chūök, öp më-el halīöngö, aṅhaṅv-in inrē anga-aṅ tök tökeut kanöt.

¹⁸Kunyī-inyre ök tahëng Ma-ahānga, nö ṙā-ang ik tahāklö, ök tömihôiṅ tö tameūyö; ngaich pōitô anga-aṅ nö hūken ò öp tö aṅhaṅv-in tök tökeut kanöt, nö ngö ṙô, Tīnngö kamë-eṅrö öp tökeut man kanötre, ngaich hamūl në tūmö ṙòng vāin ing panam, ngaich nun minë ṙòng ò vāin nö sööḵngö tö kanöinyöre.

¹⁹Ngaich ök Ma-ahānga nö suktö ök kanötre nö i kui ngih panam, ngaich hamūl nup ṙòng vāin ngih panam, ngaich sukhöt u nö el kinrān vāin, öp tökiröng kinrān vāin, lanīnö ngam Tēv.

²⁰Ngaich röönö ök kinrān vāin nö lā-uk tök el panam, ṙöichnyi ngaich mahām nö ṙā-ang ël ök kinrān vāin, söl im inkālkūö minë kōra sā rô-òlkūö tö hĕng köṅny tafūölòng förlông. (300 Kg Mtr rôtòng 2 Mtr rū-uti.)