Read Car_Nicobarese INMEUKHÖMAT 16 Bible Online

INMEUKHÖMAT 16 - Car_Nicobarese bible

INMEUKHÖMAT 16

¹Ngaich hang ök töpōitô chū-ö löknyö el ök töhet chūök,ngö ṙô tö yik tö sat tak Ma-ahānga, Kiröönngöre yin öi ṙöhnyö aṅ nup tö sat töchilū pingāṅl tö nup lanīnö ngam Tēv, nö i kui ngam panam.

²Ngaich kiröönngöre ök raneh, ngaich ṙöhnyö aṅ ök töchīlū pingāṅlre nö i kui ngam panam; ngaich vīngöre angū-ö nö ṙënṙô nö töchökhu, nö i yik tarik yik töminkahngu tö aṅ ik töṙeūla, yik samlām ök insā ò inrē.

³Ngaich ök innëtö Ma-ahānga nö ṙöhnyö aṅ ök töchilū pingāṅlre nö el mai; ngaich vīngöre angū-ö nö sā mahām öp kupah tarik; ngaich keuheūtngörevah yip tö aṅhaṅ unhôṅmö nö kapah, anū-ö inrē nup aṅ ngam mai:

⁴Ngaich ngam linūöyö nö ṙöhnyö aṅ ngam töchilū pingāṅlre nö el minë tahël, töhëmlö mak inrē; ngaich vīngöre angū-ö nö mahām.

⁵Ngaich chū-ö hang ṙô ök Ma-ahānga yōm nuk mak nö ngö ṙô, Tölöök Man Me-eṅ, Öm tö töngamuh, Öm tö misī, Me-eṅ Töhet, pò Meh ngaich ngatī kahôka:

⁶Pò cha nö ṙöhnyö mahām yik töhet, pròfĕt inrē, ngaich kē-ĕkūö cha me-eṅ nö òk mahām: tölöngen yin.

⁷Ngaich hang ṙô ök tahāklö chū-ö; Hôṅ, Ō Mā Tēv, Tökeuhēttöre Chöngö kô-en nun ane inrē tölöök minë tī meh kinṙôka.

⁸Ngaich ök finënö nö ṙöhnyö aṅ ök töchilū pingāṅlre nö i mat ngam tavūöi; ngaich kē-ĕvkūö anga-aṅ nö hangehngö tarik tö mateūyö.

⁹Ngehngö ngaich tarik tökūö ök yöng ṙanāichö: ngaich cha-a nö ötlēkôre tö minë-eny ngam Tēv, ngam tö minhôiṅyu tö minë invah tö lëlngökūö, pò cha nö öt havöötö ellōnre nö kētö ineū-euṅ Ò.

¹⁰Ngaich ngam tinneūyö nö ṙöhnyö aṅ ngam töchilū pingāṅlre nö i kui öp kantēra ngam töṙeūla; sangulköti kui ngam pūlngö ò; ngaich cha-a nöng kuṙāp litākre tö kūö chanököre,

¹¹Ngaich cha-a nö ötlēkôre tö ngam Tēv ngam halīöngö tö chanököre, tö kūö tökônyi vahre inrē; ngaich cha-a nö öt havöötö ellōnre tö nuk la-enre.

¹²Ngaich ngam tinfūölö Ma-ahānga nö ṙöhnyö aṅ ngam töchilū pingāṅlre nö i kui öp tökiröng tahël, ngam tahël Yūfratīs, nyôngö ngaich ngam mak, pòn hōtu ngam talöökö nö vī-i nö lēn, nö talöökö yip rācha yamih nö lā löklö maneutlö ngam tavūöi.

¹³Ngaich chū-ö meuk yik tötlöök sī-ö, lūöi tak, meutnyi nö ṙā-ang elvāng ök töṙeūla, ṙā-ang elvāng ök töminyôinyaṅ pròfĕt inrē, nö sā tarôṅt;

¹⁴Pò cha nö ma-alaha tötlöök sī-ö, vīkö minkahngö; nup chamuh i yip rācha në panam nö ṙòkhöre, nö hamūlö cha nö kiyung, ip tökiröng sakāmö ngam Tēv, Tökeuheūttöre Chöngö.

¹⁵Yĕh meuk, yih chin sā mū-ulāya. Tökôlò ön ngòh hamönga, tököpen hilā inrē, hòṅ ò nö öt höng chumlal nö kiröönngöre, ngaich meuk sinrōngkūö ò cha-a.

¹⁶Ngaich cha-a nö hamūlöre nö ip chūök, Armakētòn, tö ṙô Heprāi.

¹⁷Ngaich ngam sinātö nö ṙöhnyö aṅ öp töchilū pingāṅlre, nö i kui ngam kuföt, ngaich löknyö el ök töhet chūök nö meutnyi, löknyö ik kantēra ök tökiröng ṙënṙô, tö ngö, Ngaich an nö keuheūten.

¹⁸Ngaich hanyālö nuk umuh, ṙënṙô, kunṙôkö inrē; ngaich yöng kumyeūnö ök umuh, öt töngatī-ivö hēten tarik nö ikūö ngih panam, yöng ṙôkö ök kumyeūnö, yöng kumlēḵ.

¹⁹Ngaich ngam tökiröng elpanam, nö lūöi tit nö kāichö, fukngö inrē nup elpanam yip pumnāmö tarik; ngaich Pēpilön, öp tökiröng, nö fēkaṙen nö i kūö ngam Tēv, nö kē-ĕkūö ò tö ngam kōp vāin öp tanāinyö lanīnö Ò.

²⁰Kö falngöre ngaich nuk kun panam, öt kôti inrē nuk rôngö.

²¹Yöng ṙôken nuk tö hū ihong inrē, kö hĕng tālen lumngan nö hĕng, löktö el halīöngö nö löö kui tarik; ötlēkôre ngaich tarik tö ngam Tēv, kūö ngam invah tölëlngökūö, aṅ im tö hū ihong, pò ngam invah tölëlngökūö nö yaha ṙôkö.