Read Car_Nicobarese INMEUKHÖMAT 17 Bible Online

INMEUKHÖMAT 17 - Car_Nicobarese bible

INMEUKHÖMAT 17

¹Ngaich yihtöre nö umuh, hĕng tak aṅ i yik tö sat tak Ma-ahānga, yik tö aṅhaṅv-in tö nuk tö sat töchilū pingāṅl, ngaich vë-ekūö cha nö ngö ṙô, Ta-ih, hòṅ hameukhömat meh chin tö kinṙòkken ngam yöng mi-inyihköre kikānö, ngam amūichhaka nö i kui töṙōl mak;

²Ngam töchô-òv tö vē rācha ngih panam, ngaich acha-a inrē yip mī-iyöng kūö ngih panam, mihiyōiyi tö ngam chinô-òṅ ò.

³Im Töhet Fanöinylö chū-ö kē-ĕyö marôvat tö ò, ip el inchōn tö hĕng; ngaich meuk öp kikānö chū-ö hĕng tak, ūichhaka nö i uk öp töturëṙö kaha töṙeūla, vinngö alaha tö minë-eny ötlinëkô, sātö kui, sömö sinrōl inrē.

⁴Hayūtö ök kikānö tö töngāṅv huṙing tö turëṙö mat inrē, hanyöṅtö inrē tö humlum, töpōiṙāi ihong, töpōiṙāi tasehe inrē, aṅhaṅv eltī anga-aṅ tö humlum kōp tööḵlö tö nup SIN-ÒKKŪÖ, nup mum aṅ i chinô-òṅ ò,

⁵Ngaich öp minë-eny hĕng nö kūichi, ÖTMIKAHKŪÖ, PĒPILÖN TÖKIRÖNG KIKĀNÖ YÖNG YIP MI-INYIHKÖRE, TÖ NUP SIN-ÒKKŪÖ INRĒ ING PANAM.

⁶Ngaich meuk ök kikānö chū-ö nö hiyōi tö kūö mahām yik töhet, tö kūö mahām yik töfëli kinpaha inrē tö kūö Yēsū, Ngaich hē chu meūkan, kiröngö pinngangkūö chū-ö ngaich.

⁷Ngaich ngö ṙô ök Ma-ahānga tö chu, Kūöyôm pingangkūö? Hòṅ vë-enynang meh chin tö ngam ötmikahkūö aṅ im kikānö, tö ngam töṙeūla inrē ngam chūök ò, ngam tökuiyu tö minë tö sat tö sömö sinrōl inrē.

⁸Ngam maheuṅk meh töṙeūla ngaich, lān rö-ö; ngaich ap nö hòṅ meutlö nö ṙā-ang el ngam ṙeūvö, töt lataṙeū-euv, ngaich chuh im öt inkôlò: ngaich acha-a min yip mī-iyöng kūö ngih panam nö pingangkūö, yip töt kūichi minë-eny nö i mat līpöre nômö, hēten tö ranehlö ngih panam, hē cha nö hatīönkö ngam töṙeūla tö ò sin nö kô, lān rö-ö, ngaich yih min.

⁹Angū-ö ngih ellōn tömikāhavö. Tö sat nun nö rôngö minë tö sat kui, tö ūichö kui töm kikānö:

¹⁰Tö sat tak yin cha-a nö rācha; taneuihang tak yik töfukngö, ōtre öp hĕng tak, öl töyīhih öp tahëng taka, chalôhë anga-aṅ, ngaich iṙūöhen nö rahëichtaṙen.

¹¹Ngaich öp töṙeūla nö kô-en sin, lān rö-ö, anga-aṅ an inrē hinëvhöre, nö aṅ i yip tö sat tak; ngaich chuh im ötkanôlò anga-aṅ.

¹²Minë maheuṅk meh inrē tö söm sinrōl, tö söm tak yin cha-a nö rācha, më tö-öl nö teūngen tö pūlngöre; teūngen pöri cha-a tö chöngöre nö sā rācha, nö hol tö ngam töṙeūla, nöng tölngö tö töhĕng köṅny ṙô rô-òten.

¹³Töhēngö ellōn yin cha-a, ane inrē cha-a, kētö minhôiṅyöre chöngöre inrē nö im töṙeūla.

¹⁴Ngaich cha-a vē min nö kiyung nö lā-al ngam pököre, ngaich mihôiṅ min ngam pököre, tö cha, pòn Anga-aṅ Mākūö vē mā, ane inrē Rācha kūö vē rācha; ngaich cha-a min inrē yip hol Ò nö mihôiṅ, yip töhavëtu, tökatöllöng, tökô-en inrē.

¹⁵Ngaich ngö ṙô Anga-aṅ tö chu, Minë mak maheuṅk meh, i chūök ngam mī-inyihköre kikānö nö ūichhak, tarik yin cha-a, tömaṙôngö, pumnāmö tarik, tum mi-ëlô inrē.

¹⁶Ane inrē minë tö söm sinrōl maheuṅk meh, tö ngam töṙeūla inrē, surīkhö ngam mī-iyihköre kikānö min cha-a, ha-āchiṙen min hilā, kāḵ alaha ò cha-a min inrē, haṙāpngen ò inrē min cha-a nö keuheūtngöre nö i kūö tameūyö.

¹⁷Pò ngam Tēv nö ṙāhöt ellōn cha nö la-evṙen töp ellōn Ò, vītöre inrē nö töhĕngö ellōn, ane inrē kēngö ngam pūlngö cha nö im töṙeūla, hanöng saha minë ṙô ngam Tēv nö hateūngi.

¹⁸Ngam kikānö maheuṅk meh, angū-ö an tökiröng elpanam, ngam mahayöng nö i kui vē rācha ngih tumlat.