Read Car_Nicobarese INMEUKHÖMAT 18 Bible Online

INMEUKHÖMAT 18 - Car_Nicobarese bible

INMEUKHÖMAT 18

¹Unôichrit e chū-ö meuk öp tahëng ma-ahāga: yôntī ṙā-ang el halīöngö, aṅhaṅv-in tö tökiröng chöngö; ngaich ngam kanôlò ò nö yāngökūö tī töm panam.

²Ngaich hūḵa anga-aṅ nö Kalēḵĕṙô, nö ngö ṙô, Fukngö, fukngö öp tökiröng Pēpilön, vītöre öp nö ngaich nö elyöngö yip sī-ö, kinlōngö yip töchōich sī-ö, ane inrē kinlōngö nup töchōich, ane inrē kumnyah elmat chehechōn.

³Pòn lökten ngam vāin ngam lanīnö aṅ im chinô-òṅ ò, nö ṙòkhöre vē pumnāmö tarik nö fukngö; ngaich yip rācha ngih panam nö chô-en ò, ṙūölöre kanôlò inrē vē mī-inyih, nö lökten im sinṙaklen ò.

⁴Ngaich chū-ö hang ök tahëng ṙô löktö el halīöngö, nö ngö ṙô, Yī-ö tarik chu, kunyī-iny ṙā-ang in ò, yī-ö töt nôlta i nup tökööl ò, hòṅ yīö öt kēḵ ngam tölëlngökūö invah ò;

⁵Pò nup tökööl ò nö uroh nö söllö nö el halīöngö, ngaich ngam Tēv nö fēḵĕlre tö nup tökööl ò.

⁶Kē-ĕkūö ò sā tī ò anga-aṅ, nëtö tī tö nup tö nët sā nup la-en ò; el öp kōp öp kalūöich aṅ ò, nëtö kalūöichti in ò.

⁷Ip töng ṙôkhölṙen ò nö hakeūṙöre, ngaich nö ṙūölö sinṙakngenre, ngatī ṙôkentī kē-ĕkūö ò tö kanihngen töchökhu, miṙivlōn inrē: pòn ngö ṙô anga-aṅ nö ellōnre, Ūichhak chin sā rāni, rö-ö chin inrē tafīösi; ane inrē öt löktu öich meuk miṙivlōn.

⁸Lökten, i tö hĕng sumkam nup min tölëlngökūö invah nö yih nö in ò, kinpaha, miṙivlōn, inyāichö inrē; keuheūtngöre min anga-aṅ nö ṙāpngö tö kūö tameūyö; pò ngam Mā Tēv nö tö kalēḵ, ngam kamhòkken ò.

⁹Ngaich yip mā-asĕhken ò, ane inrē yip sumṙakngö lōnre nö in ò, peuny harāman min inrē, yē cha nö ngëichkö lulkūö inṙapngö ò,

¹⁰Sökhak nö marôvat, pòn pa-ekūö tö ngam töchökhu öt inkôlò ò. Ötkôlò, ötkôlò, ngam tökiröng elpanam, Pēpilön, tökalēḵ elpanam! pòn i tö hĕng chinvāl inhangnang, ngam kinṙòkken meh nö yih.

¹¹Ngaich yip mī-inyih aṅ ngih panam nö peuny, haṙivhen ò inrē, pòn öt tarīku mahavah nyanihre nö hēk;

¹²Nup innyih, humlum, rupīö, töpōiṙāi ihong, töpōiṙāi tasehe, tövai inrē linen, töngāṅv huṙingö mat, resöm, töturëṙö mat inrē; ṙòkhöre inrē nup tötahūsa chōn, keuheūtngöre inrē nup chehen tövī-i aṅ i kanël ölöfānta, nup chehen inrē tövī-i aṅ i nup töpōiṙāi chōn inrē, mās, vët, töisoh töngëḵ ihong inrē.

¹³Talchīni, lōpān, sanòh vah, tötahūsa, vāin, tavī-i, maita, nuā, pököre, tö-inyihka kōra, inröl, töinyihka tarik.

¹⁴Ngaich nuk ṙòng chōn yahikngö ngam nômö meh, nö ṙāngen meh, ṙòkhöre nup tökuchik töpōiṙāi nyā-aṅkūö, lëlngö nö ngaich nö ṙāngen meh, öt hēka min tarik nö kôtökūö tö ò.

¹⁵Ngaich yip mi-inyihkö u anū-ö chehen, yip tī ò nö vīlöng nö kôlò marôvat min nö sökhaka tö kūö pinhë-eṅkūöre tö ngam töchökhu ötinkôlò ò, peuny, haṙivlōn inrē;

¹⁶Ötkôlò, ötkôlò ngam tökiröng elpanam, ngam töhanyöṅtö tö tövai linen hilā, töngāṅv huṙīng mat, töturëṙö mat inrē, ane inrē tö hayöṅtö tö humlum, töpōiṙāi ihong, töpōiṙāi tasehe inrē!

¹⁷Pòn höng i tö hĕng chinvāl ṙô inhangnang minë töngiṙôken kanôlò nö yëḵngen. Ṙòkhöre yöngkūö chōng, ṙòkhöre inrē yip lamök el chōng nö keuheūt kū-öre nö kiröönngöre, yip aṅ chōng, ane inrē i ṙôngö yip maha-aṅ nômöre nö el mai, marôvat cha-a nö sökhaka.

¹⁸Ngaich hūḵnyôre, tö saha matre nö meuk lulkūö finöngngö ò, nö ngö ṙô, Öp yòh öp elpanam tö sā ngam tökiröng elpanam?

¹⁹Tūi elkuire cha-a ngaich tö tumlat, hūḵa inrē, peuny, ane inrē haṙivlōn, nö ngö ṙô. Ötkôlò, ötkôlò, ngam tökiröng elpanam, ngam chūök yip tö chōngu nö el mai, nö vīlöngö nö kôlò, tö kūö ṙôken nuk ṙāitī! Pòn höng i tö hĕng chinvāl ṙô inhangnang angū-ö nö vītu nö lëlngö.

²⁰Ha-öinyngövah ò, me-eṅ halīöngö, yī-ö inrē töhet, yī-ö tanīnöṙô, yī-ö pròfĕt inrē; pò ngam Tēv nö kahòklö kui yīö nö in ò.

²¹Ngaich hĕng tak ök tökalēḵ Ma-ahānga kēḵ ök ihong, tö sā tökiröng tinlön, sukten ò ngaich nö el mai, nö ngö ṙô, Ngatī ṙôkö fanukngö öp min Pēpilön ngam tö kiröng el panam, nö suktu, ngaich ötkôti min nö hēk.

²²Ngaich öt hāngö min nö in meh nö hēkngöre, ṙô yip ramöng, yōm ranun, nyamamkö fanöö inrē, öt tarīku min inrē tö milichngen vahī, öp töng sitih milichngen, töhēkngöre nö kôti nö in meh; öt hēkngöre min nö hāngô öp tinlön nö in meh;

²³Öt hēkngöre min ëāṅvö nö yāngökūö nö in meh; öt hēkngöre min öp kikōnyö tö hapihö, ane inrē öp kikānö tö hapihö, nö hāngö ṙô nö in meh; pò yik mī-inyih in meh nö cha-a mākūö ngam panam; pòn hachīlö nö ṙòkhöre vē pumnāmö tarik tö ngam milūönö meh.

²⁴In ò inrē nö kôti nuk mahām yik pròfĕt, yik töhet inrē, tö yik taṙòkhöre inrē töfëli nö i kūö ngih panam.