Read Car_Nicobarese INMEUKHÖMAT 19 Bible Online

INMEUKHÖMAT 19 - Car_Nicobarese bible

INMEUKHÖMAT 19

¹Unôichrit në chū-ö hang ök tö sā ṙôktô tömaṙôngö tarik el halīöngö, nö ngö ṙô, Halēluya; Inyööken, kanôlò, minhôiṅyö aṅ im Tēv hī:

²Pòn kô-en, löök inrē minë kinṙôka tö Ò; pò Ò nö kahòkken ngam yöng mī-inyihköre kikānö, ngam mahachōichngö ngih panam tö ngam chinô-òṅre, ngaich inrē Anga-aṅ nö havahal mahām yik tanölöṙôre nö eltī ò.

³Halēluya, ngö cha-a im innët heuh. Lullöre kūö ngam lul ò nö öt heumköre.

⁴Ngaich yip tö nët anāi fën tak mā, tö nup tö fën nòng töṙeūla inrē nö afukngöre ngaich salām ngam Tēv, ngam amūichhaka nö el kantēra, nö ngö ṙô, Āmen; Halēluya.

⁵Ngaich ök pöinyṙô lamöknyö ik kantēra tö ngö ṙô, Ha-öiny ngam Tēv hī, ṙòkhöre yī-ö tanöölö ṙô Ò, yi-ö tö pa-ekūö tö Ò, tökūöṅnö tökiröng inrē.

⁶Ngaich chū-ö hang ök tö sā pöinyṙô tö maṙôngö tarik, tö sā pöinyṙô töpōiyen mak inrē, sā pöinyṙô tökalēḵ kunṙôkö inrē, nö ngö ṙô, Halēluya: pò ngam Mā, ngam Tēv hī, ngam Tökeuheūttöre Chöngö nö hayöng.

⁷Tā-a töi ṙāmölōn, öi pōyen ṙanāmölōn, tā-a töi hapōilen Ò inrē: tön yih an ngam inpihö ngam Pököre, ngaich inrē ngam pīhö Ò nö halēnöre.

⁸Ngaich kētu nö in ò pòn tövai linen hilā, tö payāngamat, het inrē: pò ngam tövai linen hilā nö la-en yip töhet nö tölöök.

⁹Ngaich ngö ṙô anga-aṅ tö chu, Kūich, Tökôlò yin cha-a vē töngööntu nö im nyinā-aṅ inpihö ngam pököre. Ngaich ngö ṙô anga-aṅ tö chu, Tökô-en nun në nö ṙô ngam Tēv.

¹⁰Ngaich afukngöre chū-ö i röön ò öich salāman. Ngaich ngö ṙô anga-aṅ tö chu, Yĕh meuk, uh man ngatī tī tö e: hol meh chin chū-ö tanölöṙô, hol yip hol meh inrē ṙamapkö ngam inmeuktö Yēsū; salām ngam Tēv: pò ngam inmeuktö Yēsū nö angū-ö mā-alaha ngam inhānga.

¹¹Ngaich meuk ngam halīöngö chū-ö nö löpnyukūö; ngaich meuk ök hĕng nòng tö-isoh kōra, ök aṅ uk ò inrē nö ūichhaka, ök töminënyu tö Tökô-en ane inrē Kanô-en; im lanöökö Anga-aṅ nö kahôka, kiyung inrē.

¹²Ngaich nuk mat Ò nö töhū nö tameūyö, ṙōl nup sapīöv rācha i kui Ò: hēngö minë-eny Anga-aṅ tö tö kūichi, öp töt mikahkūö tö hĕng tak, höng Anga-aṅ.

¹³Hayūtö Anga-aṅ töp tö-aṙū-uti inyut, tö kichënyö mat tö mahām: Ngam Ṙô ngam Tēv invëka ap minë-eny Ò.

¹⁴Ngaich yip kumyung el halīöngö nö tömrit Ò nö i uk nuk tö-isoh kōra, tö hayūtö tö tövai linen hilā. Isoh, het inrē.

¹⁵Ngaich löknyö elvāng Ò nö meutnyi öp tökeut sanët, pòn hōtu Anga-aṅ nö aṅtīten tö ò nö fang vē pumnāmö tarik; ngaich hayöngö cha min Anga-aṅ nö aṅtī tö vët tinkung: ngaich Anga-aṅ nö röön öp kinrān vāin, öp tanānyö lanīnö ngam Tökeuheūttöre chöngö Tēv.

¹⁶Ngaich hĕng ök minë-eny tökūichi nö i mat ök tö-aṙū-uti inyut Ò, i takeun Ò inrē, Rāchakūö vē rācha, Mākūö vē mā.

¹⁷Ngaich hĕng tak ök maheuṅk chu Ma-ahānga, sökhaka nö im Tavūöi; ngaich hūḵa anga-aṅ nö pōitô, ngö ṙô tö nup chehechōn nö ṙòkhöre kumteū nö i ṙat ngam halīöngö, Ta-ih hamūlöre im yöng nyina-aṅ im Tēv;

¹⁸Hòṅ yīö kā alaha yip rācha, alaha yöngṙen kumyung, alaha tökalēḵ tarik, hĕnghöre töthakövö töhakövö inrē, tökūöṅnö tökiröng inrē.

¹⁹Ngaich chū-ö meuk öp töṙeūla, yip rācha ngih panam inrē, tö yip kumyung in cha inrē, nö hamūlöre nö kiyung nö lā-al Ò, ngam amūichhak nö i uk kōra, lā-al yip kumyung in Ò inrē.

²⁰Kē-ĕ ngaich ök töṙeūla, hol ò inrē ök töminyôiny pròfĕt, ök tö tītö nuk pinngangkūö nö i kūö ò, nuk aṅtī ò nö hachīlö cha, yip töteūngen tö minkahngö ngam töṙeūla, acha-a inrē yip samlām ngam insā ò: nëtre taka cha-a ngaich nö suktu nöng aṅ nö el kūö öp tötöh tameūyö tö kūö tö töhū ihong:

²¹Ngaich yik chööḵ nö kumpaha tö kūö sanët Ò öp amūichhak nö i uk kōra, ök sanët lamöknyö elvāng Ò nö meutnyi: ngaich ṙòkhöre nuk chehechōn nö tööḵngen tö alaha cha.