Read Car_Nicobarese INMEUKHÖMAT 2 Bible Online

INMEUKHÖMAT 2 - Car_Nicobarese bible

INMEUKHÖMAT 2

¹Ngö tī kūich, löö ip Ma-ahānga ap māṅ i Efisös, Ṙô Ò nun në, ngam ṙamapkö minë tö sat taneūsömat nö lāhāmöre, ngam vamāngngöre nö lök ellōn minë humlum chūökröön tö manyak:

²Akahalōn chin tö nup vahīṙen meh, tö ranëtö meh inrē i manöiyö, tö meh inrē ötkô ṙap tötlöök tarik, ngaich inrē öm kalaha cha yip mahavëköre nö tanīnöṙô, ngaich rö-ö cha-a, ngaich kôtökūö me-eṅ tö cha nö töminyôiny;

³Aṅhaṅv-in man tö manöinyö, ngaich kūö ngam mine-eny chu öm ṙāpa, ngaich öm höng öt ṙeingö.

⁴Aṅhaṅv-in pöri chū-ö tö ngih kumnyah nö lā in meh, pò meh ngaich ṙāngö ngam mu-urĕh hanāngenre.

⁵Lökten man fēḵĕlre töm ṙeūngöre fukngö, ngaich havöötö ellōnre, la-evṙen ngaich tö minë mu-urĕh vahīṙen; yĕn rö-ö, yih chu-ö ngaich in meh, ngaich kēḵngö ngam chūök rööntö manyak meh min nö ṙā-ang im chūök e, yĕm öt havöötö ellōnre.

⁶Īnu pöri me-eṅ tö ngih, pò meh surīkhö vahīṙen yip tamömrit Nikòlāi, yip surīkhö chu chū-ö inrē.

⁷Ngòh tö-elnānguvö hökngen ò nö hangihtöre tö ṙô ngam Töhet Fanöinylö, tö në māṅ. In Ò ngam tömihôiṅ, anga-aṅ tö kē-ĕvkūö min tö chu nö nyā ṙòng ngam chōn nômö, ngam me-ël ngam Peretāis ngam Tēv.

⁸Löö ip Ma-ahānga aṅ ip māṅ i Ismörnā ngö tī kūich, Në nun ṙô ngam raneh, ngam manā-aṅ inrē, ngam tökapah sin, ngaich aṅ nö hēk:

⁹Akahalōn chin tö kanihngen meh, tö ötkakôlò meh inrē (kôlò pöri me-eṅ), ane inrē tö ngam ötlinëkô cha yip Yahūti tö ṙôre, ngaich nö rö-ö cha-a, chūök vine-eṅkūö sātān pöri.

¹⁰Uh man pa-ekūö tö u nup töt ṙôktörevö kanihngen meh; yĕh meuk, tö ngam sī-ö nö hòṅ rultöre nö sukhöt yip rēvre tö yīö nö el kinlōngö, hòṅ yīö kalaha; kanihnguṙen yin min söm sumkam. Söl i kinpahare kanô-en man yēḵ, ngaich kē-ĕkūö meh min chu-ö tö sapīöv aṅ i nômö.

¹¹Ngòh tö elnānguvö hökngen ò nö hangihtöre tö ṙô ngam Töhet Fanöinylö tö në māṅ, Anga-aṅ ngòh tömihôiṅ, öt chök min tö kūö ngam innëtö kinpaha.

¹²Ane inrē löö ip ma-ahānga aṅ ip Māṅ i Pörkamön ngötī kūich; Në nun ṙô ò Anga-aṅ, ngam tö aṅhaṅv-in tö ngam tö āṅngöre keūtö sanët:

¹³Akahalōn chin tö chūök meh iyöng, nöng i chūök ngam kantēra Sātān, ngaich me-eṅ öm köptī tö ngam minë-eny chu, ngaich öt mahngö ngam mikah in chu, pòrô i nuk sakāmö Antipas ök ameūken chu, tökô-en nö chu-ö, ök aṅ in yīö töfëli, i chūök Sātān nö iyöng.

¹⁴Haroh tum pöri nup kumnyah in chu lā in meh, pò meh aṅhaṅv-in umuh tö yip rēvre ṙamapkö ap inköphöti aṅ in Pēlām, ök mahaköpten Pēlak, nö kavaltö kinvē-ĕre yik kūön Israĕl, nö nyā nuk tökētu nö i insātēv, ngaich asēha inrē.

¹⁵Aṅhaṅv-in man inrē tö yip rēvre ṙamapkö ngam inköphöti aṅ i yip tamömrit Nikòlāi, öm ngatī.

¹⁶Lökten havöötö ellōnre; yĕn rö-ö, ka-eūyen chu-ö min yih, ngaich kiyung min chu-ö lā-al cha, aṅtī töp sanët aṅ elvāng chu.

¹⁷Ngòh tö elnāngu, hökngen ò nö hangihtöre tö ṙô ngam Töhet Fanöinylö, tö në māṅ. In ò kē-ĕvkūö tö chu tö aṅ im töhayūni manna, ngaich kē-ĕkūö ò min chu-ö inrē tö tö-isoh ihong hĕng, ikui ap ihong hĕng öp tufömngöre mine-eny nö kūichiyö, öp öt huneū-euṙô töhĕng tak, höng anga-aṅ öp töteūngen tö e.

¹⁸Löö ip Ma-ahānga aṅ ip māṅ i Taitiriā ngötī kūich; Në nun ṙô ngam Kūön ngam Tēv, ngam tö mātu tö tösā tameūyö, nup kunröön Ò inrē tösā tö ayānga mās:

¹⁹Akahalōn chin tö vahīṙen meh, tö ngam hanāngen manöinyö meh inrē, tö minë manā-aṅ vahīṙen meh nö mötlö tö minë raneh.

²⁰Aṅhaṅv-in pöri chu-ö tö ngih nö lā in meh, pò meh halöngten ngam kikānö Yēsipel öp kikānö pròfĕt töṙôre, ngaich anga-aṅ nö haköphöti ane inrē hachōḵngen yip kūön alaha chu nö asĕhha, nya-aṅvkūö inrē tö nup tökētu nö i insā tēv.

²¹Ngaichtī chin kētö ṙētak ò, hòṅ ò nö havöötö ellōnre; ngaich öthōḵ anga-aṅ nö havöötö ellōnre tö ngam insĕha töre.

²²Yĕh meuk, sukten ò chin nö el chamam, acha-a inrē yip ma-asĕhken ò nö suktu nö el ngam yöng kanihngen, yē cha nö öt havöötö ellōnre nö ṙā-ang nup la-en ò.

²³Fëlngö yip kūön ò chin min aṅtītö kinpaha; ngaich ṙòkhöre në māṅ min nö akahalōn tö chu, öich chū-ö anga-aṅ, chamöh elkilpong, el fanöinylö inrē; kö kē-ĕkūö yīö min chu-ö tö tösā nup vahīṙen yīö.

²⁴Ngö ṙô pöri chu-ö tö yīö, tö yip tö ōtngöre inrē i Tāitiriā, i ṙôngö yip töt aṅhaṅv-in tö ngih inköphöti, yip töt akahakūö tö ṙū-uti nup aṅ im Sātān, sā ṙô cha; öt hĕng tak hakeunlö chin tö yīö tö tahëng lumngan.

²⁵Haköptīre pöri yī-ö, hanöng saha yanīhih chu, tö nup in yīö.

²⁶Anga-aṅ ngòh tömihôiṅ, anga-aṅ ngòh mahaköp nup vahīṙen chu inrē nö söl ip manā-aṅ, anga-aṅ min tökē-ĕvkūö tö chu tö chöngö nö ikui vē tarik:

²⁷Ngaich anga-aṅ min nö hayöngö cha nö aṅtī tö vët tinkung, sā në tanīöyö ngòh vamī tanīöyö nö lakūki tö tī ngòh tö kichëyöre; sā taneūngen chu chū-ö inrē tö aṅ im Yöng chu:

²⁸Ngaich kē-ĕkūö ò min chū-ö tö ngam taneūsömat peuheū:

²⁹Ngòh tö elnānguvö, hökngen ò nö hangihtöre tö ṙô ngam Töhet Fanöinylö tö në māṅ.