Read Car_Nicobarese INMEUKHÖMAT 20 Bible Online

INMEUKHÖMAT 20 - Car_Nicobarese bible

INMEUKHÖMAT 20

¹Ngaich hĕng tak ök maheuṅk chu Ma-ahānga, yônti nö ṙā-ang el halīöngö, aṅhaṅv-in töp tinkīök öp ṙeūvö töt lātaṙeū-euv, eltī ò öp hĕng tökiröng sayōk.

²Ngaich kētö tīre anga-aṅ nö im tulan, ngam hötṙeh pēch, ngam sī-ö, Sātān inrē, ngaich nyëkngen ò nö hĕng köṅny samyeūheu,

³Ngaich sukten ò nö el öp ṙeūvö töt lātaṙeū-euv, öpngö kūö e ngaich, ngaich hapānikūö nö i kui ò, pòn sōtu nö hēkngöre nö hachīl vē pumnāmö tarik, hanöng saha nup tö hĕng köṅny samyeūheu nö keuheūt; unôich ngaich tö ngih anga-aṅ min nö rahëichtaṙen nö luhlöng.

⁴Ngaich meuk nup kantēra chu-ö, ūichngöre cha-a ngaich nö ël u, ngaich kē-ĕvkūö cha-a tö kinṙôka; ngaich chū-ö meuk nup nômö cha yip tö röki likeun tö kūö vinënyö Yēsū, kūö ngam ṙô ngam Tēv inrē, acha-a inrē yip töt samlām ngam töṙeūla, ötrēhĕn töp insā ò, öt kēḵ ngam minkahngö inrē nö i mālre, i këlre inrē, ngaich cha-a nö aṅ, ngaich hol Kristū nö hayöng, hĕng köṅny samyeūheu.

⁵Öt aṅ yip tahëng kupah hanöng saha nup tö hĕng köṅny samyeūheu nö keuheūt. Angū-ö an raneh invanlö.

⁶Tökôlò öp anga-aṅ, ane inrē töhet, öp tö nôlta nö im raneh invanlö. Öt kanô-òṅvö nö in cha ngam innëtö kinpaha; ngaich pöri min cha-a nö mameukṙen ngam Tēv ngam Kristū Ò inrē, ngaich hol Ò min nö hayöng nö hĕng köṅny samyeūheu.

⁷Ngaich hē minë tö hĕng köṅny samyeūheu nö keuheūt, ṙānyu ngaich min Sātān nö ṙā-ang ël öp kinlōngöre,

⁸Ngaich kunyī-inyre min nö hachīl vē pumnāmö tarik vē mī-i në tö fën nang ngih panam, ngaich Kôk, Mēkôk inrē, nö hamūlö cha nö mūl nö im kinyūngö: sā ṙôken kuyāyö ngam mai cha-a tö ṙôngöre.

⁹Ngaich nö havāngngö ṙôktāk ngam panam, ngaich havīlö öp chūök yip töhet, ngam elpanam inrē hanāngen; löktö el halīöngö ngaich ök tameūyö, ngaich haṙāpngen cha.

¹⁰Ngaich ngam sī-ö ngam mahachīlö cha nö suktu nö ël ök tötöh tameūyö töhū ihong inrē, ël e inrē öp töṙeūla, töp töminyôiny pròfĕt inrē; örheūheu cha-a min nö haṙeika tö ngam töchökhu ötinkôlò, sakāmö, hatööm inrē.

¹¹Ngaich hĕng ök tökiröng maheuṅk chu kantēra, Anga-aṅ inrē öp amūichhak nö ël e, ṙeū-eung i kūö Ò ngam panam tö ngam halīöngö nö falngöre; ngaich öt kôtikūö anūö tö chūökre.

¹²Ngaich chū-ö meuk yip kupah, tökiröng, tökūöṅnö inrē, sökhaka nö i kūö ngam kantēra; fehnyukūö ngaich nuk līpöre: fehnyukūö inrē öt tahëng līpöre, öp līpöre nômö; ngaich yip kupah nö kahòkkaṙen nö asā nup tökūichi nö i mat nup līpöre, asā-a nup la-en cha.

¹³Ngaich ngam mai nö havanlö yip aṅre kupah; ngaich ngam kinpaha tö ngam chūök kupah nö havanlö yip aṅre kupah: ngaich cha-a nö kö kahòkkaṙen nö asā-a nup lā-en cha.

¹⁴Ngaich ngam kinpaha, tö ngam chūök kupah nö suktu nö el öp tameūyö. Angū-ö ön ngih innëtö kinpaha, ngam tötöh tameūyö.

¹⁵Yĕn hĕng tak öp töt kôti nö kūichi nö i mat ngam līpöre nômö, suktu ngaich anga-aṅ nö el öp tötöh tameūyö.