Read Car_Nicobarese INMEUKHÖMAT 21 Bible Online

INMEUKHÖMAT 21 - Car_Nicobarese bible

INMEUKHÖMAT 21

¹Ngaich chū-ö meuk öp tufömngöre halīöngö, tufömngöre inrē tumlat; pò ngam raneh halīöngö, raneh tumlat inrē, nö rö-övö; chuhngöre inrē ngam mai.

²Ngaich meuk ngam töhet elpanam, tufömngöre Yerūsalem, yôntī nö ṙā-ang el halīöngö nö ṙeū-eung im Tēv, halēnö, sā töhapihö kikānö nö hanyöṅtö nö höngkökūö öp pihöre.

³Ngaich chū-ö hang ök pöönyṙô töpōitô nö löknyö el ök kantēra, nö ngö ṙô, Yĕh meuk, hol tarik an ngam inrūkui ngam Tēv, ngaich Anga-aṅ min nö iyöng in cha, ngaich cha-a min nö tarik Ò, hakôtenre ngam Tēv min inrē nö in cha, nö Tēv cha:

⁴Ngaich chūtngö mak mat min Anga-aṅ, nö ṙā-ang i mat cha, öt ōtngöre min inrē ngam kinpaha, ötrēhĕn min miṙivlōn nö umuh, öt pineūnyu, öt chanöku nö hēkngöre; ngaich nuk raneh inlahen nö chuhngöre.

⁵Ngaich ngö ṙô Anga-aṅ ök amūichhak nö el kantēra, Yĕh meuk, vī taṙòkhöre Chin nö tufömngöre. Ngaich ngö ṙô Anga-aṅ, Kūich, tön tökô-en nun në ṙô, kanô-en inrē.

⁶Ngaich ngö ṙô Anga-aṅ tö chu, Ngaich nun nö yih. Chū-ö chin Alfa, Omeka inrē, ranehlö, manā-aṅ inrē. Kē-ĕkūö ngòh tö haṙëhe nômö Chin min tö aṅ ngam tö hëmlö mak nômö nöng öt ṙāiyu.

⁷Anga-aṅ ngòh tö mihôiṅ ngaich amīnu min tö në, ngaich Tēv ò Chū-ö min, ngaich kūön Chu min inrē anga-aṅ.

⁸Ngòh tö pinheṅ-eṅvkūö pöri, töt ṙamātö-ellōnre, SIN-ÒKKŪÖ, famël tarik, ma-asĕhha, tömilūönö, vame-eṅkūö insātēv ṙòkhöre töminyôinyaṅ, i ël öp tötöh töhūkūö tameūyö, töhū ihong inrē minchööḵö cha; nö ngam innëtö kinpaha.

⁹Ngaich yihtöre ök umuh hĕng tak aṅ i yik tö sat Ma-ahānga, yik tö aṅhaṅv-in tö nuk tö sat töchilū pingāṅl, yik tökūmu tö nuk tö sat manā-aṅ tölëlngökūö invah, ve-ekūö chu anga-aṅ nö ngö ṙô, Ta-ih, hòṅ hameukhömat meh chin tö ngam kikānö tö hapihö, ngam pihö ngam pököre.

¹⁰Ngaich īnu pöri chū-ö töm Töhet Fanöinylö kēngen chu anga-aṅ nö im Töhet Fanöinylö ip tö hĕng rôngö tökiröng, tömarô-òlkui inrē ngaich hameukhömat chu tö ngam töhet elpanam Yerūsalem, yamônti nö ṙā-ang im Tēv, aṅhaṅv-in tö kanôlò ngam Tēv:

¹¹Ngaich ap ëāṅvö e nö sā nup töpōṙāi ihong, sāre öre yĕn yaspör nö ihong, sehngöre sā tinmël:

¹²Kinlongluvö töp tökiröng, tömarô-òlkui inrē; nët sīön nup inkūp e, nët sīön tak yip Ma-ahānga i nup inkūp; kūichi nup mine-eny nö i kui u, nup mine-eny yip tönët sīön miyöngö kūön Israĕl:

¹³Lūöi nup inkūp lā chuhöt; lūöi inrē nup inkūp lā kapā; lūöi inrē nup inkūp lā lòhngö, lūöi inrē nup inkūp lā sūng.

¹⁴Ngaich ap kinlonglö ap elpanam nö nët sīönö chūök röönti machööḵlö, ngaich i kui nup mine-eny yip tö nët sīön tak tanīnöṙô ngam pököre.

¹⁵Ngaich ök vame-eṅkūö chu nö aṅhaṅv-in tök humlum tafūyu kinlah, nö kinlah ṙôkö ngam elpanam, tö nup inkūp e, töp kinlonglö e.

¹⁶Fën mirë ngam elpanam, ngaich ök rôta e nö sā ṙôktāk e: ngaich anga-aṅ nö kalah ṙôkö ngam elpanam nö aṅtītö ök tafūyu, fënòng fën anāi köṅny tasöm, hĕngren angū-ö tö rôtare, ṙôktākre, rô-òlkuire inrē.

¹⁷Ngaich anga-aṅ nö kalah ngam kinlonglö e, hēngòng fën anāi fën sumkôngö, sā sumkôngö tarik, anga-aṅ öp Ma-ahānga.

¹⁸Ngaich öp kinlonglö e nö katöplöngö nö yaspör: ngaich ök elpanam nö humlum nö tötkatēhĕ, sā töt katēhĕ tinmël.

¹⁹Hanyöṅtö nuk chūök rööntö machööḵlö ök kinlonglö ök elpanam, tö nuk töṙōlkangen töpōiṙāi ihong. Yaspör ök raneh chūök rööntö machööḵlö; safir, ök innëtö; kālsitōni, ök linūöyö; emiröl, ök finënö;

²⁰Satônik, ök tinneūyö; satīös, ök tinfūölö; krisolit ök sinātö; pēril, ök hinëv höre; tôpa, ök minchūötöre, krisòprasi, ök sinömö, yāsin, ök kinhuksīönö; ametis, ök innët sīönö.

²¹Nuk tö nët sīön inkūp, nët sīön nuk nöng tasehe töpōiṙāi, höng tö hĕng milöichö nö tasehe töpōiṙāi, nuk tö ṙōl inkūp, nö kö hĕng: ngaich ök talöökö ök elpanam nöng töt katēhĕ nö humlum, sāre öre yĕn tösehngöre nö tinmël.

²²Öt maheūṅku chū-ö tö töhet chūök in e: pò ngam Mā Tēv Tökeuheūttöre chöngö, tö ngam pököre inrē, nö töhet chūök nö umuh.

²³Ngaich ngam elpanam nö öt hòṅ tavūöyu, öt rēhĕn nö hòṅ chingëṅtu, tö mahayangtö kui e: pò ngam kanôlò ngam Tēv nö hayangtö kui e, ngaich ngam pököre ëāṅvö e.

²⁴Ngaich yip pumnāmö tarik min nö lök ellōn öp yanāngö kūö e: ngaich yip rācha ngih panam nö kētö nup kanôlòre nö ël e.

²⁵Nup inkūp e min inrē öthētu nö öpikūö tö sakāmö, (pòn öt hatöömu min nö umuh):

²⁶Ngaich cha-a min nö kētö kanôlò, ane inrē ineū-euṅ, aṅ i yip pumnāmö tarik, nö ël e:

²⁷Ngaich öt hētu min nö kuhēthötre nö ël e, nup töchōich, hēk ngòh vamītö sin-òkkūö, ane inrē minyôinyaṅ: höng cha-a pöri yip tökūichi nö i mat līpöre nômö ngam pököre.