Read Car_Nicobarese INMEUKHÖMAT 22 Bible Online

INMEUKHÖMAT 22 - Car_Nicobarese bible

INMEUKHÖMAT 22

¹Ngaich Anga-aṅ nö hameukhömat chu töp tahël hĕng, mak nômö, amëla sā tösehngöre tinmël, hëmnyi nö löknyö ip kantēra ngam Tēv, ngam pököre inrē,

²Ellōn öp talöökö nö umuh. Ngaich lāhih i kui ap tahël, lāmuh inrē, ap chōn nômö, nët sīön kangen nup ṙòng ò, öt hĕnghang chumngëṅtö anga-aṅ nö ṙôngu; ngaich inrē nup rōi öp chōn nö inlanken yip pumnāmö tarik.

³Ngaich min rinūtngen nö öt ōtngöre: in e min inrē ngam kantēra ngam Tēv tö ngam Pököre inrē; ngaich lök i la-en Ò min yip kūönṙô Ò;

⁴Ngaich cha-a min nö meukkūö Ò; i māl cha min inrē öp Mine-eny Ò.

⁵Öt ōtre min hatööm; ngaich cha-a min nö öthòṅ hūmat tö ëāṅvö, öt rēhĕn tö hanūṙömat ngam tavūöi; pò ngam Mā Tēv min nö kētö hanū mat cha: ngaich cha-a min nö örheūheu nö hayöng.

⁶Ngaich ngö ṙô anga-aṅ tö chu, Tökô-en ön ngih, kanô-en inrē; ngaich ngam Mā, ngam Tēv yip ma-alaha yip pròfĕt, nö tīntö öp Ma-ahāngare nö hameukhö mat yip kūönṙôre tö nup töt ṙôktörevö nö yih.

⁷Yĕh meuk, kaeuitö yihih chin. Tökôlò öp anga-aṅ, öp mahaköp në ṙô vinë-eny mu-unôich aṅ mat ngih līpöre.

⁸Chū-ö chin Yôhan, öich hamang, mameūkö u inrē. Ngaich hē chu hang, meuk inrē, ngaich afukngöre chū-ö, öich salām, i röön ök Ma-ahānga, öp mahameukhömat chu tö u.

⁹Ngaich ngö ṙô anga-aṅ tö chu, Yĕh meuk, un ngatī: kūönṙô chin chū-ö hol meh, hol yip kisānö meh inrē yip pròfĕt, hol cha inrē yip mahaköp ṙô ngih līpöre: salām ngam Tēv man.

¹⁰Ngaich ngö ṙô anga-aṅ tö chu. Un hapāni kūö nup ṙô vine-eny mu-unôich i mat ngih līpöre, tön röhta an ngam ṙētak.

¹¹Anga-aṅ ngòh tötlöök, hökngen ò nöng la-evṙen tö ötlanöökö: anga-aṅ ngòh tömūmu, hökngen ò nö ṙūötuṙen mum: ngaich anga-aṅ ngòh tölöök, hökngen ò nöng la-evṙen tö lanöökö: anga-aṅ inrē ngòh töhet, hökngen ò nö ṙūötuṙen nö het.

¹²Yĕh meuk, ka-eūyen chin yih; kūmu chin tö në tīre raneushö, öich kö kē-ĕkūö tarik tö tö sā nuk la-en ò.

¹³Chū-ö chin Alfa, Omeka inrē, öich raneh, manā-aṅ inrē, öich ranehlö, manā-aṅ inrē.

¹⁴Tökôlò yip cha-a, yip samöich inyutre, pò cha nö huveū-en nö yihtöre nö im chōn nômö, ngaich kô-òren inrē nö kuhēthötre nö lökhöt minë inkūp ngam elpanam.

¹⁵Lā-uk nup am, yip tömilūönö inrē, tö yip chamô-òṅkānö, tö yip famël tarik, tö yip vame-eṅkūö insātēv, ṙòkhöre inrē yip töhāngen nö vī minyôinyaṅ.

¹⁶Chū-ö Yēsū tamīntö Ma-ahāngare nö hameukhö mat meh tö në, nö lamöö i nup Māṅ. Chū-ö chin ṙĕh, kūön Tāvit inrē, töhū, misaha inrē.

¹⁷Ngaich ngam Töhet Fanöinylö, tö ngam töhapihö kikānö inrē, nö ngö ṙô, Ta-ih. Anga-aṅ ngam hamang, hökngen ò nö ngö ṙô, Tā-ih. Anga-aṅ ngòh töhaṙëhe nômö, hökngen ò nö yihtöre: anga-aṅ ngòh töhōḵ hökngen ò nö kēḵ ngam mak ngam nômö nö öt ṙāiyutī.

¹⁸Kö hameukhömat tarik chū-ö ap hamang minë ṙô vine-eny mu-unôich i mat ngih līpöre, Yĕn tarīku ṙamūötö hol u min, ṙūötuṙen hol min nup tölëlngökūö invah nö in ò tö ngam Tēv, nup tökūichi nö i mat ngih līpöre:

¹⁹Ane inrē yĕn tarīku kamëngö nup ṙô nö ṙā-ang i minë ṙô ngih līpöre vine-eny mu-unôich, kē-ĕyö min öp minchöḵö ò tö ngam Tēv, nö ṙā-ang im chōn nômö, ṙā-ang el öp töhet elpanam inrē, nup tökūichi nö i mat ngih līpöre.

²⁰Ngaich anga-aṅ ngam mahameuktö në nö ngö ṙô, Hôṅ: ka-eūyen chin yih. Āmen: ta-achö, Mā Yēsū.

²¹Holtöṙah yip töhet an yēḵ ngam inlōnti aṅ im Mā Yēsū. Āmen.