Read Car_Nicobarese INMEUKHÖMAT 3 Bible Online

INMEUKHÖMAT 3 - Car_Nicobarese bible

INMEUKHÖMAT 3

¹Ane inrē löö ip Ma-ahānga ap māṅ i Sartīs ngötī kūich; Në nun ṙô Ò, ngam tö sātö aṅ-in tö Töhet Fanöinylö aṅ im Tēv, ane inrē tö sat taneūsömat: Akahalōn chin tö nup vahīṙen meh, tö meh minënyu öm aṅ, lā meh höng kapah.

²Höngöre man, haköpkö nup tö ōtren, nup tö hòṅ kapah nö ngaich: tön kôtökūö chin tö meh öt hēngö vahīṙen tö tökeuheūt nö ikūö ngam Tēv chu.

³Lökten man köpölōn tö inlahenre öm teūngen, ngaich inrē öm hang; haköpö e, ngaich havöötö ellōnre. Lökten yē meh min öt höngöre, sā mū-ulāya chu-ö min yih, ngaich me-eṅ min öt akahalōn tö ṙētak chu min yih in meh.

⁴Öt ṙôkenvö pöri nup minë-eny in meh i Sārtis, yip töt mahachōichngö mat hilāre; ngaich holröön chu min cha-a nö isōho hilā; pò cha nö töhōḵov.

⁵Anga-aṅ ngòh tömihôiṅ, kafānö min tö tö-isoh hilā nö ngatī, ngaich öthētu chu-ö min sichngö mine-eny ò nö ṙeū-eung i mat ngam līpöre nômö, ngaich halööknyö minë-eny ò chu-ö min i kūö ngam Yöng chu, i kūö yip Ma-ahānga Ò inrē.

⁶Ngòh tö-elnānguvö, hökngen ò nö hangihtöre tö ṙô ngam Töhet Fanöinylö tö në māṅ.

⁷Ane inrē ip Ma-ahānga ap māṅ i Filitalfīa ngö tī kūich, Në nun ṙô ngam töhet, anga-aṅ ngam tö kô-en, anga-aṅ ngam tö aṅhaṅv-in tö ngam tinkīök Tāvit, anga-aṅ ngam lamöpnyökūö, ngaich öt hĕng tak amöptökūö, ngam lamöptökūö ngaich öt hĕng tak lamöpnyökūö;

⁸Akahalōn chin tö nup vahīṙen meh yĕh meuk, i kūö meh tī chin töp töluvë-akkūö inkūp, hĕng öp töt hĕng tak tö kô lamöptökūö, tö meh öm höng rumhëiṅchyen kumlēḵ, ngaich köp tö ngam ṙô chu, ngaich öt mahngö ngam ṙô chu.

⁹Yĕh meuk, tö yip töminyôṅny aṅ, vamë-eṅkūö sātān inrē, aṅ in cha inrē yip Yahūti tö ṙôre, lān rö-ö cha-a, höng minyôiny pöri; vīten cha chin min nö yih, nö afukngöre nö iröön meh, hôṅ cha inrē nö akahakūö tö hāngenlōn tö meh.

¹⁰Pò meh haköp ngam ṙô chu, ngam manöiyö chu inrē, aṅten meh chin min ip ṙētak kinlaha, öp ṙētak angū-ö, yamih nö i kui ngih panam nö ṙòkhöre, nö kamlaha cha yip mī-iyöng kūö ngih panam.

¹¹Yih chin ka-euitö yihih: köptī man tö nup mi-in re nö ngaich, hòn öt hĕng tak kamëḵ ngam sapīöv meh.

¹²Anga-aṅ ngòh tömihôiṅ, vīten ò chu-ö min nö machööḵlö ngam töhet chūök ngam Tēv chu, ngaich öt hēṙu min anga-aṅ nö kunyī-inyre nö ṙā-ang in e: ngaich i alaha ò tī chu-ö min kūich minë-eny ngam elpanam ngam Tēv chu, ngam tufömngöre Yerūsalem, ngam yamônti nö ṙeū-eung im Tēv chu, ap tufömngöre min minë-eny chu inrē.

¹³Anga-aṅ ngòh tö elnānguvö, hökngen ò nö hangihtöre tö ṙô ngam Töhet Fanöinylö tö në māṅ.

¹⁴Ane inrē löö ip Ma-ahānga ngam māṅ i Laotisiā ngö tī kūich; në nun ṙô ngam tö Āmen, tökô-en, ameū-aṅ tökô-òṙô, ngam ranehlö në vahī ngam Tēv;

¹⁵Akahalōn chin tö nup vahīṙen meh, tö meh öt rēhĕn ufov, öt rēhĕn ṙāich; lahë man öre tö lōn chu, ufov, hēk ṙāich.

¹⁶Lökten pò meh höng feuk, öt rēhĕn ṙāich, öt rēhĕn ufov, kuvavlen meh chin min elvāngre.

¹⁷Pò meh ngö ṙô, Kôlò chin, ngaich teūngen tö kanôlòre, ngaich öt hēngö hanāten; ngaich rö-ö me-eṅ akahalōn töre öm kūöngö tötkôlò, yāich inrē, tötmeuk, töchumlal inrē;

¹⁸Halēnö meh chin öm havah humlum in chu, nup tö halööktitvö tö tameūyö, hòṅ meh öm kôlò, tö-isoh hilā inrē, hòn meh kafānöre, hòṅ öt hameuktu ngam sumrōngkūö meh öm chumlal; sanöichmat inrē nö sanòh mat meh, hòṅ meh meuk.

¹⁹I tum tat yip hanāngen chu, vëken cha chū-ö chökṙen cha inrē: lökten kalēḵĕ ellōn, havöötö ellōnre inrē.

²⁰Yĕh meuk, sökhak chin ikūö inkūp, öich kurönga: yĕn tarīku hamang ṙô chu, ngaich löpnyökūö ngam inkūp, ngaich kuhēthötre chu-ö min in ò, ngaich holkūö ò min nyā, holkūö chu anga-aṅ inrē.

²¹Anga-aṅ ngòh tömihôiṅ, kēḵĕkūö ò min chū-ö tö inūichhaka nö hol chu nö el kantēra chu, sā chu chu-ö ngaich mihôiṅ, ngaich ūichngöre hol ngam Yöngre el kantēra Ò.

²²Anga-aṅ ngòh tö elnānguvö, hökngen ò nö hangihtöre tö ṙô ngam Töhet Fanöinlyö tö në māṅ.