Read Car_Nicobarese INMEUKHÖMAT 5 Bible Online

INMEUKHÖMAT 5 - Car_Nicobarese bible

INMEUKHÖMAT 5

¹Ngaich meuk eltī Ò chū-ö tö līpöre hĕng nö lāhāmö, ngam amūichhak nö el kantēra kūichö mat nö lā-ël, lā-uk inrē, öphakkūö nö hapānikūö tö nup tö sat inpanngö.

²Ngaich hĕng tak öp maheuṅk chu tökalēḵ Ma-ahānga, ahānga nö pōitô, Achīö öp tökô nö löpnyökūö ngam līpöre, ṙòngnyökūö minë inpanngö e inrē?

³Ngaich öt hĕng tak el halīöngö, hēk el tumlat, hēk lātaṙeū töng tumlat tökô nö ṙòngnyökūö ngam līpöre, hēk hatīönkö e.

⁴Pōitô chū-ö ngaich peuny, pòn öt hĕng tak tökô nö löpnyökūö ngam līpöre, hēk hatīöngkö e:

⁵Ngaich hĕng tak ök aṅ i yik mā tö ngö ṙô tö chu, Um peuny: yĕh meuk, tö ngam Lāyön, ngam aṅ i miyöngö Yūtā ngam Ṙĕh Tāvit, nö ngaich nö mihôiṅ, nö löpnyökūö ngam līpöre, tö minë tö sat inpanngö inrē.

⁶Ngaich chū-ö meuk ellōn ngam kantēra, ane inrē i nup tö fën nòng tö-aṅ töṙeūla, ellōn yip mā inrē sökhaka ap pököre hĕng nòng, nö sā töngāichövah nö fëli, sātö sinrōl, sātö mat inrē, nö yip tösat Töhet Fanöinylö ngam Tēv, tö tīniyö nö i në taṙòkhöre panam.

⁷Yihtöre anga-aṅ ngaich, ngaich kē-ĕ e anga-aṅ nö ṙeū-eung eltī Ò ngam amūichhaka nö el ngam kantēra.

⁸Ngaich hē Ò nö kē ngam līpöre, ngaich nup tö fën nòng tö-aṅ töṙeūla, tö yip tö nët anāi fën tak mā, nö afukngöre nö i kūö ngam pököre, kö aṅhaṅv-in cha-a tö ranöng, töchilū humlum pingāṅl inrē, tööḵlö tö lōpān, nup vinë-eṅkūötēv ṙô yip töhet,

⁹Ngaich tikökṙôre cha-a tö tufömngöre tinkökö nö ngö ṙô, Tökô Man Me-eṅ kamëḵ ngam līpöre, Öm ṙòngnyö minë inpanngö inrē: pò meh tö fëli, ngaich ṙāitī tö ök mahāmre Öm kö havahtö vē miyöngö, minathö ëlô, tarik, tömaṙôngö tarik inrē, nö im Tēv,

¹⁰Ngaich vīten cha; nö pūlngö, mameukṙen ngam Tēv hī: ngaich cha-a nö hayöng nö ing panam.

¹¹Ngaich chū-ö meuk, ane inrē hang ṙô yip tömaṙôngö Ma-ahānga nö havīlö ngam kantēra, tö nup tö-aṅ töṙeūla, tö yip mā inrē, söm köṅny tumvan, söm köṅny tum kaka cha-a ane inrē köṅnyu tum köṅny;

¹²Nö ngö ṙô nö pōitô, Tökô an ngam pököre ngam töfëli, nö kēḵ chöngö, Kanôlò tö chehen, mikah, minhôiṅyö, ineū-euṅ, kanôlò, inkôlò inrē.

¹³Ngaich ṙòkhöre nup tövīlöngö el halīöngö; el tumlat, lātaṙeū töng tumlat, el mai, nup taṙòkhöre i kūö u inrē, nö hāngô tö chu nö ngö ṙô, In Ò ngam amūichhak nö el kantēra, i ngam pököre inrē, inkôlò yēḵ, ineū-euṅ, kanôlò minā-aṅ inrē, nöng örheūheu.

¹⁴Ngaich nup tö fën nòng tö-aṅ töṙeūla, nö ngö ṙô, Āmen. Ngaich yik mā nö afukngöre ngaich salām.