Read Car_Nicobarese INMEUKHÖMAT 6 Bible Online

INMEUKHÖMAT 6 - Car_Nicobarese bible

INMEUKHÖMAT 6

¹Ngaich meuk chū-ö hē ngam pököre nö hĕng höiny nö tiṙòngngö ap inpanngö aṅ i nup tö sat inpanngö, ngaich chū-ö hang ṙô ök hĕng nòng aṅ i nuk tö fën nòng tö-aṅ töṙeūla, nö ngö ṙô, nö sā ṙô kunṙôkö, Ta-ih.

²Ngëicha chū-ö ngaich, ngaich meuk ök hĕng, töhĕng nòng tö-isoh kōra, ngaich anga-aṅ ök mī-i-uk ò nö hĕng nòng aṅ in tö linreny, ngaich hĕng ök sapīöv tö kētu nö in ò, yihtöre anga-aṅ, ngaich nöng mihôiṅhöre nö kiyung.

³Ngaich ṙòngnyökūö ök innëtö anga-aṅ inpanngö, ngaich chū-ö hang ṙô ök innëtnòng tö-aṅ, töṙeūla, nö ngöṙô Ta-ih.

⁴Ngaich yihtöre ök tahëng nòng kōra, tangāṅv kōra; ngaich ap mī-i-uk ò nö kē-ĕvkūö nö kēngö lanāmö nö ṙā-ang ing panam, pòn hōtu cha-a inrē nöng kö fëlngen höö: kētuvö inrē nö in Ò ök hĕng nòng tökiröng sanët.

⁵Ngaich hē ò nö keuheūtö tī nö ṙòngnyökūö ök linūöyö inpanngö, ngaich chū-ö hang ṙô ök linūöi nòng tö-aṅ töṙeūla, nö ngö ṙô, Ta-ih. Ngaich ngëicha chū-ö, ngaich meuk ök hĕng nòng töhuṙing kōra: ngaich ök mī-i-uk ò nö aṅhaṅv eltī tö kinlah lumngan.

⁶Ngaich chū-ö hang ök tö sā ṙënṙô, ellōn nuk tö fën nòng, tö-aṅ töṙeūla, tö ngö ṙô, Hĕng nyanum vīt, fën höt tāk tö pësa; lūöi nyanum parli, fën höt tāk tö pësa: minë tavī-i, vāin inrē un chök tö tī meh.

⁷Ngaich hē ò nö keuheūtö tī nö ṙòngnyö ök finënö inpanngö, ngaich chū-ö hang ṙô ök finën nòng tö-aṅ töṙeūla nö ngö ṙô, Ta-ih.

⁸Ngaich ngëicha chū-ö, ngaich meuk ök hĕng nòng tölunyī kōra: Kinpaha, ök minë-eny ök mī-i-uk ò; tömrit ò inrē ök Chūök tökapah. Ngaich kē-ĕvkūö cha-a tö chöngö nö im finënlā alaha ngih panam, nö aṅtītö sanët nö fëlhanga, ane inrē aṅtītö nup tötainy aṅ el inchōn töṙeūla ing panam.

⁹Ngaich hē ò nö keuheūtö tī nö ṙòngnyökūö ök tinneūiyö inpanngö, meuk nuk nômö cha chū-ö, nö el katòh ngam tahāklö, yik tö fëli tö kūö ṙô ngam Tēv, kūö ngam kinṙapkö cha inrē inmeukhöti;

¹⁰Ngaich hūḵa cha-a nö pōitô nö ngö ṙô, Iṙôktören? Öt kamhôka ömeh? Öt havahalvah nuk mahām ih öm; in cha yip mī-iyöng kūö ngam panam? Ō Mā, Töhet, tökô-en inrē.

¹¹Ngaich nö kahĕng tamrīkö kinë-eṅkūö cha-a tö tö-aṙū-uti tö-isoh inyut: ngaich vënyu cha-a, nö hōtu nö rahëchtöreṙen nö heūheure, hanöng saha yip hol cha tanīnöṙô, ane inrē yip hanöng kisānö cha, yip töfëli min nö sā cha, nö keuheūtiṙen.

¹²Ngaich meuk chū-ö, hē ò nö keuheūtö tī nö ṙòngnyökūö ngam tinfūölö inpanngö, ngaich kiröng ök umuh yöng kumyeūnö; ngaich ngam tavūöi nö huṙing nö sā keūyö sāk, keuheūtngöre inrē ngam chingëṅt nö vīngöre nö sā mahām;

¹³Suktöre inrē minë taneūsömat ngam halīöngö nö el tumlat, sā sanukngöre ṙòng ngòh anychīr, tö nup tö öl nö köṅny ṙòng, yē u nö kayinköti tö kūö tökiröng kuföt.

¹⁴Kē-ĕyö ngaich ngam halīöngö nö sā nup tölirōlö linömngö; kö halöinykaṙen min nup rôngö, kun panam inrē, nö ṙā-ang i nup chūökre.

¹⁵Ngaich min yip rācha, tö yip kūön rācha, tö yip yöngṙen kumyung, tö yip tökôlò, tö yip tökalēḵ inrē, ṙòkhöre yip töhakövö tarik tö yip töt hakövö inrē, nö hayunngöre nö el kinlūhu, el ihong minë rôngö inrē;

¹⁶Ngaich ngö ṙô cha-a, tö minë rôngö, tö minë ihong inrē, Afukkui ih, hayunngen ih, tö kūö ngam amūichhaka nö el kantēra, hayunngen ih inrē tö lanīnö ngam pököre:

¹⁷Pò ngam tökiröng sakāmö ngam lanīnö cha nö yih achīö öp tökô nö sökhaka?